കർണാടകയിലെ ബെലഗാവിയിൽ ഫൊട്ടോഗ്രഫിയോടുള്ള തന്റെ മുപ്പതു വർഷത്തെ സ്നേഹം ഒരു വീടായി മാറ്റിപ്പണിത ഫൊട്ടോഗ്രാഫറുടെ വിശേഷങ്ങൾ വീണ്ടും സമൂഹമാധ്യമങ്ങളിൽ തരംഗമാകുന്നു. 'ക്ലിക്ക്' എന്ന് പേരിട്ടിരിക്കുന്ന ഈ വിസ്മയ വീട് ഒരു ഭീമൻ ഡി.എസ്.എൽ.ആർ ക്യാമറയുടെ ആകൃതിയിലാണ് നിർമ്മിച്ചിരിക്കുന്നത്. എഞ്ചിനീയർമാർ പലരും അസാധ്യമെന്ന് പറഞ്ഞ് പിന്മാറിയ ഈ സ്വപ്നതുല്യമായ ആശയം, സ്വന്തം അളിയന്റെയും കുടുംബത്തിന്റെയും സഹായത്തോടെയാണ് അദ്ദേഹം യാഥാർത്ഥ്യമാക്കിയത്.
കാഴ്ചയിൽ മാത്രമല്ല, വീടിന്റെ ഓരോ ചെറിയ കോണിലും ഫൊട്ടോഗ്രഫിയുടെ അടയാളങ്ങൾ പ്രകടമാണ്. അടുക്കള ജാലകം ക്യാമറ ലെൻസിന്റെ ആകൃതിയിലും, ബാല്ക്കണി കൈവരികൾ പഴയകാല ഫിലിം റോളിന്റെ രൂപത്തിലുമാണ് ഡിസൈൻ ചെയ്തിരിക്കുന്നത്. കുട്ടികളുടെ കിടപ്പുമുറിയിലെ ജാലകം ക്യാമറ ഫ്ലാഷിന്റെ ആകൃതിയിലാണ് നിർമ്മിച്ചിട്ടുള്ളത്. ഗോവണിയുടെ പടവുകളിൽ ഫൊട്ടോഗ്രഫിയെക്കുറിച്ചുള്ള മനോഹരമായ വരികളും ചിത്രങ്ങളും ആലേഖനം ചെയ്തിരിക്കുന്നു.
തങ്ങളുടെ പ്രൊഫഷനെ ഇത്രയധികം സ്നേഹിക്കുന്ന ഈ കുടുംബത്തിന്റെ ആർക്കിടെക്ചർ അത്ഭുതത്തോടെയാണ് ആളുകൾ നോക്കിക്കാണുന്നത്. ഫൊട്ടോഗ്രഫിയോടുള്ള ഭ്രാന്തമായ ഇഷ്ടം കൊണ്ട് തന്റെ മക്കൾക്ക് കാനൻ, നിക്കോൺ, എപ്സൺ എന്നിങ്ങനെ ക്യാമറകളുടെയും പ്രിന്ററുകളുടെയും പേരുകൾ നൽകിയ ഇദ്ദേഹം, തന്റെ ജീവിതം മുഴുവൻ ക്യാമറയ്ക്ക് പിന്നിൽ സമർപ്പിച്ചതിന്റെ ജീവിക്കുന്ന തെളിവാണ് ഈ വീട്.
സമൂഹമാധ്യമങ്ങളിൽ വൈറലായ ഈ വീടിന്റെ വീഡിയോ ലക്ഷക്കണക്കിന് ആളുകളാണ് ഇതിനോടകം കണ്ടുകഴിഞ്ഞത്. ഒരു സാധാരണ വീടിനെ സ്വന്തം തൊഴിലിനോടും കലയോടുള്ള അടങ്ങാത്ത അഭിനിവേശം കൊണ്ട് വിസ്മയകരമായ ഒരു സ്മാരകമാക്കി മാറ്റിയ ഈ കർണാടക സ്വദേശിക്ക് വലിയ കയ്യടിയാണ് ലഭിച്ചുകൊണ്ടിരിക്കുന്നത്.
