ദുരന്തങ്ങൾക്കും ഉപദ്രവങ്ങൾക്കും ഇരയായ ഒരു തെരുവുനായയുടെ ഹൃദയസ്പർശിയായ മാറ്റത്തിന്റെ കഥയാണ് ഇപ്പോൾ സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്. സിയെന്ന എന്ന് പേരുള്ള ഈ നായയുടെ ജീവിതം മാറ്റിമറിച്ചത് തായ്ലൻഡ് ആസ്ഥാനമായി പ്രവർത്തിക്കുന്ന 'ഹാപ്പി ഡോഗോ' എന്ന മൃഗസംരക്ഷണ സംഘമാണ്. നയാൽ ഹാർബിസൺ എന്ന വ്യക്തിയുടെ നേതൃത്വത്തിൽ പ്രവർത്തിക്കുന്ന ഈ സംഘം തെരുവിൽ അലയുന്ന നിരവധി നായ്ക്കൾക്ക് താങ്ങും തണലുമായി മാറാറുണ്ട്.
ബ്രീഡിംഗിനായി ഉപയോഗിക്കപ്പെട്ടിരുന്ന സിയെന്ന, അതീവ ഗുരുതരമായ ആരോഗ്യപ്രശ്നങ്ങളും ചർമ്മരോഗങ്ങളും കാരണം രോമങ്ങളെല്ലാം നഷ്ടപ്പെട്ട നിലയിലായിരുന്നു. മനുഷ്യരെ ഭയന്ന്, ആരും അടുക്കാത്ത ഒരു മൂലയിൽ ഒതുങ്ങിക്കൂടിയിരുന്ന അവൾക്ക് ശാരീരികമായ വേദനകളെക്കാൾ വലുതായിരുന്നു അനുഭവിക്കേണ്ടി വന്ന ക്രൂരതകൾ സമ്മാനിച്ച മാനസിക മുറിവുകൾ. മനുഷ്യസ്പർശത്തെപ്പോലും അവൾ ഭയപ്പെട്ടിരുന്നു.
എന്നാൽ 'ഹാപ്പി ഡോഗോ' സംഘം അവളെ ഏറ്റെടുത്തതോടെ കാര്യങ്ങൾ മാറിമറിഞ്ഞു. കൃത്യമായ വൈദ്യസഹായവും സ്നേഹവും ലഭിച്ചതോടെ അവൾ പതുക്കെ ജീവിതത്തിലേക്ക് തിരിച്ചുവന്നു. ഏറെ നാളത്തെ പരിചരണത്തിലൂടെ അവളുടെ ശരീരത്തിൽ വീണ്ടും തിളക്കമാർന്ന രോമങ്ങൾ വളർന്നു, ഭയം മാറി അവൾ സന്തോഷവതിയായി. ഇന്ന് വെയിൽസിലെ മനോഹരമായ ഗ്രാമീണ പ്രദേശത്ത് തന്റെ പുതിയ കുടുംബത്തോടൊപ്പം കളിച്ചും നടന്നും അവൾ തന്റെ രണ്ടാം ജന്മം ആസ്വദിക്കുകയാണ്.
സ്നേഹവും ഒരവസരവും ലഭിച്ചാൽ ഏത് ജീവിയുടെയും ജീവിതം എത്രത്തോളം മാറ്റിമറിക്കാൻ സാധിക്കുമെന്നതിന്റെ ഏറ്റവും മികച്ച ഉദാഹരണമാണ് സിയെന്നയുടെ ഈ യാത്ര. ഈ നായയുടെ അത്ഭുതകരമായ മാറ്റം കണ്ട സോഷ്യൽ മീഡിയ ഉപയോക്താക്കൾ ആനന്ദക്കണ്ണീരോടെയാണ് ഇതിനെ വരവേറ്റത്. ഒരു ജീവിയെ സ്നേഹത്തോടെ പരിപാലിച്ചാൽ അവർ നൽകുന്ന തിരിച്ചറിവ് എത്ര വലുതാണെന്ന് ഈ വീഡിയോ നമ്മെ ഓർമ്മിപ്പിക്കുന്നു.
