വിനോദ സഞ്ചാരികളുടെ പ്രിയപ്പെട്ട ഇടങ്ങളിലൊന്നായ ഇന്ത്യയെക്കുറിച്ച് സോഷ്യല് മീഡിയയില് പലപ്പോഴും തെറ്റായ രീതിയിലുള്ള കുപ്രചരണങ്ങളും നെഗറ്റീവ് വീഡിയോകളും പ്രത്യക്ഷപ്പെടാറുണ്ട്. എന്നാല് ഇത്തരം വ്യാജവും ഇടുങ്ങിയതുമായ ഇന്ത്യാ വിരുദ്ധ പ്രചരണങ്ങള്ക്കെതിരെ ശക്തമായ പ്രതികരണവുമായി ഇപ്പോള് ഒരു ബ്രിട്ടീഷ് യാത്രികന് രംഗത്തെത്തിയിരിക്കുകയാണ്.
പലതവണ ഇന്ത്യ സന്ദര്ശിച്ചിട്ടുള്ള റോറി പോര്ട്ടര് എന്ന യുവാവാണ് ഇന്സ്റ്റാഗ്രാമിലൂടെ ഇന്ത്യയെക്കുറിച്ചുള്ള നെഗറ്റീവ് സ്റ്റീരിയോടൈപ്പുകളെയും തെറ്റായ പ്രചരണങ്ങളെയും ശക്തമായി വിമര്ശിച്ചുകൊണ്ട് വീഡിയോ പങ്കുവെച്ചിരിക്കുന്നത്. ഇന്ത്യാ വിരുദ്ധ പ്രചരണ വീഡിയോകള് കണ്ട് അതില് വിശ്വസിക്കുന്ന വിദേശികളോട് ഇന്ത്യ സന്ദര്ശിക്കാന് ശ്രമിക്കേണ്ടതില്ലെന്നാണ് ഇദ്ദേഹം തുറന്നടിക്കുന്നത്. അത്രത്തോളം സങ്കുചിത മനസ്സ് പുലര്ത്തുന്നവര് ഇന്ത്യയിലേക്ക് വരേണ്ടതില്ലെന്നും, ഇത്തരക്കാര് മറ്റ് എവിടെയെങ്കിലും പൊയ്ക്കോളൂ എന്നും റോറി പോര്ട്ടര് തന്റെ വീഡിയോയിലൂടെ ഉപദേശിക്കുന്നു.
ഇന്ത്യയെക്കുറിച്ച് വളരെ പോസിറ്റീവായ അനുഭവങ്ങളാണ് തനിക്കുള്ളതെന്ന് ഈ ബ്രിട്ടീഷ് സഞ്ചാരി വ്യക്തമാക്കുന്നു. ഇന്ത്യ എന്നത് ദയാലുക്കളും അങ്ങേയറ്റം ആതിഥ്യ മര്യാദയുള്ളവരുമായ ആളുകള് താമസിക്കുന്ന ഇടമാണെന്നും, അതിശയകരമാം വിധം സമ്പന്നമായ സംസ്കാരമുള്ള ഒരു 'മാന്ത്രിക ഭൂമി' ആണെന്നും അദ്ദേഹം തന്റെ വീഡിയോയില് ഓര്മ്മിപ്പിക്കുന്നുണ്ട്.
നെഗറ്റീവ് വീഡിയോകള് മാത്രം കണ്ട് ഇന്ത്യയെ വിലയിരുത്തുന്ന വിദേശികളുടെ മനോഭാവത്തെ തിരുത്താനാണ് ഈ ബ്രിട്ടീഷ് സഞ്ചാരി തന്റെ പ്രതികരണത്തിലൂടെ ശ്രമിക്കുന്നത്. സോഷ്യല് മീഡിയയില് വൈറലായ ഇദ്ദേഹത്തിന്റെ ഈ വീഡിയോയ്ക്ക് ഇപ്പോള് വലിയ രീതിയിലുള്ള പിന്തുണയും കയ്യടിയുമാണ് ലഭിച്ചുകൊണ്ടിരിക്കുന്നത്.
