പൂനെ: വ്യവസായി കേതന് അഗര്വാളിന്റെ കൊലപാതകത്തില് മുഖ്യപ്രതിയായ സിയ ഗോയലിനെതിരെ നിയമപരമായ വീഴ്ചകളില്ലാത്ത ശക്തമായ കുറ്റപത്രം സമര്പ്പിക്കാന് പൂനെ റൂറല്പോലീസിന്റെ ശ്രമം. സമാനരീതിയില് വിവാദമായ മേഘാലയ ഹണിമൂണ് കൊലക്കേസ് പ്രതി സോനം രഘുവംശിക്ക് ജാമ്യം ലഭിച്ച പശ്ചാത്തലത്തില് പഴുതുകള് എല്ലാമടച്ചുള്ള കുറ്റപത്രത്തിനാണ് പോലീസ് ഒരുങ്ങുന്നത്.
നിലവില് ഈ കേസ് പൂര്ണ്ണമായും സാഹചര്യത്തെളിവുകളെ ആശ്രയിച്ചുള്ളതാണ്. അതിനാല് പ്രതികളുടെ കുറ്റം സംശയരഹിതമായി തെളിയിക്കാന് എല്ലാ തെളിവുകളും പരസ്പരം പൊരുത്തപ്പെടേണ്ടതുണ്ടെന്ന് അന്വേഷണ ഉദ്യോഗസ്ഥര് സമ്മതിക്കുന്നു. ഇന്ത്യന് നിയമപ്രകാരം പോളിഗ്രാഫ് ഫലങ്ങള് കോടതിയില് നേരിട്ടുള്ള തെളിവായി സ്വീകാര്യമല്ല. എങ്കിലും, ഈ പരിശോധന പുതിയ അന്വേഷണ സൂചനകള് നല്കാന് സഹായിക്കുമെന്ന് പോലീസ് വിശ്വസിക്കുന്നു.
ചോദ്യം ചെയ്യലിലൂടെ സിയ അറിയാതെ വെളിപ്പെടുത്തുന്ന വിവരങ്ങള് സ്വതന്ത്രമായി കണ്ടെത്താന് പോലീസിന് സാധിക്കും. പോളിഗ്രാഫ് പരിശോധനയിലൂടെ ലഭിക്കുന്ന സൂചനകള് വഴി പിന്നീട് കണ്ടെത്തുന്ന ബ്രൗസര് ഹിസ്റ്ററി, ലൊക്കേഷന് വിവരങ്ങള്, ഡിലീറ്റ് ചെയ്ത സന്ദേശങ്ങള് തുടങ്ങിയ ഡിജിറ്റല് തെളിവുകള് കോടതിയില് നിയമപരമായി നിലനില്ക്കുന്നവയാണ്. എന്നിരുന്നാലും കേതനെ മലമുകളില് നിന്ന് തള്ളി താഴെയിട്ടതിന് ദൃക്സാക്ഷികളോ സിസിടിവി ദൃശ്യങ്ങളോ ഇല്ല എന്നതാണ് പോലീസിന് വലിയ വെല്ലുവിളി ഉയര്ത്തുന്നത്.
ലഭ്യമായ സിസിടിവി ദൃശ്യങ്ങളില് കൂട്ടുപ്രതിയും സിയയുടെ കാമുകനുമായ ചേതന് ചൗധരി ഹൂഡി ധരിച്ച് ആ പ്രദേശത്ത് ഉണ്ടായിരുന്നു എന്ന് മാത്രമേ തെളിയുന്നുള്ളൂ. ഇത് കൊലപാതകം തെളിയിക്കാന് മാത്രം പര്യാപ്തമല്ല. ഡമ്മി ഉപയോഗിച്ച് ക്രൈം സീന് പുനരാവിഷ്കരിച്ചെങ്കിലും അതിന് കോടതിയില് വലിയ തെളിവ് മൂല്യമില്ല. വീഴ്ചയുടെ വേഗതയും കോണും ഡമ്മിയുടെ ഭാരത്തെ ആശ്രയിച്ചിരിക്കുന്നതിനാല് ഇത് കൊലപാതകമാണോ അപകടമാണോ എന്ന് ശാസ്ത്രീയമായി തെളിയിക്കാന് കഴിയില്ല.
അതിനാല്, ഈ കേസിന്റെ ചങ്ങലയിലെ ഒരു കണ്ണി പോലും പ്രതിഭാഗത്തിന് തകര്ക്കാന് കഴിയാത്ത വിധം ശക്തമാക്കാനാണ് പോലീസ് ശ്രമിക്കുന്നത്. മുമ്പ് സമാനരീതിയില് നടന്ന ഭര്ത്താവ് രാജാ രഘുവംശിയെ കൊലപ്പെടുത്തിയ കേസില് പ്രതിയായ സോനം രഘുവംശിക്ക് ജാമ്യം ലഭിക്കാന് കാരണം പോലീസിന്റെ നടപടിക്രമങ്ങളിലെ വീഴ്ചകളായിരുന്നു. ഭാരതീയ ന്യായ സംഹിത പ്രകാരം കൃത്യമായ നടപടികള് പാലിക്കേണ്ടതിന്റെ പ്രാധാന്യം ഈ കേസ് പോലീസിനെ ഓര്മ്മിപ്പിക്കുന്നു.
സോനത്തെ അറസ്റ്റ് ചെയ്യുന്ന സമയത്ത് അതിന്റെ കൃത്യമായ കാരണങ്ങള് ബോധ്യപ്പെടുത്താന് പോലീസിന് കഴിഞ്ഞില്ല. കൊലപാതക കുറ്റത്തിനുള്ള വകുപ്പ് 103(1)ന് പകരം അന്യന്റെ സ്വത്ത് അപഹരിച്ചതുമായി ബന്ധപ്പെട്ട വകുപ്പ് 403(1) ആണ് അറസ്റ്റ് മെമ്മോയില് രേഖപ്പെടുത്തിയിരുന്നത്. ഈ സാങ്കേതിക പിഴവുകള് പ്രതിക്ക് അനുകൂലമായി മാറുകയും ഹൈക്കോടതി ജാമ്യം അനുവദിക്കുകയുമായിരുന്നു.
വിവാഹത്തില് നിന്ന് പിന്മാറാന് സിയയും ചേതനും ചേര്ന്ന് കേതനെ ഇല്ലാതാക്കാന് ഗൂഢാലോചന നടത്തി എന്നാണ് പ്രൊസിക്യൂഷന്റെ പ്രധാന വാദം. ഇതിനായി പ്രതികളുടെ ഇന്റര്നെറ്റ് സെര്ച്ച് ഹിസ്റ്ററി, മൊബൈല് ഫോണ് ഡാറ്റ, മറ്റ് ഇലക്ട്രോണിക് തെളിവുകള് എന്നിവ ശേഖരിച്ച് ശക്തമായ ഡിജിറ്റല് അടിത്തറയോടെ കുറ്റപത്രം സമര്പ്പിക്കാനാണ് പൂനെ റൂറല് പോലീസ് ഇപ്പോള് ഒരുങ്ങുന്നത്.
