അയോധ്യ: “എഗ്ഗ് ഓഫ് സൺ” എന്ന പേരിൽ പ്രശസ്തമായ ‘മിയാസാക്കി’ മാമ്പഴം അയോധ്യയിലെ രാം മന്ദിറിൽ കാണിക്കയായി സമർപ്പിച്ചു. അയോധ്യയിലെ കർഷകനായ ഓംപ്രകാശ് സിംഗ് ആണ് ലോകത്തിലെ ഏറ്റവും വില കൂടിയ മാമ്പഴം കാണിക്ക അർപ്പിച്ചത്. ഇതാദ്യമായാണ് രാം മന്ദിറിൽ ‘മിയാസാക്കി’ മാങ്ങ കാണിക്കയായി എത്തുന്നത്.
മാമ്പഴം തുളസിയിലയോടൊപ്പം പരമ്പരാഗത ചടങ്ങുകളോടെയാണ് ഭഗവാന് സമർപ്പിച്ചത്. അന്താരാഷ്ട്ര വിപണിയിൽ കിലോഗ്രാമിന് 2.5 ലക്ഷം രൂപ മുതൽ 3 ലക്ഷം രൂപ വരെയാണ് ഇതിന്റെ വില. ഒരു മാമ്പഴത്തിന് മാത്രം ഏകദേശം ഒരു ലക്ഷം രൂപയോളം വിലവരും. അയോധ്യയിലെ കർഷകനായ ഓംപ്രകാശ് സിംഗ് രണ്ട് വർഷം മുൻപാണ് ഈ മിയാസാക്കി മാവ് നട്ടുപിടിപ്പിച്ചത്. അയോധ്യയിലെ കാലാവസ്ഥയ്ക്ക് ഈ ജാപ്പനീസ് ഇനം അനുയോജ്യമാണോ എന്ന് പരീക്ഷിക്കുകയായിരുന്നു അദ്ദേഹത്തിന്റെ ലക്ഷ്യം. കാലാവസ്ഥയുമായി മികച്ച രീതിയിൽ പൊരുത്തപ്പെട്ട മരത്തിൽ നിന്ന് ഈ സീസണിൽ പന്ത്രണ്ടോളം മാമ്പഴങ്ങളാണ് ലഭിച്ചത്
ഓംപ്രകാശ് സിംഗ് വിളവെടുത്ത ഓരോ പഴത്തിനും 150 ഗ്രാം മുതൽ 300 ഗ്രാം വരെ തൂക്കമുണ്ട്. മറ്റ് ഇനങ്ങളേക്കാൾ കൂടുതൽ മധുരവും വിറ്റാമിനുകളും ഇതിലുണ്ട്. ഈ പ്രീമിയം ജാപ്പനീസ് മാമ്പഴത്തിന്റെ അയോധ്യയിലെ വിജയകരമായ കൃഷി ഭക്തർക്കിടയിലും കാർഷിക പ്രേമികൾക്കിടയിലും വലിയ ശ്രദ്ധയാണ് നേടുന്നത്.
