മകൾ മൈറ രാംപാലിന് ജന്മദിനാശംസകൾ നേർന്ന് ബോളിവുഡ് താരം അർജുൻ രാംപാൽ പങ്കുവെച്ച കുറിപ്പ് സോഷ്യൽ മീഡിയയിൽ ശ്രദ്ധ നേടുന്നു. മൈറയ്ക്ക് 21 വയസ്സ് തികയുന്ന വേളയിൽ, മകൾക്കൊപ്പമുള്ള സുന്ദരമായ നിമിഷങ്ങൾ കോർത്തിണക്കിയ ഒരു വീഡിയോ പങ്കിട്ടുകൊണ്ടായിരുന്നു താരത്തിന്റെ ഹൃദ്യമായ ആശംസ.
"എന്റെ ഏറ്റവും പ്രിയപ്പെട്ട മൈപൈ, നിനക്ക് ഇന്ന് 21 വയസ്സ് തികയുകയാണ്. ഇത്ര പെട്ടെന്ന് സമയം കടന്നുപോയത് എങ്ങനെയെന്ന് എനിക്ക് ഇപ്പോഴും മനസ്സിലാകുന്നില്ല. എന്റെ ആ കൊച്ചു മിടുക്കി ഇപ്പോൾ ഒരു വലിയ പെൺകുട്ടിയായിരിക്കുന്നു. നിന്നെക്കുറിച്ച് എനിക്ക് ഒരുപാട് അഭിമാനമുണ്ട്. ഇനി നമുക്ക് പതിയെ, മനോഹരമായ ഓർമ്മകൾ സൃഷ്ടിക്കാം. നീ എപ്പോഴും എന്റെ ആ കൊച്ചുകുട്ടി തന്നെയാണ്. ജന്മദിനാശംസകൾ എന്റെ സ്നേഹമേ... ഈ ലോകം എപ്പോഴും നിനക്ക് സൗഭാഗ്യങ്ങൾ സമ്മാനിക്കട്ടെ," അർജുൻ കുറിച്ചു.
ബോളിവുഡ് താരം ചങ്കി പാണ്ഡെ, അർജുന്റെ പങ്കാളി ഗബ്രിയേല ഡെമെട്രിയാഡെസ് തുടങ്ങിയ പ്രമുഖർ വീഡിയോയ്ക്ക് താഴെ മൈറയ്ക്ക് ജന്മദിനാശംസകൾ നേർന്നിട്ടുണ്ട്.
മോഡലും നിര്മാതാവുമായ മെഹർ ജെസിയയുമായുള്ള അർജുൻ രാംപാലിന്റെ ആദ്യ വിവാഹത്തിലെ മകളാണ് മൈറ. മാഹിക എന്നൊരു മകൾ കൂടി ഈ ബന്ധത്തിലുണ്ട്. 20 വർഷത്തെ ദാമ്പത്യത്തിന് ശേഷം 2018-ലാണ് അർജുനും മെഹറും വേർപിരിഞ്ഞത്. തുടർന്ന് 2018 മുതൽ മോഡൽ ഗബ്രിയേല ഡെമെട്രിയാഡെസുമായി പ്രണയത്തിലായ അർജുൻ, കഴിഞ്ഞ ഡിസംബറിൽ നടി റിയ ചക്രവർത്തിയുടെ പോഡ്കാസ്റ്റിലൂടെ തങ്ങളുടെ വിവാഹനിശ്ചയം കഴിഞ്ഞ കാര്യം സ്ഥിരീകരിച്ചിരുന്നു. അറിക്, അരിവ് എന്നീ രണ്ട് ആൺമക്കളാണ് ഈ ദമ്പതികൾക്കുള്ളത്.
ആദിത്യ ധർ സംവിധാനം ചെയ്ത്, രൺവീർ സിംഗ് നായകനായി എത്തിയ 'ധുരന്ധർ' എന്ന ചിത്രത്തിലാണ് അർജുൻ രാംപാൽ ഒടുവിൽ പ്രത്യക്ഷപ്പെട്ടത്. ചിത്രത്തിലെ മേജർ ഇഖ്ബാൽ എന്ന അദ്ദേഹത്തിന്റെ കഥാപാത്രം ഏറെ ശ്രദ്ധിക്കപ്പെട്ടിരുന്നു. ഈ ചിത്രത്തിന്റെ രണ്ടാം ഭാഗമായ 'ധുരന്ധർ: ദി റിവഞ്ച്' എന്ന സിനിമയിലും താരം അഭിനയിച്ചിരുന്നു.
