മലയാളികളുടെ അഭിമാനമാണ് പാന് ഇന്ത്യന് താരമായ ദുല്ഖര് സല്മാന്. മലയാളത്തില് തുടക്കം കുറിച്ചെങ്കിലും തെന്നിന്തയിലെ ഒട്ടുമിക്ക ഭാഷകളിലും ബോളിവുഡിലുമടക്കം തിളങ്ങി നില്ക്കുകയാണ് ദുല്ഖര്. ദേശത്തും വിദേശത്തുമടക്കം നിരവധി ആരാധകരാണ് താരത്തിനുള്ളത്. താരത്തെ ഒന്ന് കാണണമെന്നും സംസാരിക്കണമെന്നും പറ്റുമെങ്കില് ഒപ്പം നിന്നൊരു ചിത്രമെടുക്കണമെന്നും ആഗ്രഹിക്കാത്ത തെന്നിന്ത്യന് സിനിമാപ്രേമികള് ചുരുക്കമാണ്. അപ്പോള്പ്പിന്നെ കാഴ്ചയില് താരത്തെപ്പോലെയുണ്ടെന്ന് ആരെങ്കിലും പറഞ്ഞാലുള്ള അവസ്ഥയെന്താ ?
ഇപ്പോഴിതാ അത്തരത്തില് ദുല്ഖര് സല്മാന്റെ മുഖസാമ്യമുളള ഒരു വ്യക്തിയാണ് സോഷ്യല് മീഡിയയില് താരമാകുന്നത്. ഒരു സാങ്കേതിക വിദ്യയുടെയും സഹായമില്ലാതെ തനി ദുൽഖർ സൽമാൻ ലുക്കുള്ളൊരാൾ സോഷ്യല് മീഡിയയിലൂടെ വൈറലാകുകയാണ്. ആളൊരു സ്ത്രീയാണെന്നുള്ളതാണ് ഇതിലെ ഏറ്റവും കൗതുകകരമായ കാര്യം. സംസാരത്തിലും ലുക്കിലും സ്റ്റൈലിലും അടക്കം ദുൽഖറിനെ പോലെയുള്ളത് സൗന്ദര്യ ബാലസുബ്രമണി എന്ന തമിഴ്നാട് സ്വദേശിയാണ്.
ഒരു സാധാരണക്കാരി എന്നതിലുപരി സംരംഭകയും കമ്മ്യൂണിറ്റി ബിൽഡറും ഒക്കെയായ സൗന്ദര്യ എഴുത്തുകാരി കൂടിയാണ്. അൺഷാക്കിൾഡ്, അഡ്മിറ്റഡ്, 1000 ഡേയ്സ് ഓഫ് ലവ് തുടങ്ങിയ ജനപ്രിയ പുസ്തകങ്ങളുടെ രചയിതാവാണ് സൗന്ദര്യ ബാലസുബ്രമണി. ‘ഏതാനും നാളുകളായി പലരും തന്നെ കാണാന് ദുൽഖർ സൽമാനെ പോലെയാണെന്ന് പറഞ്ഞ് സോഷ്യൽ മീഡിയയിൽ മെസേജ് ഇടാറുണ്ടെ’ ഒരു വീഡിയോ സൗന്ദര്യ ചെയ്തിരുന്നു. ചില ആംഗിളുകളിൽ ഇത് ദുൽഖർ അല്ലേന്ന് നമുക്ക് തന്നെ തോന്നിപ്പോകുന്ന സാമ്യമാണ് ഇരുവരും തമ്മിലുള്ളത്.
‘‘ദുൽഖർ ഈ വീഡിയോ കാണുകയാണെങ്കിൽ. നമ്മൾ എന്നെങ്കിലും കണ്ടുമുട്ടുമെന്ന് പ്രതീക്ഷിക്കുന്നു...’’ എന്നാണ് സൗന്ദര്യ വീഡിയോയില് പറയുന്നത്. സൗന്ദര്യയുടെയും ദുല്ഖറിന്റെയും സാമ്യം കണ്ട് അക്ഷരാർത്ഥത്തിൽ പലരും ഞെട്ടി എന്നുള്ളതാണ് മറ്റൊരു വാസ്തവം.
ഈ വീഡിയോയ്ക്ക് താഴെ നിരവധി പേരാണ് കമന്റുകള് കുറിക്കുന്നത്. ‘ഹേയ് സിനാമികയിലെ ദുൽഖറിനെ ഓർമിപ്പിക്കുന്നു, നിങ്ങൾ ചിരിക്കുമ്പോൾ 200 ശതമാനം ദുൽഖർ തന്നെ, ഒരു കാർബൺ കോപ്പി പോലെ...’ എന്നിങ്ങനെ നീളുന്നു കമന്റുകള്.
