പത്തനംതിട്ട: ബിയറിന് അധിക തുക ഈടാക്കിയതിന് ബിവറേജസ് കോര്പ്പറേഷന് പെരുനാട് ഡിപ്പോ മാനേജര് 25,010 രൂപ പരാതിക്കാരനു പിഴ നല്കണമെന്ന് പത്തനംതിട്ട ഉപഭോക്തൃ തര്ക്കപരിഹാര കമ്മിഷന് ഉത്തരവ്. റാന്നി മാമ്പറ വാലുപുരയിടത്തില് എ.ടി. ആകാശ് കമ്മിഷനു നല്കിയ പരാതിയിലാണു നടപടി.
പെരുനാട് പഞ്ചായത്തിലുള്ള ബിവറേജ് ഡിപ്പോയില്നിന്ന് ബിയര് വാങ്ങിയ ആകാശ് ലഭിച്ച ബില്ലനുസരിച്ച് 180 രൂപ നല്കിയിരുന്നു. എന്നാല് ബിയറിന്റെ കുപ്പിയില് എം.ആര്.പി രേഖപ്പെടുത്തിയിരുന്നത് 170 രൂപയാണ്. ഇതു ജീവനക്കാരെ ബോധ്യപ്പെടുത്തിയപ്പോള് ബില്ലിലെ തുകയാണു കൗണ്ടറില് നല്കേണ്ടതെന്നായിരുന്നു മറുപടി. പെരുനാട് ബെവ്കോയില് ഈ രീതിയിലാണു ബില്ലടിക്കുന്നതെന്നും അറിയിച്ചു.
ബോട്ടിലിലുള്ള എം.ആര്.പിയേക്കാള് 10 രൂപ കൂടുതലാണ് ആകാശില്നിന്ന് ഈടാക്കിയത്. ജീവനക്കാര് വളരെ മോശം രീതിയില് പെരുമാറിയെന്നും പറയുന്നു. ഇതിനെതിരേ നടപടി സ്വീകരിക്കണമെന്നും തക്കതായ നഷ്ടപരിഹാരത്തുക ഈടാക്കി നല്കണമെന്നും ആവശ്യപ്പെട്ടാണ് ആകാശ് കമ്മീഷനില് പരാതി നല്കിയത്.
ഹര്ജി ഫയലില് സ്വീകരിച്ച കമ്മിഷന് ഇരുകക്ഷികള്ക്കും നോട്ടീസ് അയ യ്ക്കുകയും എതിര്കക്ഷി അഭിഭാഷകന് മുഖാന്തരം കമ്മിഷനില് ഹാജരാകുകയും ചെയ്തു. പഴയ എം.ആര്.പി ഉപയോഗിച്ച്, ലേബലുകള് മാറ്റാതെതന്നെ വെയര്ഹൗസിലുളള സ്റ്റോക്ക് പുതിയ വിലയില് വില്ക്കാന് ബിവറേജ് കോര്പ്പറേഷനുകളോടു നിര്ദേശിച്ചതായാണ് എതിര്കക്ഷി ഹാജരാക്കിയ ഗവണ്മെന്റ് ഓര്ഡറില് പറയുന്നത്. എന്നാല് ഈ നിര്ദ്ദേശം നിയമവിരുദ്ധമാണെന്നു കമ്മീഷന് കണ്ടെത്തി.
എതിര്കക്ഷി സേവനദാതാവും പരാതിക്കാരന് ഉപഭോക്താവുമാണ്. കുപ്പിയിലെ വില 170 രൂപയായിരിക്കെ ബില്ലില് 180 രൂപ എന്നു രേഖപ്പെടുത്തുന്നത് കുറ്റകരമാണ്. ഉപഭോക്താവിന് ആഭ്യന്തര സര്ക്കാര് ഉത്തരവുകള് അറിയുമെന്നു പ്രതീക്ഷിക്കാനാവില്ല.
പ്രവൃത്തി അന്യായമായ വ്യാപാര രീതിയുടെ വ്യക്തമായ കേസാണെന്നും കമ്മിഷന് കണ്ടെത്തി. അതിന്റെ അടിസ്ഥാനത്തില് പരാതിക്കാരനോടു കൂടുതല് ഈടാക്കിയ തുകയും നഷ്ടപരിഹാരവും നല്കാനാണ് ഉത്തരവ്. കമ്മിഷന് പ്രസിഡന്റ് ബേബിച്ചന് വെച്ചൂച്ചിറയും അംഗമായ നിഷാദ് തങ്കപ്പനും ചേര്ന്നാണു വിധി പ്രസ്താവിച്ചത്.
