കൊച്ചി: നൈറ്റ് ലൈഫിന്റെ പേരിലുള്ള കൂട്ടായ്മകളെ നിയന്ത്രിക്കുന്നതിനു സമയക്രമം കൊണ്ടുവന്ന നടപടിയെ ന്യായീകരിച്ച് പോലീസ് ഹൈക്കോ ടതിയില്. നൈറ്റ് ലൈഫിന്റെ പേരില് നിയന്ത്രണമില്ലാതെ നടക്കുന്ന കൂട്ടായ്മകള് നഗരത്തിലെ പൊതുസുരക്ഷയ്ക്കു ഭീഷണിയാകുന്നെന്നു ചൂണ്ടിക്കാട്ടി യാണ് സിറ്റി പോലീസ് കമ്മീഷണറുടെ എതിര് സത്യവാങ്മൂലം.
ഡി.ജെ. പാര്ട്ടികള്ക്ക് രാത്രി 11-നുശേഷം വിലക്കേര്പ്പെടുത്തിയ ഉത്തരവ് റദ്ദാക്കണമെന്നാവശ്യപ്പെട്ട് കടവന്ത്ര എളംകുളത്തെ റാഡിസണ് ബ്ലൂ ഹോട്ടല് ലൈസന്സിയും ഉദയംപേരൂര് സ്വദേശിയുമായ മഹാദേവന് സമര്പ്പിച്ച ഹര്ജിയിലാണു പോലീസിന്റെ വിശദീകരണം. ഹര്ജി പരിഗണിച്ച ജസ്റ്റിസ് മുരളി പുരുഷോത്തമന് വിശദവാദത്തിനായി 13-ലേക്ക് മാറ്റി.
പഞ്ചനക്ഷത്ര ഹോട്ടല് നടത്തുന്ന തങ്ങള്ക്ക് പുലര്ച്ചെ മൂന്നുവരെ മദ്യവില്പ്പനയ്ക്ക് എക്സൈസ് ലൈസന്സുണ്ടെങ്കിലും ഡി.ജെ പാര്ട്ടികള് നടത്തു ന്നെന്നാരോപിച്ച് തുടര്ച്ചയായി നോട്ടീസുകള് നല്കി പോലീസ് പീഡിപ്പിക്കുകയാണെന്നു ചൂണ്ടിക്കാട്ടിയാണു ഹര്ജി. എന്നാല് ലൈസന്സ് പ്രകാര മുള്ള മദ്യവില്പ്പനയെ എതിര്ക്കുന്നില്ലെന്ന് പോലീസ് സത്യവാങ്മൂലത്തില് പറയുന്നു.
പോലീസ് ഉത്തരവ് ലംഘിച്ച് ഒട്ടേറെപ്പേര് ഒത്തുകൂടുന്ന ഡി.ജെ. പാര്ട്ടികള് ഹര്ജിക്കാരുടെ ഹോട്ടലില് നടത്തിയിട്ടുണ്ട്. ഇത്തരം കൂട്ടായ്മയ്ക്കെ ത്തിയവര് ഫര്ണിച്ചറുകളും മറ്റും തല്ലിത്തകര്ത്തതിന് ഹോട്ടലുകാര് നല്കിയ പരാതിയില് കടവന്ത്ര പോലീസ് കേസെടുത്തിട്ടുള്ളതാണ്. മറ്റു പലയിട ത്തും ഇത്തരം പാര്ട്ടികളുള്ളതായും നിയമവിരുദ്ധ പ്രവര്ത്തനങ്ങള് നടക്കുന്നതായും രഹസ്യാന്വേഷണ റിപ്പോര്ട്ടുണ്ട്.
ഫോര്ട്ടുകൊച്ചി നമ്പര് 18 ഹോട്ടലിലെ പാര്ട്ടിക്കുശേഷം ലഹരി ഉപയോഗിച്ച് വാഹനമോടിച്ചുണ്ടായ അപകടത്തില് മൂന്നുപേര് മരിച്ച സംഭവവും ഒലിവ് ഡൗണ്ടൗണ് ഹോട്ടലില് ലൈംഗികാതിക്രമവും കത്തിക്കുത്തും ഉണ്ടായതും ഗോവയില് നൈറ്റ് ക്ലബിനു തീപിടിച്ച് 25 പേര് മരിച്ചതുമെല്ലാം സത്യവാങ്മൂലത്തില് പരാമര്ശിക്കുന്നുണ്ട്.
