ന്യൂഡല്ഹി: രണ്ട് പതിറ്റാണ്ടിലധികം നീണ്ടുനിന്ന മുമ്പ് ഒത്തുതീര്പ്പായെന്ന് കരുതിയ ഒരു വിവാഹമോചനകേസിന് ഒടുവില് അവസാനമായപ്പോള് ഇന്ത്യന് വംശജ കോടീശ്വരി. യുകെയിലെ ഏറ്റവും ശ്രദ്ധേയമായ വിവാഹമോചന പോരാട്ടങ്ങളിലൊന്നില് ഇന്ത്യന് വംശജയായ വര്ഷ ഗോഹില് 6.6 ദശലക്ഷം പൗണ്ട് ആണ് (ഏകദേശം 85 കോടി രൂപ) നഷ്ടപരിഹാരമായി നേടി.
ഭര്ത്താവ് ഭദ്രേഷ് ഗോഹിലിന്റെ വ്യഭിചാരവും മോശം പെരുമാറ്റവും ചൂണ്ടിക്കാട്ടി 2002-ലാണ് വര്ഷ ഗോഹില് വിവാഹമോചനത്തിന് അപേക്ഷ നല്കിയത്. അക്കാലത്ത് മൂന്ന് കുട്ടികളുണ്ടായിരുന്ന ദമ്പതികള് തികച്ചും ലളിതമെന്ന് തോന്നിക്കുന്ന ഒരു സാമ്പത്തിക ഒത്തുതീര്പ്പില് എത്തിച്ചേര്ന്നിരുന്നു. വര്ഷ ഏകദേശം 270,000 പൗണ്ടും (ഏകദേശം 3.5 കോടി രൂപ) കുടുംബത്തിന്റെ പ്യൂഷോ കാറും സ്വീകരിക്കാന് തയ്യാറായി. എന്നാല് ഭദ്രേഷിനെതിരേ വര്ഷ ഉന്നയിച്ച ആരോപണങ്ങള്ക്ക് തെളിവ് കണ്ടെത്താനായില്ല.
എന്നാല് പിന്നീട് മുന് നൈജീരിയന് ഗവര്ണര് ജെയിംസ് ഇബോരിയുടെ കൂട്ടാളികളുമായി ബന്ധപ്പെട്ട വന് കള്ളപ്പണം വെളുപ്പിക്കല് അന്വേഷണത്തില് ഭദ്രേഷ് ഗോഹില് അകപ്പെട്ടതോടെ കാര്യങ്ങള് മാറിമറിഞ്ഞു.
വിദേശത്തെ വ്യാജ കമ്പനികള് , ക്ലയന്റ് അക്കൗണ്ടുകള് എന്നിവ വഴി ദശലക്ഷക്കണക്കിന് പൗണ്ട് മാറ്റാന് അദ്ദേഹം സഹായിച്ചതായി അധികൃതര് ആരോപിച്ചു. നീണ്ട അന്വേഷണത്തിനൊടുവില് കള്ളപ്പണം വെളുപ്പിക്കല്, വ്യാജരേഖ ചമയ്ക്കല്, വഞ്ചനയ്ക്കുള്ള ഗൂഢാലോചന എന്നീ കുറ്റങ്ങളില് അദ്ദേഹം കുറ്റക്കാരനാണെന്ന് കണ്ടെത്തി. 2011-ല് ഇയാളെ 10 വര്ഷത്തെ തടവിന് ശിക്ഷിച്ചു.
യഥാര്ത്ഥ വിവാഹമോചനക്കേസിന്റെ സമയത്ത് പുറത്തുവരാതിരുന്ന കോടിക്കണക്കിന് പൗണ്ട് മൂല്യമുള്ള സ്വത്തുക്കളാണ് ഈ ക്രിമിനല് നടപടികളിലൂടെ പുറത്തുവന്നത്. വിവിധ രാജ്യങ്ങളിലായി പ്രവര്ത്തിക്കുന്ന കമ്പനികളുടെ ശൃംഖലയിലൂടെ ഒളിപ്പിച്ചുവെച്ചിരിക്കുകയാണെന്ന് ആരോപിക്കപ്പെടുന്ന ഏകദേശം 28 ദശലക്ഷം പൗണ്ട് മരവിപ്പിക്കാന് പ്രോസിക്യൂട്ടര്മാര് പിന്നീട് നടപടി സ്വീകരിച്ചു.
ഈ കണ്ടെത്തലുകള് പഴയ വിവാഹമോചന ഒത്തുതീര്പ്പിനെ ചോദ്യം ചെയ്യാനുള്ള വര്ഷയുടെ ദീര്ഘകാല ശ്രമങ്ങള്ക്ക് പുതിയ ഊര്ജ്ജം പകര്ന്നു. വിവാഹമോചനക്കേസ് വീണ്ടും തുറക്കാന് സുപ്രീം കോടതി ഉത്തരവിട്ടതോടെ തര്ക്കം ഒടുവില് യുകെയുടെ സുപ്രീം കോടതിയിലെത്തി. സ്വത്തുക്കള് പൂര്ണ്ണമായി വെളിപ്പെടുത്തുന്നതില് പരാജയപ്പെടുന്ന ഒരു പങ്കാളിക്ക് ആ പരാജയത്തിന്റെ ആനുകൂല്യം ലഭിക്കാന് അര്ഹതയില്ലെന്ന് വിലയിരുത്തി, 2015-ലെ ചരിത്രപരമായ വിധിയിലൂടെ ജഡ്ജിമാര് വര്ഷയ്ക്ക് സാമ്പത്തിക ഒത്തുതീര്പ്പ് കേസ് വീണ്ടും തുറക്കാന് അനുമതി നല്കി.
മരവിപ്പിച്ച സ്വത്തുക്കള് പൂര്ണ്ണമായും കുറ്റകൃത്യങ്ങളിലൂടെ സമ്പാദിച്ചതാണെന്നും അതിനാല് അവ കണ്ടുകെട്ടല് നടപടികള്ക്കായി ഉപയോഗിക്കണമെന്നും ക്രൗണ് പ്രോസിക്യൂഷന് സര്വീസ് വാദിച്ചു. ഈ സമ്പത്തിന്റെ ഒരു ഭാഗമെങ്കിലും വിവാഹജീവിത കാലത്ത് നിയമാനുസൃതമായ ബിസിനസ്സുകളിലൂടെ കെട്ടിപ്പടുത്തതാണെന്നും അതിനാല് അത് ദാമ്പത്യ സ്വത്തായി കണക്കാക്കണമെന്നും വര്ഷ വാദിച്ചു. ഈ സ്വത്തുക്കള് തന്റേതല്ലെന്നായിരുന്നു ഭദ്രേഷ് ഗോഹിലിന്റെ വാദം.
വിഷയം ഒടുവില് ഹൈക്കോടതിയുടെ മുന്നിലെത്തി, അവിടെ ജസ്റ്റിസ് വില്യംസ് മരവിപ്പിച്ച സമ്പത്തിന്മേലുള്ള പരസ്പര വിരുദ്ധമായ അവകാശവാദങ്ങള് പരിശോധിച്ചു. സ്വത്തുക്കളുടെ ഒരു ഭാഗത്തിന് നിയമാനുസൃതമായ ഉറവിടങ്ങളുണ്ടെന്നും അവ ദമ്പതികളുടെ ദാമ്പത്യ സ്വത്തിന്റെ ഭാഗമാണെന്നും ജഡ്ജി നിഗമനത്തിലെത്തി. നിയമവിരുദ്ധമല്ലാത്ത സ്വത്തുക്കളില് നിന്ന് ഏകദേശം 6.66 ദശലക്ഷം പൗണ്ട് അദ്ദേഹം കണ്ടെത്തുകയും ആ തുക വര്ഷ ഗോഹിലിന് അനുവദിക്കുകയും ചെയ്തു.
