ഭാര്യ രശ്മിക മന്ദാനയ്ക്കും മാതാപിതാക്കൾക്കുമൊപ്പമുള്ള ചിത്രം പങ്കുവെച്ച് നടൻ വിജയ് ദേവരകൊണ്ട. "മറ്റൊരു നല്ല ദിവസം കൂടി" എന്ന അടിക്കുറിപ്പോടെയാണ് വിജയ് ഈ ചിത്രം സോഷ്യൽ മീഡിയയിൽ പോസ്റ്റ് ചെയ്തത്. തങ്ങളുടെ ഫൗണ്ടേഷൻ വഴി 45 സ്കൂളുകളിലായി 180 വിദ്യാർത്ഥികൾക്ക് സ്കോളർഷിപ്പ് നൽകാൻ സാധിച്ചതിന്റെ സന്തോഷവും താരം ആരാധകരുമായി പങ്കുവെച്ചു.
"മറ്റൊരു നല്ല ദിവസം കൂടി. 45 സ്കൂളുകളിലായി 180 വിദ്യാർത്ഥികൾക്ക് ഈ വർഷത്തെ (ഒന്നാം വർഷത്തെ) സ്കോളർഷിപ്പ് വിതരണം വിജയകരമായി പൂർത്തിയാക്കി. 2027 ജൂണിൽ നിങ്ങളെയെല്ലാം വീണ്ടും കാണാൻ കാത്തിരിക്കുന്നു. ഇതൊരു വലിയ വിജയമാക്കാൻ ഞങ്ങൾ ഇനിയും ശ്രമിക്കും. ഞങ്ങളുടെ എല്ലാവരുടെയും സ്നേഹാന്വേഷണങ്ങൾ." - വിജയ് കുറിച്ചു.
തെലങ്കാനയിലെ സർക്കാർ സ്കൂളുകളിലെ മിടുക്കരായ വിദ്യാർത്ഥികൾക്കാണ് വിജയ് ദേവരകൊണ്ടയും രശ്മികയും സ്കോളർഷിപ്പുകൾ വിതരണം ചെയ്തത്. വിജയിയുടെ അച്ഛന്റെ ജന്മനാടായ അച്ചംപേട്ട് മണ്ഡലിലെ തുമ്മൻപേട്ട് ഗ്രാമത്തിൽ നടന്ന ചടങ്ങിലാണ് ഇരുവരും ചേർന്ന് സ്കോളർഷിപ്പുകൾ കൈമാറിയത്. 'ദി ദേവരകൊണ്ട ഫൗണ്ടേഷൻ' വഴിയാണ് 180 വിദ്യാർത്ഥികൾക്ക് ഈ ധനസഹായം നൽകുന്നത്.
കഴിഞ്ഞ ഫെബ്രുവരിയിലായിരുന്നു വിജയിന്റെയും രശ്മികയുടെയും വിവാഹം. വിവാഹശേഷം ഇരുവരും തുമ്മൻപേട്ടിലെ തങ്ങളുടെ പുതിയ വീട്ടിൽ ഗൃഹപ്രവേശ ചടങ്ങുകൾക്കായി എത്തിയപ്പോഴാണ് വിദ്യാർത്ഥികൾക്കായി ഇങ്ങനെയൊരു മികച്ച പദ്ധതി പ്രഖ്യാപിച്ചത്.
അതേസമയം വിവാഹശേഷം ഇരുവരും ഒന്നിച്ചഭിനയിക്കുന്ന പുതിയ ചിത്രം 'രണബലി' സെപ്റ്റംബർ 11-ന് തിയേറ്ററുകളിലെത്തും. രാഹുൽ സങ്കൃത്യനാണ് ചിത്രം സംവിധാനം ചെയ്യുന്നത്.
