കടലിനടിയിലെ കാഴ്ചകള് ആസ്വദിക്കാനും നീന്താനുമൊക്കെ എല്ലാവര്ക്കും വലിയ ഇഷ്ടമാണ്. എന്നാല് കടലിനടിയില് വെച്ച് ഒരു കടലാമയുടെ കൈയില് നിന്നും അടി കിട്ടേണ്ടി വന്നാലോ? കേള്ക്കുമ്പോള് വിചിത്രമായി തോന്നാമെങ്കിലും ലോകം ചുറ്റിക്കാണുന്ന സോഷ്യല് മീഡിയ ഇന്ഫ്ലുവന്സറായ ക്രിസ്റ്റഫര് ചാങ്ങിനാണ് കടലിനടിയില് വെച്ച് ഇങ്ങനെയൊരു ദുരനുഭവം ഉണ്ടായത്.
വെള്ളത്തിനടിയില് നീന്തുകയായിരുന്ന ക്രിസ്റ്റഫറിനെ ഒരു കടലാമ ഏറെ നേരമായി പിന്തുടരുന്നുണ്ടായിരുന്നു. അവസരം കിട്ടിയ പാടെ ആമ നേരെ വന്ന് ക്രിസ്റ്റഫറിന്റെ മുഖത്ത് ഒരൊറ്റ അടി വെച്ചു കൊടുക്കുകയായിരുന്നു. അടി കിട്ടിയ ശേഷം തിരിഞ്ഞുപോലും നോക്കാതെ ആമ നീന്തിപ്പോകുകയും ചെയ്തു. ഒട്ടും പ്രതീക്ഷിക്കാത്ത ഈ ആക്രമണത്തില് അമ്പരന്ന യുവാവ് പെട്ടെന്ന് തന്നെ വെള്ളത്തിന് മുകളിലേക്ക് വരികയായിരുന്നു.
പതിവായി കടലില് നീന്താറുള്ള ക്രിസ്റ്റഫറിന് ആമകളെ കണ്ട് നല്ല ശീലമുണ്ട്. സാധാരണയായി അവ മനുഷ്യരെ ശ്രദ്ധിക്കാതെ നീന്തിപ്പോകാറാണ് പതിവ്. എന്നാല് ഈ ആമ താന് എങ്ങോട്ട് തിരിഞ്ഞാലും ഒപ്പം വരുന്നുണ്ടായിരുന്നുവെന്നും, അടി കിട്ടിയ ഉടനെ തന്നെ പേടിച്ച് താന് ബോട്ട് വിളിച്ച് കരയിലേക്ക് മടങ്ങിയെന്നും ക്രിസ്റ്റഫര് സോഷ്യല് മീഡിയയില് പങ്കുവെച്ച കുറിപ്പില് പറയുന്നു.
ക്രിസ്റ്റഫര് പങ്കുവെച്ച ഈ വീഡിയോ സോഷ്യല് മീഡിയയില് വലിയ രീതിയില് വൈറലാവുകയും നിരവധി രസകരമായ കമന്റുകള് വരികയും ചെയ്യുന്നുണ്ട്. ജീവികളുടെ താമസസ്ഥലത്ത് അതിക്രമിച്ചു കയറിയാല് ഇങ്ങനെ പലതും സംഭവിക്കുമെന്നും, അത് അടിയല്ല പകരം ഒരു തഴുകലായി കണ്ടാല് മതിയെന്നുമാണ് ചിലരുടെ അഭിപ്രായം. ഒരുപക്ഷേ കളിക്കാന് വിളിച്ചതാവാം എന്നും ചിലര് കമന്റ് ചെയ്യുന്നു.
