പാരീസിലെ ഈഫല് ഗോപുരത്തിന് മുന്നില് പരമ്പരാഗത സാരിയണിഞ്ഞ് ആത്മവിശ്വാസത്തോടെ റാംപ് വാക്ക് നടത്തുന്ന ഇന്ത്യന് സ്ത്രീകളുടെ വീഡിയോ സാമൂഹിക മാധ്യമങ്ങളില് വൈറലായി. ബംഗളൂരു ആസ്ഥാനമായുള്ള ഒരു ബോട്ടിക് പങ്കുവെച്ച വീഡിയോയില്, മധ്യവയസ്കരായ സ്ത്രീകള് പാരീസിന്റെ പശ്ചാത്തലത്തില് മനോഹരമായി പോസ് ചെയ്യുന്നതാണ് കാണുന്നത്. ഈ ദൃശ്യങ്ങള് വിദേശരാജ്യങ്ങളിലെ ടൂറിസ്റ്റുകളുടെ പെരുമാറ്റത്തെക്കുറിച്ചും സാംസ്കാരിക പ്രകടനങ്ങളെക്കുറിച്ചുമുള്ള വലിയൊരു ചര്ച്ചയ്ക്ക് വഴിതുറന്നിരിക്കുകയാണ്.
അന്താരാഷ്ട്ര വേദിയില് ഇന്ത്യന് സംസ്കാരത്തെ അഭിമാനപൂര്വ്വം പ്രതിനിധീകരിച്ചതിന് നിരവധി ആളുകള് ഈ സ്ത്രീകളെ പ്രശംസിച്ചു. എന്നാല്, തിരക്കേറിയ വിനോദസഞ്ചാര കേന്ദ്രങ്ങളില് ഇത്തരത്തിലുള്ള ഫോട്ടോഷൂട്ടുകള് നടത്തുന്നത് ഉചിതമാണോ എന്ന് ചിലര് ചോദ്യം ചെയ്തു. വിദേശങ്ങളില് സന്ദര്ശകരായി എത്തുമ്പോള് കൂടുതല് വിനയത്തോടെ പെരുമാറണമെന്നും പൊതുസ്ഥലങ്ങളില് ഇത്തരം പ്രകടനങ്ങള് ഒഴിവാക്കണമെന്നും വിമര്ശകര് വാദിക്കുന്നു.
എങ്കിലും, ഈ സ്ത്രീകള് പൊതുസ്ഥലം തടസ്സപ്പെടുത്തുകയോ മറ്റുള്ളവര്ക്ക് ബുദ്ധിമുട്ടുണ്ടാക്കുകയോ ചെയ്തിട്ടില്ലെന്നാണ് ഭൂരിപക്ഷം ആളുകളുടെയും വിലയിരുത്തല്. ഉച്ചത്തില് പാട്ട് വെച്ചോ അരോചകമായ നൃത്തം ചെയ്തോ ശല്യമുണ്ടാക്കാതെ, അവര് തങ്ങളുടെ അവധിക്കാലം ആസ്വദിക്കുക മാത്രമാണ് ചെയ്തതെന്നും, സമാധാനപരമായ രീതിയില് ഇന്ത്യന് സംസ്കാരത്തെ ലോകത്തിന് മുന്നില് കാണിക്കുകയാണ് ചെയ്തതെന്നും അനുകൂലിക്കുന്നവര് കുറിച്ചു.
