അമേരിക്കയിലെ പലചരക്ക് സാധനങ്ങളുടെ വില കേട്ട് ഇന്ത്യയിലെ ഒരു പാല്ക്കാരന് പ്രകടിപ്പിച്ച തീര്ത്തും സ്വാഭാവികമായ അമ്പരപ്പിന്റെ വീഡിയോ സോഷ്യല് മീഡിയയില് വൈറലായിരിക്കുകയാണ്. ലോസ് ഏഞ്ചല്സ് ആസ്ഥാനമായി പ്രവര്ത്തിക്കുന്ന പ്രഭാകര് പ്രസാദ് എന്ന സംരംഭകനാണ് തന്റെ നാട്ടിലെ പാല്ക്കാരനുമായി നടത്തിയ സംഭാഷണത്തിന്റെ ദൃശ്യങ്ങള് പങ്കുവെച്ചത്. കാലിഫോര്ണിയയില് ഒരു ലിറ്റര് പാലിന് ഏകദേശം 450 രൂപയോളം വിലവരുമെന്ന് കേട്ടപ്പോള് പാല് വില്പ്പനക്കാരന് പൂര്ണ്ണമായും ഞെട്ടിപ്പോയി.
ഇന്സ്റ്റാഗ്രാമില് 'ചായ്ഗൈ' എന്ന പേരില് അറിയപ്പെടുന്ന പ്രഭാകര് പ്രസാദ്, താന് ഈ പാല് ഉപയോഗിച്ചാണ് അവിടെ ചായ വില്ക്കുന്നതെന്ന് പാല്ക്കാരനോട് വിശദീകരിച്ചു. തുടര്ന്ന് ഒരു കപ്പ് ചായയ്ക്ക് എത്ര രൂപയാണ് ഈടാക്കുന്നതെന്ന് പാല്ക്കാരന് ചോദിച്ചപ്പോള്, 10 ഡോളര് (ഏകദേശം 900 രൂപ) ആണെന്ന മറുപടിയാണ് പ്രസാദ് നല്കിയത്. ഇത് കേട്ടതോടെ അമ്പരപ്പ് മാറിയ പാല്ക്കാരന്, ഉടന് തന്നെ ഒരു ബിസിനസ്സ് ആശയം മുന്നോട്ട് വെച്ചു. തന്റെ പക്കലുള്ള പാല് കേടുകൂടാതെ ഫ്രിഡ്ജ് ഒക്കെ വെച്ച് അമേരിക്കയിലേക്ക് കയറ്റുമതി ചെയ്യാന് എന്തെങ്കിലും വഴിയുണ്ടോ എന്നായിരുന്നു അദ്ദേഹത്തിന്റെ കൗതുകത്തോടെയുള്ള ചോദ്യം.
വിദേശത്തെ ജീവിതത്തെക്കുറിച്ച് അറിയാനുള്ള താല്പര്യത്തോടെ അദ്ദേഹം അമേരിക്കയിലെ ജീവിതം എങ്ങനെയുണ്ടെന്നും പ്രസാദിനോട് ചോദിച്ചു. അവിടെയെല്ലാം വളരെ വേഗതയിലാണ് ചലിക്കുന്നതെന്നും, ധാരാളം ഗുണങ്ങളുണ്ടെങ്കിലും രാജ്യം അതിന്റേതായ സവിശേഷമായ വെല്ലുവിളികളും പ്രശ്നങ്ങളും നേരിടുന്നുണ്ടെന്നും പ്രസാദ് മറുപടി നല്കി. ഈ വീഡിയോയ്ക്ക് സോഷ്യല് മീഡിയയില് വലിയ പ്രതികരണമാണ് ലഭിക്കുന്നത്. പാല്ക്കാരന്റെ കണ്ണുകളിലെ ആത്മാര്ത്ഥമായ കൗതുകത്തെയും അദ്ദേഹത്തിന്റെ വിനയത്തെയും പ്രശംസിച്ച് നിരവധി ആളുകള് കമന്റുകള് രേഖപ്പെടുത്തി.
ഈ വൈറല് വീഡിയോയ്ക്ക് പിന്നിലുള്ള പ്രഭാകര് പ്രസാദ് എന്ന 'ചായ്ഗൈ'യുടെ ജീവിതകഥയും ഏറെ ശ്രദ്ധേയമാണ്. ബിഹാറിലെ ഒരു ചെറിയ പട്ടണത്തില് നിന്ന് വളര്ന്ന് ലോസ് ഏഞ്ചല്സില് വിജയകരമായ ഒരു ബിസിനസ്സ് കെട്ടിപ്പടുത്ത വ്യക്തിയാണ് അദ്ദേഹം. പഠനത്തില് മിടുക്കനായിരുന്ന പ്രസാദ് പിന്നീട് ഭോപ്പാലിലേക്ക് മാറുകയും, അവിടെ നേരിട്ട പ്രതിസന്ധികളെ അതിജീവിച്ച് ഐഐടി സ്ക്രീനിംഗ് പരീക്ഷ വിജയിക്കുകയും ചെയ്തു. അതിനുശേഷം ഐടി മേഖലയില് ജോലി ലഭിച്ചെങ്കിലും കോര്പ്പറേറ്റ് ലോകത്തോട് താല്പര്യമില്ലാത്തതിനാല് എംബിഎ പഠനത്തിനായി അദ്ദേഹം അമേരിക്കയിലേക്ക് തിരിച്ചു.
അമേരിക്കയില് കോര്പ്പറേറ്റ് ജോലികള് ചെയ്യുന്നതിനിടയില് പലതവണ ജോലി നഷ്ടപ്പെടുകയും വലിയ വ്യക്തിപരമായ തകര്ച്ചകള് നേരിടുകയും ചെയ്തപ്പോഴാണ് ഒരു സുഹൃത്തിന്റെ നിര്ദ്ദേശപ്രകാരം അദ്ദേഹം ചായ വില്ക്കാന് തുടങ്ങിയത്. മാസങ്ങളുടെ കഠിനാധ്വാനത്തിന് ശേഷം സോഷ്യല് മീഡിയയിലൂടെ അദ്ദേഹത്തിന്റെ 'ചായ്ഗൈ' എന്ന വ്യക്തിത്വം ആളുകള് ഏറ്റെടുത്തു. പണ്ട് കോര്പ്പറേറ്റ് അടിമയായിരുന്നപ്പോള് കൂടുതല് പണമുണ്ടായിരുന്നെങ്കിലും ഇന്നുള്ള സ്വാതന്ത്ര്യവും സന്തോഷവുമാണ് തനിക്ക് ഏറ്റവും വലുതെന്ന് അദ്ദേഹം ഓര്ക്കുന്നു.
