സൂര്യനേക്കാള് വലിപ്പമുണ്ട് ടിഒഐ-2155ബി എന്ന ആകാശ വസ്തുവിന്. പക്ഷേ, നക്ഷത്രമാണെന്നു പറയാന് കഴില്ല. ഗ്രഹത്തിന്റെ നിര്വചനങ്ങള്ക്കും ആ വസ്തു വഴങ്ങില്ല. ടിഒഐ-2155ബി എന്താണ്? ശാസ്ത്രജ്ഞര് തലപുകച്ചുതുടങ്ങി.
ഭൂമിയില്നിന്ന് ഏകദേശം 1,350 പ്രകാശവര്ഷം അകലെയാണ് ടിഒഐ-2155 എന്ന നക്ഷത്രത്തിന്റെ സ്ഥാനം. അതു സൂര്യനേക്കാള് അല്പം വലുതും ഭാരമേറിയതും ചൂടുള്ളതുമാണ്, ഒരു സാധാരണ നക്ഷത്രമെന്നതില് കവിഞ്ഞുള്ള പ്രത്യേകതകളൊന്നും ആ നക്ഷത്രത്തിനില്ല.
ടിഒഐ-2155 നക്ഷത്രത്തെ വലംവയ്ക്കുന്ന ടിഒഐ-2155ബിയാണു ശാസ്ത്രജ്ഞരെ ആകര്ഷിച്ചത്. പ്രകാശമില്ലാത്ത ആകാശ ഗോളമാണത്. ടിഒഐ-2155നു മുന്നിലൂടെ കടന്നുപോകുമ്പോള് നക്ഷത്രത്തിന്റെ വെളിച്ചത്തിലുണ്ടാകുന്ന ചെറിയ മാറ്റങ്ങള് നിരീക്ഷിച്ചാണു ശാസ്ത്രജ്ഞര് അതിനെക്കുറിച്ച് മനസിലാക്കുന്നത്. ടിഒഐ-2155ബി പൂര്ണമായും നക്ഷത്രമാണോ എന്ന കാര്യത്തില് ശാസ്ത്രജ്ഞര്ക്ക് ഇപ്പോഴും ഉറപ്പില്ല. എങ്കിലും, അത് ആകാശത്ത് ജ്വലിച്ചുനില്ക്കുന്ന ഒരു നക്ഷത്രത്തിനും, ഹൈഡ്രജന് ഫ്യൂഷന് നിരന്തരം നിലനിര്ത്താന് കഴിയാതെ പോയ ഒരു 'പരാജയപ്പെട്ട നക്ഷത്രത്തിനും' ഇടയിലുള്ള കൗതുകകരമായ അവസ്ഥിലാണ് അതെന്നാണു വിലയിരുത്തല്.
ബഹിരാകാശത്തെ വലിയ വാതകക്കൂട്ടങ്ങളാണു നക്ഷത്രങ്ങളായി രൂപപ്പെടുന്നത്. ഒരു വാതകക്കൂട്ടം നക്ഷത്രമായി മാറണമെങ്കില് അത് എത്രത്തോളം വലുതും ഭാരമുള്ളതുമായിരിക്കണം? ഈ ചോദ്യത്തിനുള്ള വ്യക്തമായ മറുപടി ശാസ്ത്രജ്ഞര് കണ്ടെത്തിയിട്ടില്ല. നക്ഷത്രത്തിനുള്ളിലെ ഗുരുത്വാകര്ഷണ മര്ദം ഹൈഡ്രജന് ആറ്റങ്ങളെ കൂട്ടിച്ചേര്ത്ത് ഹീലിയം ആറ്റങ്ങളാക്കി മാറ്റാന് തക്കവണ്ണം വലുതായിരിക്കണം, കൂടാതെ ഇത് ദീര്ഘകാലം ഒരേപോലെ തുടരുകയും വേണം. ഇതാണ് ഒരു നക്ഷത്രത്തിന്റെ അടയാളമായ കടുത്ത ചൂടും വെളിച്ചവും സൃഷ്ടിക്കുന്നത്.
ഒരു വസ്തുവിന് ഇത്രയും മര്ദം ചെലുത്താന് തക്ക വലിപ്പമില്ലെങ്കില്-അല്ലെങ്കില് മറ്റെന്തെങ്കിലും കാരണം കൊണ്ട് ഫ്യൂഷന് പ്രക്രിയ ശരിയായ രീതിയില് ആരംഭിച്ചില്ലെങ്കില്-ആ വാതകക്കൂട്ടം 'ബ്രൗണ് ഡ്വാര്ഫ്' എന്നറിയപ്പെടുന്ന ഒരു തരം 'പരാജയപ്പെട്ട നക്ഷത്രമായി' മാറുന്നു. ഈ വസ്തുക്കള്ക്ക് പ്രാരംഭ ഘട്ടത്തില് നല്ല ചൂടുണ്ടായിരിക്കും, എന്നാല് തുടര്ച്ചയായ ഹൈഡ്രജന് ഫ്യൂഷന് ഇല്ലാത്തതിനാല് അവ ക്രമേണ തണുക്കുകയും മങ്ങിയ ഇന്ഫ്രാറെഡ് വെളിച്ചം പുറപ്പെടുവിക്കുകയും ചെയ്യുന്നു.
ചില വാതകക്കൂട്ടങ്ങള് നക്ഷത്രങ്ങളായി മാറുകയും മറ്റുള്ളവ ബ്രൗണ് ഡ്വാര്ഫുകളായി മാറുകയും ചെയ്യുന്നത് എന്തുകൊണ്ടാണെന്ന് കൂടുതല് അറിയാന്, അസ്ട്രോഫിസിസ്റ്റുകള് ഈ രണ്ട് അവസ്ഥകള്ക്കും ഇടയിലുള്ള മേഖലയിലുള്ള-അതായത് ഏറ്റവും ഭാരമേറിയ ബ്രൗണ് ഡ്വാര്ഫുകളെയും ഏറ്റവും ഭാരം കുറഞ്ഞ നക്ഷത്രങ്ങളെയും-ആണ് തിരയുന്നത്.
അവിടെയാണ് ടിഒഐ-2155ബി ശാസ്ത്രജ്ഞരെ ആകര്ഷിക്കുന്നത്. വ്യാഴത്തിന്റെ പിണ്ഡത്തിന്റെ ഏകദേശം 80.6 മടങ്ങ് ഭാരമുള്ള ഇത്, കൃത്യമായി പറഞ്ഞാല് ആ സിദ്ധാന്തപരമായ അതിര്ത്തിയിലാണുള്ളത്.
ഒരു നക്ഷത്രം രൂപപ്പെടണമെങ്കില് വ്യാഴത്തിന്റെ പിണ്ഡത്തിന്റെ 75-80 മടങ്ങ് വേണമെന്നായിരുന്നു കണക്ക്. എന്നാല്, ടിഒഐ-2155ബി നല്കുന്ന സൂചന ഭാരം മാത്രം പോരാ എന്നാണ്. മറ്റ് ഘടകങ്ങളെയും പരിഗണിക്കണം എന്ന് ശാസ്ത്രജ്ഞര് പറയുന്നു.
ഒരു വസ്തുവിന്റെ പ്രായം, അതിന്റെ രാസഘടന , അന്തരീക്ഷ സവിശേഷതകള് എന്നിവപോലും അതിന് തുടര്ച്ചയായ ഹൈഡ്രജന് ഫ്യൂഷന് നിലനിര്ത്താന് കഴിയുമോ ഇല്ലയോ എന്നതിനെ സ്വാധീനിക്കുന്നു. അതുകൊണ്ടാണ് ബ്രൗണ് ഡ്വാര്ഫുകളും നക്ഷത്രങ്ങളും തമ്മിലുള്ള പിണ്ഡത്തിന്റെ അതിര്ത്തി കൃത്യമായി എവിടെ നിര്ണയിക്കണം എന്ന കാര്യത്തില് ജ്യോതിശാസ്ത്രജ്ഞര് ഇപ്പോഴും ആശയക്കുഴപ്പത്തിലാണ്.
