ജോലിക്കായി വർഷങ്ങളോളം കഠിനാധ്വാനം ചെയ്യുകയും സ്വന്തം താൽപ്പര്യങ്ങളെയും ആരോഗ്യത്തെയും പലപ്പോഴും അവഗണിക്കുകയും ചെയ്യുന്നവരാണ് നമ്മളിൽ പലരും. എന്നാൽ 34-ാം വയസ്സിൽ തനിക്ക് ലഭിച്ച വലിയൊരു തിരിച്ചറിവിനെക്കുറിച്ച് ശിരിൻ റായ് ഭരദ്വാജ് ഇൻസ്റ്റാഗ്രാമിൽ പങ്കുവെച്ച കുറിപ്പ് ഇപ്പോൾ സമൂഹമാധ്യമങ്ങളിൽ വലിയ ചർച്ചയാവുകയാണ്. തന്റെ കരിയറിലും ജോലിയോടുമുള്ള ആത്മാർത്ഥതയിലും നൽകുന്ന അതേ പ്രാധാന്യം സ്വന്തം ജീവിതത്തിനും വ്യക്തിപരമായ കാര്യങ്ങൾക്കും നൽകാൻ തുടങ്ങിയതോടെ തന്റെ ജീവിതം തന്നെ മാറ്റിമറിക്കപ്പെട്ടു എന്ന് ശിരിൻ പറയുന്നു.
ജോലിസ്ഥലത്തെ മികച്ച പ്രകടനത്തിനായി നമ്മൾ ഉപയോഗിക്കുന്ന മുൻഗണന നൽകൽ , കൃത്യമായ പ്ലാനിംഗ്, സ്ട്രാറ്റജിക് ചിന്ത എന്നിവയൊക്കെ സ്വന്തം ജീവിതത്തിലും പ്രയോഗിച്ചാൽ അത് വ്യക്തിപരമായ ജീവിത നിലവാരം വളരെയധികം ഉയർത്തുമെന്ന് അവർ വ്യക്തമാക്കുന്നു. കമ്പനിയിലെ പ്രെസന്റേഷനുകളും ബജറ്റും കൃത്യമായി നോക്കുന്ന നമ്മൾ പലപ്പോഴും നമ്മുടെ സ്വന്തം ആരോഗ്യകാര്യങ്ങളിലോ സന്തോഷത്തിലോ ആ അച്ചടക്കം കാണിക്കാറില്ല. തന്റെ ജീവിതത്തിലെ തീരുമാനങ്ങൾ ഇനി മുതൽ തനിക്ക് ഏറ്റവും മികച്ചതായിരിക്കണം എന്ന തിരിച്ചറിവാണ് തന്നെക്കൊണ്ട് ഈ മാറ്റത്തിന് പ്രേരിപ്പിച്ചത് എന്ന് ശിരിൻ പറയുന്നു.
ശിരിന്റെ ഈ തുറന്നുപറച്ചിലിനെ പിന്തുണച്ചും തങ്ങളുടെ അനുഭവങ്ങൾ പങ്കുവെച്ചും നിരവധി പേരാണ് രംഗത്തെത്തിയിരിക്കുന്നത്. പലരും തങ്ങളുടെ ജീവിതവും ഈ ചിന്തയുമായി ബന്ധപ്പെടുത്തി കാണുന്നു. നമ്മുടെ മനസ്സിന് സന്തോഷം നൽകാത്ത, മറിച്ച് വിഷമിപ്പിക്കുന്ന കാര്യങ്ങളെ ഉപേക്ഷിക്കണമെന്നും സ്വന്തം ജീവിതത്തിൽ ആദ്യം പരിഗണിക്കേണ്ടത് സ്വന്തം സന്തോഷത്തെയാണെന്നും ഈ പോസ്റ്റ് ഓർമ്മിപ്പിക്കുന്നു.
