പെരുമ്പാവൂര് : ഏഷ്യയുടെ പ്ലൈവുഡ് തലസ്ഥാനമായ പെരുമ്പാവൂരിനെ ലഹരി മാഫിയയുടെ പിടിയില് നിന്ന് മോചിപ്പിക്കാന് ആരംഭിച്ച 'ഓപ്പറേഷന് തൂഫാന്: ദി നാര്ക്കോ ഹണ്ട്' രണ്ടാംഘട്ടത്തിലേക്ക്. പ്രവര്ത്തനം വ്യാപിപ്പിക്കുന്നതിന്റെ ഭാഗമായി സംസ്ഥാന പോലീസ് മേധാവി നേരിട്ടു നേതൃത്വം നല്കുന്ന പ്രത്യേക ടാസ്ക് ഫോഴ്സ് രൂപീകരിക്കുമെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല അറിയിച്ചു. പെരുമ്പാവൂരില് 'തൂഫാന് ജാഗരണ്' പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ശക്തമായ മഴ അവഗണിച്ച് ആയിരക്കണക്കിന് വിദ്യാര്ഥികളും പൊതുജനങ്ങളും പരിപാടിയില് അണിനിരന്നത് ലഹരിക്കെതിരായ ജനകീയ മുന്നേറ്റത്തിന് തെളിവായി.
ലഹരി വ്യാപനം തടയുന്നതിനൊപ്പം അടിമകളായവരെ സാധാരണ ജീവിതത്തിലേക്ക് മടക്കിക്കൊണ്ടുവരാന് തൂഫാന് കെയര് പദ്ധതിക്കും തുടക്കമായിട്ടുണ്ട്. നിലവില് 70 പേരാണ് വിവിധ ആശുപത്രികളില് ചികിത്സയിലുള്ളത്. അങ്കമാലി ലിറ്റില് ഫ്ളവര് ആശുപത്രി ഉള്പ്പെടെ 35 പ്രമുഖ ആശുപത്രികള് ഈ ദൗത്യത്തില് പോലീസുമായി സഹകരിക്കുന്നുണ്ട്. പെരുമ്പാവൂരിലെ മുഴുവന് ജനങ്ങളെയും തൂഫാന് വാരിയേഴ്സ് ആയി പ്രഖ്യാപിച്ചതായും മന്ത്രി രമേശ് ചെന്നിത്തല അറിയിച്ചു. ഉച്ചയ്ക്ക് ബോയ്സ് ഹൈസ്കൂള് പരിസരത്ത് മന്ത്രി ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. തുടര്ന്ന് ആരംഭിച്ച ബഹുജന റാലി മുനിസിപ്പല് സ്റ്റേഡിയത്തില് സമാപിച്ചു. ഫാസ് ഓഡിറ്റോറിയത്തില് വ്യാപാര-വ്യവസായ മേഖലയിലെ പ്രതിനിധികളുമായി മുഖാമുഖവും കണ്ടന്തറ ഭായ് കോളനിയില് അതിഥി തൊഴിലാളികളുമായി കൂടിക്കാഴ്ചയും നടന്നു. ലഹരി ഉപയോഗം സാമൂഹിക മാധ്യമങ്ങളിലൂടെ ജനശ്രദ്ധയിലെത്തിച്ച റസല് സി.എ., സഹലബത്ത് എം.എസ്. ഉള്പ്പെടെയുള്ളവര്ക്ക് തൂഫാന് വാരിയര് ബാഡ്ജ് സമ്മാനിച്ചു.
ചടങ്ങില് മനോജ് മൂത്തേടന് എം.എല്.എ. അധ്യക്ഷത വഹിച്ചു. ബെന്നി ബെഹനാന് എം.പി, വി.പി സജീന്ദ്രന് എം.എല്.എ, സംസ്ഥാന പോലീസ് മേധാവി റവാഡ ചന്ദ്രശേഖര് തുടങ്ങിയവര് സംസാരിച്ചു. എന്ഡിപിഎസ് നിയമത്തിലെ അപാകതകള് പരിഹരിക്കാന് പാര്ലമെന്റില് ആവശ്യപ്പെടുമെന്ന് ബെന്നി ബെഹനാന് എം.പി പറഞ്ഞു.
