സോഷ്യല് മീഡിയയിലൂടെ വൈറലാകുന്ന വീഡിയോകളില് മുന്പന്തിയിലാണ് ആനകളുടെ വീഡിയോകള്. മനുഷ്യരുമായി ആനകള് ഇണങ്ങി ജീവിക്കുന്നതും സ്നേഹം പ്രകടിപ്പിക്കുന്നതും കുട്ടിയാനകള് കുസൃതി കാട്ടുന്നതുമടക്കമുള്ള വീഡിയോകള് വലിയ രീതിയില് ആനപ്രേമികള് ഏറ്റെടുക്കാറുണ്ട്. ആനകളുടെ വീഡിയോകള്ക്ക് അടിപൊളി ബിജിഎം ഒക്കെയിട്ട് സ്ലോ മോഷനൊക്കെ നല്കി ഒരു സിനിമാറ്റിക് ഫീല് നല്കി ഷെയര് ചെയ്യുമ്പോള് ലൈക്കും ഷെയറും കമന്റുകളുമൊക്കെ നിറഞ്ഞു കവിയാറുണ്ട്.
ഇപ്പോഴിതാ തന്റെ പാപ്പാനുമായി ഒരു ക്യൂട്ട് മൊമന്റ് പങ്കിടുന്ന കുട്ടിയാനയുടെ വീഡിയോയാണ് സോഷ്യല് മീഡിയയിലൂടെ വൈറലാകുന്നത്. തമിഴ്നാട്ടിലെ കുംഭകോണത്തുള്ള അരുൾമിഗു ആദി കുംഭേശ്വരർ ക്ഷേത്രത്തിൽ നിന്ന് പകര്ത്തിയിരിക്കുന്ന വീഡിയോയില് ക്ഷേത്രത്തിലെ മംഗളം എന്ന കുട്ടിയാനയെ കാണാം. വലിയ ബഹളമൊന്നുമില്ലാത്ത ഒരു ശാന്തമായ ക്ഷേത്രപശ്ചാത്തലത്തില് പാപ്പാന്റെ അടുത്ത് നില്ക്കുകയാണ് ആന. കഴുത്തില് മണിമാലയും നെറ്റിയില് നീട്ടിവരച്ച ഭസ്മതിലകവും കുങ്കുമവുമൊക്കെ അണിഞ്ഞു നില്ക്കുന്ന ആന തന്റെ പാപ്പനോട് നിശബ്ദമായി സംവദിക്കുന്നതാണ് വീഡിയോ ദൃശ്യങ്ങളിലുള്ളത്.
തന്റെ ഒരു കാല് നേരെ നീട്ടിക്കൊടുമ്പോള് അത് എന്തിനാണെന്ന് തന്റെ യജമാനന് മനസ്സിലാക്കുമെന്ന് ആനയ്ക്കറിയാമെന്നുള്ളത് വീഡിയോ ദൃശ്യങ്ങളില് നിന്ന് മനസ്സിലാകും. ആനയ്ക്ക് ചുവട്ടിലിരിക്കുന്ന പാപ്പാന് തന്റെ കുട്ടിയാനയുടെ കാല് ശാന്തമായി പതിയെ മസാജ് ചെയ്തു കൊടുക്കുകയാണ്. മസാജിംഗ് കഴിയുന്നതോടെ കാലില് ചെറുതായി ഒന്ന് കൊട്ടി കഴിഞ്ഞുവെന്ന് പാപ്പാനത് ആനയെ അറിയിക്കുന്നുമുണ്ട്. ആ മസാജിംഗ് ഇഷ്ടപ്പെടുന്ന കുട്ടിയാന അതിനു പിന്നാലെ തന്റെ മറുവശത്തെ കാലും അതുപോലെ ഉയർത്തിക്കൊടുക്കുന്നുണ്ട്.
‘‘വെറും ഒരു കുഞ്ഞ്. വളരെ വളരെ വലിയ കുഞ്ഞ്. കാല് മസാജ് ചെയ്യാൻ മാന്യമായി അഭ്യർത്ഥിക്കുന്നു...’’ എന്ന ക്യാപ്ഷന് നല്കി ലൈഫ് വിത്ത് ഷ്രൂട്ട്സ് എന്ന ഇന്സ്റ്റഗ്രാം അക്കൗണ്ടിലൂടെയാണ് ഈ വീഡിയോ പങ്കിട്ടിരിക്കുന്നത്. മനുഷ്യനും ആനയും തമ്മിലുള്ള ആത്മബന്ധത്തിന്റെയും സ്നേഹത്തിന്റെയും തെളിവായി മാറിയ ഈ വീഡിയോ ഇതിനോടകം 1.5 മില്യണിലധികം ആളുകളാണ് കണ്ടിരിക്കുന്നത്. വളരെ മനോഹരം എന്നാണ് പലരും വീഡിയോയ്ക്ക് താഴെ കുറിക്കുന്ന കമന്റുകള്.
