ബോളിവുഡ് താരം അര്ജുന് കപൂറിന്റെ ജന്മദിനത്തില് ഹൃദയസ്പര്ശിയായ കുറിപ്പ് പങ്കുവെച്ച് സഹോദരി അന്ഷുല കപൂര്. അര്ജുനെ തന്റെ സുഹൃത്ത്, സംരക്ഷകന്, സുരക്ഷിത സ്ഥാനം എന്നാണ് അന്ഷുല വിശേഷിപ്പിച്ചത്. നിനക്ക് മുമ്പുളള ഒരു ലോകം തനിക്ക് ഓര്മ്മയില്ലെന്നും എപ്പോഴും കൂടെ നില്ക്കുന്നതിന് നന്ദി പറയുന്നുവെന്നും അന്ഷുല കുറിപ്പില് പറയുന്നു. അര്ജുനൊപ്പമുളള കുട്ടിക്കാലം മുതലുളള ചിത്രങ്ങള് ഉള്പ്പെടുത്തിക്കൊണ്ടുളള മനോഹരമായൊരു വീഡിയോയും അന്ഷുല പങ്കുവെച്ചിട്ടുണ്ട്.
"എന്റെ ആദ്യത്തെ സുഹൃത്തിനും, എന്റെ ആദ്യത്തെ കൂട്ടുകാരനും അതിലുപരി എന്റെ ആദ്യത്തെ സംരക്ഷകനും, എന്റെ ആദ്യത്തെ സുരക്ഷിത സ്ഥാനവും, എനിക്കായി ഏറ്റവും ഉച്ചത്തില് ആര്ത്തുവിളിക്കുന്ന ആളിന് ജന്മദിനാശംസകള്. നിനക്ക് മുമ്പുളള ഒരു ലോകം എനിക്ക് ഓര്മ്മയില്ല, സത്യസന്ധമായി പറഞ്ഞാല് നീയില്ലാത്ത ഒരു ലോകം എനിക്ക് ഊഹിക്കാനും കഴിയില്ല. എന്റെ ഓരോ പതിപ്പിനും നിന്റെ അനിയത്തിയായിരിക്കാന് ഭാഗ്യം ലഭിച്ചിട്ടുണ്ട്. അത് മറ്റൊരു രീതിയിലാകാന് ഞാന് ഒരിക്കലും ആഗ്രഹിക്കുന്നില്ല.
ഈ വര്ഷം നിനക്കായുളള എന്റെ ആഗ്രഹം ലളിതമാണ്. നീ സ്നേഹിക്കുന്ന ആളുകളോട് നീ എപ്പോഴും കാണിച്ച അത്രയും ദയ ജീവിതം നിന്നോടും കാണിക്കട്ടെ. നിന്റെ ഹൃദയത്തിന് കൂടുതല് ഭാരം കുറയട്ടെ, നിന്റെ സ്വപ്നങ്ങള് കൂടുതല് അടുത്താകട്ടെ, നിന്റെ പുഞ്ചിരി കൂടുതല് എളുപ്പത്തില് വരട്ടെ, നീ എത്രമാത്രം ആഴത്തില് സ്നേഹിക്കപ്പെടുന്നുണ്ടെന്ന് നീ ഒരിക്കലും മറക്കാതിരിക്കട്ടെ. എപ്പോഴും എന്റെ കൂടെ നിന്നതിനും, നീ ഒരുപക്ഷേ ഒരിക്കലും തിരിച്ചറിയാത്ത ദശലക്ഷക്കണക്കിന് വഴികളിലൂടെ ജീവിതത്തെ കൂടുതല് ശബ്ദായമാനവും തമാശയും സുരക്ഷിതവും പൂര്ണ്ണവുമാക്കിയതിനും നന്ദി. ലവ് യു ഭായ്, എപ്പോഴും" എന്നായിരുന്നു അന്ഷുല കുറിച്ചത്. സഹോദരങ്ങള് തമ്മിലുള്ള ഈ ആഴമേറിയ സ്നേഹത്തെ പ്രശംസിച്ച് നിരവധി ആരാധകരാണ് രംഗത്തെത്തിയത്.
പോസ്റ്റിനു താഴെ കമന്റുമായി അര്ജുനും പിതാവ് ബോണി കപൂറും എത്തിയിട്ടുണ്ട്. "അനന്തതയ്ക്കും അപ്പുറം ഞാന് നിന്നെ സ്നേഹിക്കുന്നു" എന്നായിരുന്നു അര്ജുന് കമന്റായി കുറിച്ചത്. "നീ എന്റെ മകനായി ജനിച്ചതില് ഞാന് അനുഗ്രഹിക്കപ്പെട്ടവനാണ്. നീ സ്വയം മുന്നോട്ട് കൊണ്ടുപോകുന്ന രീതിയില് എപ്പോഴും വിനയമുളളവനായും പോസിറ്റീവായും നിലകൊളളുന്നതില് എനിക്ക് വലിയ അഭിമാനമുണ്ട്. വരാനിരിക്കുന്ന ഒരു മികച്ച വര്ഷം ആശംസിക്കുന്നു, ഒരുപാട് സ്നേഹം മോനേ" എന്നായിരുന്നു ബോണി കപൂറിന്റെ വാക്കുകള്.
അതേസമയം അന്ഷുല കപൂറിന്റെ വിവാഹാത്തിനായുളള ഒരുക്കത്തിലാണ് കുടുംബം. വിവാഹത്തിന് മുന്നോടിയായി നടന്ന ചടങ്ങുകളുടെ ചിത്രങ്ങള് കഴിഞ്ഞദിവസം അര്ജുന് ഇന്സ്റ്റഗ്രാമില് പങ്കുവെച്ചിരുന്നു. "അന്ഷ് നമ്മള് തുടങ്ങുന്നതേയുളളൂ, ആഘോഷങ്ങള്ക്കായി കാത്തിരിക്കാനാവില്ല" എന്നായിരുന്നു ചിത്രങ്ങള് പങ്കുവെച്ചുകൊണ്ട് താരം കുറിച്ചത്.
മുദസ്സര് അസീസ് സംവിധാനം ചെയ്ത 'മേരെ ഹസ്ബന്ഡ് കി ബീവി' എന്ന റൊമാന്റിക് കോമഡി ചിത്രത്തിലാണ് അര്ജുന് കപൂര് അവസാനമായി അഭിനയിച്ചത്. രാകുല് പ്രീത് സിംഗ്, ഭൂമി പെഡ്നേക്കര് എന്നിവരടങ്ങുന്ന വന് താരനിരയായിരുന്നു ചിത്രത്തില് അണിനിരന്നത്.
