ഇന്ത്യ സന്ദര്ശിക്കാനെത്തിയ ഒരു ഓസ്ട്രേലിയന് വിനോദസഞ്ചാരിക്ക് കൊല്ക്കത്തയിലെ തെരുവില് വെച്ച് നേരിടേണ്ടി വന്ന അസ്വസ്ഥതയുണ്ടാക്കുന്ന അനുഭവത്തിന്റെ ദൃശ്യങ്ങളാണ് ഇപ്പോള് സോഷ്യല് മീഡിയയില് കടുത്ത ചര്ച്ചകള്ക്ക് വഴിവെച്ചിരിക്കുന്നത്. 'മാര്ക്കോ റോംസ്' എന്ന ഇന്സ്റ്റാഗ്രാം അക്കൗണ്ടിലൂടെ പങ്കുവെക്കപ്പെട്ട വീഡിയോയില്, ഒരു യുവാവ് വിദേശിയായ ഈ സഞ്ചാരിയോട് നിരന്തരം ചുംബനം ആവശ്യപ്പെടുന്നതും വിസമ്മതിച്ചിട്ടും കൈകളില് ബലമായി പിടിക്കാന് ശ്രമിക്കുന്നതും കാണാം. കൊല്ക്കത്തയിലെ ഒരു സാധാരണ തെരുവിലൂടെ നടന്നുപോവുകയായിരുന്ന മാര്ക്കോയ്ക്ക് നേരെയാണ് ഈ വിചിത്രമായ അതിക്രമം ഉണ്ടായത്.
റോഡരികില് നിര്ത്തിയിട്ടിരുന്ന റിക്ഷയില് മറ്റൊരു വ്യക്തിക്കൊപ്പം ഇരിക്കുകയായിരുന്ന യുവാവാണ് മാര്ക്കോയ്ക്ക് അരികിലേക്ക് എത്തിയത്. സ്വന്തം കവിളില് വിരല് ചൂണ്ടിക്കൊണ്ട് 'എനിക്ക് ഇവിടെ ഒരു ഉമ്മ താ, ഉമ്മ താ' എന്ന് ഇയാള് ആവര്ത്തിച്ച് ആവശ്യപ്പെടുകയായിരുന്നു. പെട്ടെന്നുണ്ടായ ഈ പെരുമാറ്റത്തില് അസ്വസ്ഥനായ ഓസ്ട്രേലിയന് സഞ്ചാരി, 'നിന്നെ ചുംബിക്കാനോ? ഇല്ല, എന്നോട് ക്ഷമിക്കൂ, ഞാന് ഒരു സ്ട്രെയിറ്റ് വ്യക്തിയാണ്' എന്ന് പറഞ്ഞ് സാഹചര്യത്തെ ശാന്തമാക്കാന് ശ്രമിച്ചു. എന്നാല് ഇതുകൊണ്ടൊന്നും പിന്മാറാന് തയ്യാറാകാതിരുന്ന യുവാവ്, വിദേശി അവിടെനിന്ന് നടന്നു നീങ്ങാന് ശ്രമിച്ചപ്പോള് കൈകളില് ബലമായി പിടിച്ചുവെക്കുകയായിരുന്നു.
ഈ ശല്യപ്പെടുത്തലില് നിന്ന് എങ്ങനെയോ രക്ഷപ്പെട്ട് മാറിയ സഞ്ചാരി, 'വൗ! എന്നേക്കാള് പ്രായം കുറഞ്ഞ ആളുകളില് നിന്നാണ് എനിക്ക് ഈ അതിക്രമം നേരിടേണ്ടി വരുന്നത്' എന്ന് വീഡിയോയില് സ്വയം പറയുന്നതും കേള്ക്കാം. കൂടാതെ, 'എന്തുകൊണ്ടാണ് ഇന്ത്യന് യുവാക്കള് എപ്പോഴും തങ്ങളെ ചുംബിക്കാന് ആവശ്യപ്പെടുന്നത്?' എന്ന ഒരു ചോദ്യവും അദ്ദേഹം വീഡിയോയ്ക്ക് മുകളില് പങ്കുവെച്ചിട്ടുണ്ട്. ഇതിനോടകം എട്ടു ലക്ഷത്തിലധികം ആളുകള് കണ്ടുകഴിഞ്ഞ ഈ വീഡിയോയ്ക്ക് താഴെ കൊല്ക്കത്ത പൊലീസിനെ ടാഗ് ചെയ്തുകൊണ്ട്, കുറ്റക്കാര്ക്കെതിരെ കര്ശന നടപടി സ്വീകരിക്കണമെന്ന് നിരവധിപ്പേര് ആവശ്യപ്പെടുന്നുണ്ട്.
എന്നാല് ഈ വീഡിയോ സോഷ്യല് മീഡിയയില് വലിയ രീതിയിലുള്ള ഒരു ചേരിതിരിവിനും കാരണമായിട്ടുണ്ട്. ഒരു വിഭാഗം ആളുകള് യുവാവിന്റെ മോശം പെരുമാറ്റത്തെയും സഞ്ചാരിയുടെ സുരക്ഷയെയും ഓര്ത്ത് ആശങ്കപ്പെടുമ്പോള്, മറ്റൊരു വിഭാഗം ആളുകള് വിദേശ സഞ്ചാരിയുടെ ലക്ഷ്യത്തെയാണ് ചോദ്യം ചെയ്യുന്നത്. ഇന്ത്യയിലെ നല്ല വിനോദസഞ്ചാര കേന്ദ്രങ്ങളില് പോകുന്നതിന് പകരം, കൂടുതല് വ്യൂസും ലൈക്കുകളും ലഭിക്കാന് വേണ്ടി വിദേശികള് മനഃപൂര്വ്വം ഇത്തരം മോശം ചേരിപ്രദേശങ്ങള് തിരഞ്ഞെടുക്കുകയാണെന്നും, അതിനുശേഷം രാജ്യത്തെ മുഴുവനായി കുറ്റപ്പെടുത്തുകയാണെന്നുമാണ് ഇവരുടെ ആക്ഷേപം.
