തിരുവനന്തപുരം: വിഴിഞ്ഞത്തിന്റെ ഓഹരിവില്പ്പനയുമായി ബന്ധപ്പെട്ട കാര്യത്തില് സര്ക്കാര് അദാനിയുടെ സമ്മര്ദ്ദത്തില് വീഴരുതെന്നും സുതാര്യമായി കാര്യങ്ങള് നടത്തണമെന്നും പ്രതിപക്ഷ നേതാവ് പിണറായി വിജയന്. അദാനി ഇനിയും നീക്കത്തില് നിന്നും പിന്മാറിയിട്ടില്ലെന്നും സര്ക്കാരുമായി ഒത്തുകളിക്കുകയാണെന്നും സമ്മര്ദ്ദത്തിന് വഴങ്ങാതിരിക്കാനുള്ള ആര്ജ്ജവം സര്ക്കാര് കാണിക്കണമെന്നും പറഞ്ഞു.
വിഴിഞ്ഞത്തിന്റെ തങ്ങളുടെ ഓഹരി വില്പ്പനയുമായി ബന്ധപ്പെട്ട് ഗുരുതരമായ കരാര് ലംഘനം അദാനി നടത്തിയിട്ടുണ്ട്. കരാറിലെ എല്ലാ മാനദണ്ഡവും അദാനി ലംഘിക്കുകയാണ്. അദാനി സെബിക്ക് നല്കിയ കത്ത് പിന്വലിച്ചിട്ടില്ല. സംസ്ഥാനത്തിന് ഒരു വിലയും കല്പ്പിക്കാതെ നീങ്ങാന് അദാനിക്ക് എവിടെ നിന്നുമാണ് ധൈര്യം കിട്ടിയത്. ഈ വിഷയത്തില് സര്ക്കാരിന്റെ നടപടികളില് ദുരൂഹത നിലനില്ക്കുന്നു. എന്നാല് ഈ വിഷയത്തില് സംസ്ഥാന താല്പ്പര്യങ്ങള് സംരക്ഷിക്കണം. ഹൈക്കമാന്റ് വരെ അദാനിക്കെതിരേ പ്രതികരിച്ചു.
സര്ക്കാര് സര്ക്കാരായി പ്രവര്ത്തിക്കണം മുഖ്യമന്ത്രി അദാനിയുടെ വക്താവാകരുത്. ഇന്ത്യയില് സംസ്ഥാനത്തിന് പങ്കാളിത്തമുള്ള ഒരേയൊരു തുറമുഖം വിഴിഞ്ഞമാണ്. അതിന് അനന്തമായ സാധ്യതകളുണ്ട്. എംഎസ്. സി പോലെയുള്ള കൂടുതല് കമ്പനി വരേണ്ടതുണ്ടെന്നും പിണറായി പറഞ്ഞു. ഓഹരിവില്പ്പനയുമായി ബന്ധപ്പെട്ട ഒരു വിവരവും സര്ക്കാര് കൃത്യമായി വെളിപ്പെടുത്താത്ത സാഹചര്യത്തില് സെബിയ്ക്ക് താന് കത്തയച്ചിരിക്കുകയാണെന്നും കരാറിന്റെ വിവരങ്ങള് അതുവഴി പുറത്തുവിടുമെന്നും പറഞ്ഞു.
ഓഹരിവില്പ്പനയുമായി ബന്ധപ്പെട്ട് അദാനി സെബിക്ക് നിയമപരമായ കത്ത് നല്കുകയും അവര് അനുമതിയും നല്കിയിരിക്കുകയാണ്. അതുകൊണ്ടാണ് അനുമതി നല്കിയ ഏജന്സി എന്ന നിലയില് സെബിയ്ക്ക് കത്ത് നല്കിയിരിക്കുന്നത്. സെബി വഴി പൊതുജനങ്ങളെ അറിയിക്കാം എന്ന നിലയിലാണ് പോകുന്നത്. കേരളംവില്പ്പനയ്ക്ക് എന്ന മുദ്രാവാക്യവുമായി പ്രതിഷേധത്തിനൊരുങ്ങുകയാണ് ഇടതുപക്ഷം. പ്രതിപക്ഷം പ്രത്യക്ഷ സമരവും നിയമപരമായ സാധ്യതയും ഇക്കാര്യത്തില് നോക്കുന്നുണ്ട്.
