ന്യൂയോര്ക്ക് : ലോറന്സ് ബിഷ്ണോയി സംഘത്തിനെതിരെ ശക്തമായ നടപടികളുമായി യുഎസ് സുരക്ഷാ ഏജന്സികള് രംഗത്ത്. ഗോള്ഡി ബ്രാര് എന്നറിയപ്പെടുന്ന സതീന്ദര്ജീത് സിംഗിനെക്കുറിച്ചുള്ള വിവരങ്ങള് നല്കുന്നവര്ക്ക് എഫ്.ബി.ഐ 50,000 യുഎസ് ഡോളര് പ്രതിഫലം പ്രഖ്യാപിച്ചു. ബിഷ്ണോയി സംഘത്തിനെതിരെ സുരക്ഷാ ഏജന്സികള് ഇതുവരെയുള്ളതില് വച്ച് ഏറ്റവും വലിയ ഏകോപിത നടപടികളിലൊന്നാണ് ആരംഭിച്ചിരിക്കുന്നത്. അമേരിക്ക കേന്ദ്രീകരിച്ച് പ്രവര്ത്തിക്കുന്ന ബ്രാര്, വടക്കേ അമേരിക്കയിലെ സംഘത്തിന്റെ തലവനായിട്ടാണ്ആ കരുതുന്നത്.
എഫ്.ബി.ഐയുടെ വിവരങ്ങള് പ്രകാരം, ഈ സംഘം യുഎസിലും കാനഡയിലും അക്രമസംഭവങ്ങളില് ഏര്പ്പെട്ടിട്ടുണ്ടെന്നാണ് ആരോപണം. തെക്കന് കാലിഫോര്ണിയയിലും യുണൈറ്റഡ് സ്റ്റേറ്റ്സിലുടനീളവും കാനഡയിലും വിവിധ അക്രമ സംഭവങ്ങളില് ഏര്പ്പെട്ടിട്ടുണ്ടെന്ന് യുഎസിന്റെ ആരോപണം. 2026 ജൂലൈ 1-ന് കാലിഫോര്ണിയയിലെ ലോസ് ഏഞ്ചല്സിലുള്ള യുണൈറ്റഡ് സ്റ്റേറ്റ്സ് ഡിസ്ട്രിക്റ്റ് കോടതി ഇയാള്ക്കെതിരെ അറസ്റ്റ് വാറണ്ട് പുറപ്പെടുവിച്ചിരുന്നു. ലോറന്സ് ബിഷ്ണോയി, ജഗ്ദീപ് സിംഗ് എന്ന ജഗ്ഗു ഭഗവാന് പുരിയ എന്നിവര്ക്കെതിരെ അമേരിക്ക കുറ്റപത്രം സമര്പ്പിച്ചു. ഇവര്ക്കെതിരെ ആദ്യമായാണ് യുഎസില് കുറ്റപത്രം സമര്പ്പിക്കുന്നതിനുള്ള നടപടികള് ആരംഭിക്കുന്നത്.
യുഎസ്, കാനഡ, യൂറോപ്പ് എന്നിവിടങ്ങളിലുടനീളം ലോറന്സ് ബിഷ്ണോയിക്കും അവന്റെ സംഘാംഗങ്ങള്ക്കുമെതിരെ ആഗോള ഫെഡറല് അതോറിറ്റിയുടെ ശക്തമായ നടപടികള് നടന്നുവരുന്നതിനിടയിലാണ് ഈ വികാസം. ലോറന്സ് ബിഷ്ണോയി സംഘത്തിലെ ഇരുപതിലധികം അംഗങ്ങളെ അറസ്റ്റ് ചെയ്തിട്ടുണ്ടെന്നും അതില് ഏഴുപേരെയെങ്കിലും സ്റ്റോക്ടണില് കസ്റ്റഡിയിലെടുത്തിട്ടുണ്ടെന്നും യുണൈറ്റഡ് സ്റ്റേറ്റ്സിലെ മാധ്യമ റിപ്പോര്ട്ടുകള് വ്യക്തമാക്കുന്നു. കഴിഞ്ഞ വര്ഷം, ലോറന്സ് ബിഷ്ണോയി സംഘത്തെ കാനഡ 'വിദേശ ഭീകര സംഘടന'യായി പ്രഖ്യാപിച്ചിരുന്നു.
ബിഷ്ണോയിയും അവന്റെ സംഘത്തോട് കൂറുപുലര്ത്തുന്നവരും യൂറോപ്പില് നിന്നും കാനഡയില് നിന്നും പ്രവര്ത്തിച്ചുകൊണ്ട് ഇന്ത്യയിലെയും വിദേശങ്ങളിലെയും വ്യവസായികളെ ഭീഷണിപ്പെടുത്തുന്നുണ്ട്. നിലവില് ഗുജറാത്തിലെ ജയിലിലാണ് ബിഷ്ണോയി ഉള്ളത്.
