ഒപ്പോ റെനോ 16 (Oppo Reno 16) സീരീസ് അടുത്ത മാസം ചില ആഗോള വിപണികളില് അവതരിപ്പിക്കാന് നിശ്ചയിച്ചിരിക്കുകയാണ്. ഈ ഫോണുകള് ഇന്ത്യയില് എന്ന് എത്തുമെന്നതിനെക്കുറിച്ച് കമ്പനി ഇതുവരെ ഔദ്യോഗികമായി ഒന്നും വ്യക്തമാക്കിയിട്ടില്ലെങ്കിലും, പുതിയൊരു റിപ്പോര്ട്ട് അനുസരിച്ച് 'ഒപ്പോ റെനോ 16c' (Oppo Reno 16c) എന്നൊരു പുതിയ മോഡല് കൂടി ഇന്ത്യന് നിരയില് ഉള്പ്പെട്ടേക്കാം. റെനോ 16 സീരീസിലെ വില കുറഞ്ഞ ഒരു പതിപ്പായിരിക്കും ഇത്. ആഗോള വിപണിയില് ഇറങ്ങുമെന്ന് കരുതപ്പെടുന്ന റെനോ 16F (Reno 16F) മോഡലിന്റെ പല സവിശേഷതകളും ഈ ഫോണിനും ഉണ്ടായേക്കുമെന്നാണ് സൂചന.
ഒപ്പോ റെനോ 16c ഇന്ത്യ ലോഞ്ച്
പ്രമുഖ ലീക്ക് റിപ്പോര്ട്ടറായ (tipster) യോഗേഷ് ബ്രാര് നല്കിയ വിവരങ്ങളുടെ അടിസ്ഥാനത്തിന്ല് '91മൊബൈല്സ്' റിപ്പോര്ട്ട് ചെയ്യുന്നത്, ഒപ്പോ റെനോ 16, റെനോ 16c എന്നീ സ്മാര്ട്ട്ഫോണുകള് ഇന്ത്യയില് അവതരിപ്പിക്കാന് ഒപ്പോ പദ്ധതിയിടുന്നുണ്ടെന്നാണ്. റെനോ 16 ഇതിനകം തന്നെ പല സര്ട്ടിഫിക്കേഷന്, ബെഞ്ച്മാര്ക്ക് വെബ്സൈറ്റുകളില് പ്രത്യക്ഷപ്പെട്ടിട്ടുണ്ടെങ്കിലും, റെനോ 16c ഈ സീരീസിലെ തികച്ചും പുതിയൊരു അറിവാണ്.
കഴിഞ്ഞ റെനോ 15 സീരീസിന്റെ അതേ തന്ത്രം തന്നെയായിരിക്കും കമ്പനി ഈ ഫോണിനും പയറ്റുക എന്നാണ് റിപ്പോര്ട്ടുകള്. മുന്പ്, റെനോ 15 സീരീസിലെ ഏറ്റവും വില കുറഞ്ഞ മോഡലായി 'ഒപ്പോ റെനോ 15c' ജനുവരിയില് ഇന്ത്യയില് അവതരിപ്പിച്ചിരുന്നു. വില നിയന്ത്രിച്ചു നിര്ത്തുന്നതിനായി ചില പ്രധാന സവിശേഷതകളില് വിട്ടുവീഴ്ച ചെയ്തുകൊണ്ടായിരുന്നുവെങ്കിലും വലിയൊരു ഡിസ്പ്ലേ ഈ ഫോണ് നല്കിയിരുന്നു. അന്ന് ഇതിന്റെ 8GB + 256GB പതിപ്പിന് 34,999 രൂപയും, 12GB + 256GB പതിപ്പിന് 37,999 രൂപയുമായിരുന്നു വില.
ഇന്തോനേഷ്യയിലും മലേഷ്യയിലും അവതരിപ്പിക്കാന് പോകുന്ന റെനോ 16F-ന്റെ പല സവിശേഷതകളും റെനോ 16c-ക്കും ഉണ്ടായേക്കാം. ഇത് ശരിയാണെങ്കില്, ഈ ഫോണിന് 6.57 ഇഞ്ച് ഫുള് HD+ 120Hz അമോലെഡ് (AMOLED) സ്ക്രീന് ഉണ്ടായിരിക്കും. ഇത് റെനോ 16-ന്റെ അടിസ്ഥാന മോഡലിനേക്കാള് വലുതാണ് (ചൈനയില് ഇറങ്ങിയ റെനോ 16-ന് 6.32 ഇഞ്ച് 1.5K അമോലെഡ് പാനല് ആണുള്ളത്).
മീഡിയടെക് ഡൈമന്സിറ്റി 7300 (MediaTek Dimensity 7300) പ്രൊസസറായിരിക്കും ഈ ഫോണിന് കരുത്ത് പകരുക. ഇതിനൊപ്പം LPDDR5x റാമും യുഎഫ്എസ് 3.1 (UFS 3.1) സ്റ്റോറേജും ഉണ്ടായിരിക്കും. ക്യാമറകളുടെ കാര്യത്തിലേക്ക് വന്നാല്, പിന്നില് ട്രിപ്പിള് ക്യാമറ സെറ്റപ്പാണ് പ്രതീക്ഷിക്കുന്നത്. ഒപ്റ്റിക്കല് ഇമേജ് സ്റ്റെബിലൈസേഷനോട് (OIS) കൂടിയ 50 മെഗാപിക്സല് പ്രധാന ക്യാമറ, 3.5x ഒപ്റ്റിക്കല് സൂമുള്ള 50 മെഗാപിക്സല് ടെലിഫോട്ടോ ക്യാമറ, 8 മെഗാപിക്സല് അള്ട്രാ വൈഡ് ആംഗിള് ലെന്സ് എന്നിവ ഇതിലുണ്ടാകും.
സെല്ഫികള്ക്കും വീഡിയോ കോളുകള്ക്കുമായി മുന്നില് 50 മെഗാപിക്സല് ക്യാമറയും നല്കിയേക്കും. 45W വയര്ഡ് ഫാസ്റ്റ് ചാര്ജിംഗ് പിന്തുണയുള്ള 6,500mAh ന്റെ കരുത്തുറ്റ ബാറ്ററിയായിരിക്കും ഒപ്പോ റെനോ 16c-യില് ഉണ്ടാവുകയെന്നാണ് റിപ്പോര്ട്ട്. പ്ലാസ്റ്റിക് ഫ്രെയിം, സ്റ്റീരിയോ സ്പീക്കറുകള്, IP69 റേറ്റിംഗോട് കൂടിയ സുരക്ഷ, എന്എഫ്സി (NFC) പിന്തുണ എന്നിവയും ഈ ഹാന്ഡ്സെറ്റിന്റെ മറ്റ് സവിശേഷതകളായിരിക്കാം.
