മലയാളത്തിന്റെ മഹാനടൻ മോഹൻലാലിനൊപ്പമുള്ള ചിത്രം പങ്കുവെച്ച് നടൻ അപ്പാനി ശരത് കുറിച്ച വാക്കുകളാണ് ഇപ്പോൾ സോഷ്യൽ മീഡിയയിൽ ശ്രദ്ധനേടുന്നത്. മോഹൻലാൽ എന്ന മഹാനടന്റെ യുഗത്തിൽ ജീവിക്കാൻ കഴിഞ്ഞത് ഒരു വലിയ ഭാഗ്യമാണെന്നാണ് താരം പറയുന്നത്.
"എന്റെ ലാലേട്ടാ.. നമ്മൾ പല കാര്യങ്ങൾ കൊണ്ടും ഭാഗ്യം ചെയ്തവരാണ്... സച്ചിന്റെ ബാറ്റിംഗ് ലൈവ് കാണാൻ കഴിഞ്ഞവർ, എ.ആർ. റഹ്മാന്റെ മാസ്റ്റർപീസുകൾ കാസറ്റിൽ കേൾക്കാൻ കഴിഞ്ഞവർ, മെസ്സിയുടെയും റൊണാൾഡോയുടെയും മാജിക് നിമിഷങ്ങൾ എണ്ണിയിരുന്നവർ... മോഹൻലാൽ യുഗത്തിൽ ജീവിക്കാൻ കഴിഞ്ഞവർ.
പലവട്ടം കണ്ടിട്ടുണ്ടെങ്കിലും, ഒരുമിച്ച് അഭിനയിച്ചിട്ടുണ്ടെങ്കിലും, നേരിൽ കാണുന്ന ഓരോ നിമിഷത്തിലും ഉള്ളം കൈ വിറക്കാൻ തുടങ്ങും… ശ്വാസം മൂക്കിൻതുമ്പിൽ വന്ന് തങ്ങിനിൽക്കും…മുന്നിൽ നിൽക്കുന്നത് തിരശീലകളെ തീപിടിപ്പിച്ച ഒരു പ്രതിഭയാണ്… ഇരട്ടിക്കും അതിനിരട്ടിക്കും കാശ് കൊടുത്ത് ടിക്കറ്റ് എടുക്കാൻ എന്നിൽ ആവേശം നിറച്ച പ്രതിഭാസമാണ്… മലയാളത്തിന്റെ മഹാനടനാണ്..അപ്പാനി ശരത് കുറിച്ചു.
തന്നോട് കാണിക്കുന്ന സ്നേഹത്തിനും ചേർത്തുപിടിക്കലുകൾക്കും "എന്താ മോനെ?" എന്ന സുഖാന്വേഷണങ്ങൾക്കും ലാലേട്ടന് നന്ദി പറഞ്ഞുകൊണ്ടാണ് അപ്പാനി ശരത് തന്റെ കുറിപ്പ് അവസാനിപ്പിക്കുന്നത്. മലയാളത്തിന്റെ സ്വന്തം 'ഏട്ടനായി' എന്നും തുടരുന്നതിന് നന്ദി അർപ്പിച്ചുകൊണ്ടുള്ള താരത്തിന്റെ പോസ്റ്റ് ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.
ലാലേട്ടനെ കെട്ടിപ്പിടിച്ചു നിൽക്കുന്ന ചിത്രങ്ങളും താരം സോഷ്യൽ മീഡിയയിൽ പങ്കുവെച്ചിട്ടുണ്ട്. മുൻപ്, മോഹൻലാൽ കേന്ദ്രകഥാപാത്രമായെത്തിയ 'വെളിപാടിന്റെ പുസ്തകം' എന്ന ചിത്രത്തിൽ ശരത് ശ്രദ്ധേയമായ ഒരു വേഷം കൈകാര്യം ചെയ്തിരുന്നു. താരത്തിന്റെ ഈ കുറിപ്പും ചിത്രങ്ങളും പുറത്തുവന്നതിന് പിന്നാലെ, ഇരുവർക്കും സ്നേഹം അറിയിച്ചുകൊണ്ട് നിരവധി പേരാണ് പോസ്റ്റിന് താഴെ കമന്റുകളുമായി എത്തുന്നത്.
അതേസമയം, മുരളി ഗോപിയുടെ തിരക്കഥയിൽ ജിയെൻ കൃഷ്ണകുമാർ സംവിധാനം ചെയ്യുന്ന 'അനന്തൻ കാട്' ആണ് അപ്പാനി ശരത്തിന്റെ ഏറ്റവും പുതിയ ചിത്രം. അടുത്തിടെ പുറത്തിറങ്ങിയ താരത്തിന്റെ ക്യാരക്ടർ പോസ്റ്റർ ഏറെ ശ്രദ്ധനേടിയിരുന്നു. ചിത്രം ജൂൺ 25-ന് തിയേറ്ററുകളിലെത്തും.
