തന്റെ ബിസിനസ് സംരംഭമായ 'പൂവ്' അവസാനിപ്പിക്കുന്നുവെന്ന് നര്ത്തകിയും നടിയും ഇന്ഫ്ളുവന്സറുമായ സൗഭാഗ്യ വെങ്കിടേഷ്. സോഷ്യല് മീഡിയയില് പങ്കുവെച്ച കുറിപ്പിലൂടെയാണ് താരം ഇക്കാര്യം വ്യക്തമാക്കിയത്.
അങ്ങേയറ്റം വേദനയോടെയും വിങ്ങുന്ന ഹൃദയത്തോടെയുമാണ് താന് ഈ തീരുമാനം എടുത്തതെന്ന് സൗഭാഗ്യ പറയുന്നു. ബിസിനസ് പങ്കാളിയില് നിന്നും നേരിടേണ്ടിവന്ന ചതിയാണ് ബ്രാന്ഡ് പൂട്ടിപ്പോകാന് കാരണമായതെന്നും താരം തുറന്നുപറഞ്ഞു. സൗഭാഗ്യ പങ്കുവെച്ച കുറിപ്പിലേക്ക്:
"വിഷമത്തോടെ വിടവാങ്ങുന്നു.. പൂവിനെക്കുറിച്ച് അന്വേഷിച്ചുകൊണ്ടിരിക്കുന്ന എല്ലാവര്ക്കുമായി.. തികച്ചും വിങ്ങുന്ന ഹൃദയത്തോടെയാണ് ഈ ബ്രാന്ഡ് അവസാനിപ്പിക്കാന് ഞാന് തീരുമാനിച്ചത്.
ഇത് എന്റെ സ്വപ്നങ്ങളിലുള്ള വിശ്വാസം നഷ്ടപ്പെട്ടതുകൊണ്ടല്ല, നിങ്ങളുടെയൊന്നും പിന്തുണ കുറവുകൊണ്ടുമല്ല. മറിച്ച്, വഞ്ചനയില് കലാശിച്ച ഒരു ബിസിനസ് പങ്കാളിത്തമാണ് ഇതിന് കാരണം. ഞാന് ഒരാളെ അത്രയധികം വിശ്വസിച്ചു, എന്നാല് ആ വിശ്വാസം പൂര്ണമായും തകര്ക്കപ്പെട്ടു. ഒരിക്കലും നേരിടേണ്ടി വരുമെന്ന് ഞാന് കരുതാത്ത തീരുമാനങ്ങളുടെ ആഘാതങ്ങളാണ് ഒടുവില് എനിക്ക് അനുഭവിക്കേണ്ടി വന്നത്.
ഒരു ബ്രാന്ഡ് കെട്ടിപ്പടുക്കുന്നതിന് സമയവും സ്നേഹവും പണവും, ഒപ്പം ഒരുപാട് ഉറക്കമില്ലാത്ത രാത്രികളും ആവശ്യമാണ്. കൂടെയുള്ളയാള് വാക്ക് പാലിക്കാത്തത് കൊണ്ട് മാത്രം ഒരു സംരംഭം ഇങ്ങനെ അവസാനിക്കുന്നത് കാണുന്നത് ഹൃദയഭേദകമാണ്.
ആദ്യദിവസം മുതല് പൂവിനെ പിന്തുണച്ച എല്ലാവരോടും എനിക്കൊരു വിശദീകരണം നല്കാന് കടമയുള്ളതുകൊണ്ടാണ് ഞാന് ഇത് പങ്കുവെയ്ക്കുന്നത്. ബിസിനസ്സിലെ ഏറ്റവും കഠിനമായ പാഠം എന്തെന്നാല്, നമ്മള് നല്കുന്ന അത്രയും വില മറ്റുള്ളവര് സത്യസന്ധതയ്ക്കോ മര്യാദയ്ക്കോ വിശ്വസ്തതയ്ക്കോ നല്കണമെന്നില്ല എന്ന് തിരിച്ചറിയുന്നതാണ്.
എന്റെ സമാധാനം കളഞ്ഞുകൊണ്ട് മുന്നോട്ട് പോകുന്നതിനേക്കാള് നല്ലത് ഈ അധ്യായം ഇവിടെ അവസാനിപ്പിക്കുന്നതാണെന്ന് ഞാന് കരുതുന്നു. പൂവിനെ വിശ്വസിച്ച എല്ലാവര്ക്കും നന്ദി. നിങ്ങളുടെ സ്നേഹവും പ്രോത്സാഹനവും എനിക്ക് എത്രത്തോളം വലുതായിരുന്നു എന്ന് പറഞ്ഞറിയിക്കാന് കഴിയില്ല.
ഒരു സംരംഭക എന്ന നിലയില് ഇത് എന്റെ അവസാനമല്ല. ഇതൊരു അധ്യായത്തിന്റെ അവസാനം മാത്രമാണ്. കൂടുതല് കരുത്തോടെ, വിവേകത്തോടെ, ശരിയായ അടിത്തറയോടെ ഞാന് വീണ്ടും തിരിച്ചുവരും." നിരവധി ആരാധകരാണ് സൗഭാഗ്യയ്ക്ക് പിന്തുണയുമായി എത്തുന്നത്.
