"നീ എത്ര വളർന്നാലും എനിക്ക് എപ്പോഴും എന്റെ കൊച്ചുമോളാണ്"; പ്രിയങ്കയ്ക്ക് ജന്മദിനാശംസകളുമായി അമ്മ മധു ചോപ്ര

ബോളിവുഡിലും ഹോളിവുഡിലും ഒരുപോലെ തിളങ്ങി നിൽക്കുന്ന താരം പ്രിയങ്ക ചോപ്രയ്ക്ക് ജന്മദിനാശംസകൾ നേർന്ന് അമ്മ മധു ചോപ്ര പങ്കുവെച്ച ഹൃദയസ്പർശിയായ കുറിപ്പ് സോഷ്യൽ മീഡിയയിൽ ശ്രദ്ധേയമാകുന്നു. മകളുടെ വളർച്ചയിലും വിജയങ്ങളിലും ഒരമ്മയ്ക്കുള്ള എല്ലാ അഭിമാനവും സ്നേഹവും നിറഞ്ഞതാണ് മധു ചോപ്രയുടെ വാക്കുകൾ.

പ്രിയങ്കയ്ക്കൊപ്പമുള്ള ചിത്രം പങ്കുവെച്ചുകൊണ്ട് മധു ചോപ്ര കുറിച്ചതിങ്ങനെ: "എന്റെ പ്രിയപ്പെട്ട പ്രിയങ്കയ്ക്ക് പിറന്നാൾ ആശംസകൾ. ഇന്ന് നീ വളർന്നിരിക്കുന്ന ഈ അത്ഭുതകരമായ സ്ത്രീയായി നിന്നെ കാണാൻ കഴിഞ്ഞത് എന്റെ ജീവിതത്തിലെ ഏറ്റവും വലിയ അനുഗ്രഹമാണ്. നിന്റെ കരുത്തും കാരുണ്യവും പ്രതിസന്ധികളെ അതിജീവിക്കാനുള്ള ശേഷിയും അചഞ്ചലമായ മനോഭാവവും ഓരോ ദിവസവും എന്നെ പ്രചോദിപ്പിച്ചുകൊണ്ടേയിരിക്കുന്നു.

നീ എത്ര ദൂരേക്ക് യാത്ര ചെയ്താലും എത്രയൊക്കെ നേട്ടങ്ങൾ കൈവരിച്ചാലും, നീ എപ്പോഴും എന്റെ കൊച്ചുമോളായിരിക്കും. ഈ വർഷം നിനക്ക് സമൃദ്ധമായ സന്തോഷവും നല്ല ആരോഗ്യവും അനന്തമായ സ്നേഹവും പുഞ്ചിരിക്കാൻ എണ്ണമറ്റ കാരണങ്ങളും നൽകട്ടെ. തുടർന്നും തിളങ്ങുക, സ്വപ്നം കാണുക, ഞങ്ങളെല്ലാവരെയും അഭിമാനം കൊള്ളിക്കുക. വാക്കുകൾക്ക് അതീതമായി നിന്നെ സ്നേഹിക്കുന്നു."

അമ്മയ്ക്ക് പുറമെ പ്രിയങ്കയുടെ സഹോദരൻ സിദ്ധാർത്ഥ് ചോപ്രയും പ്രിയപ്പെട്ട ദീദിക്ക് പിറന്നാൾ ആശംസകൾ നേർന്ന് പോസ്റ്റ് പങ്കുവെച്ചിട്ടുണ്ട്. "എപ്പോഴുമുള്ളതുപോലെ ഒരു തിളങ്ങുന്ന നക്ഷത്രമായി നീ എപ്പോഴും പ്രകാശിക്കട്ടെ. ഞങ്ങളുടെ ജീവിതത്തിൽ ഉള്ളതിന് നന്ദി. നീ ഞങ്ങളുടെ ജീവിതത്തെ ഏറ്റവും മികച്ചതാക്കുന്നു. നിനക്ക് ഹൃദയം നിറഞ്ഞ ജന്മദിനാശംസകൾ നേരുന്നു," എന്നായിരുന്നു പ്രിയങ്കയ്ക്കൊപ്പമുള്ള നിരവധി ചിത്രങ്ങൾ പങ്കുവെച്ചുകൊണ്ട് സിദ്ധാർത്ഥ് കുറിച്ചത്.

തന്റെ കരിയറിലും ജീവിതത്തിലും അമ്മ മധു ചോപ്രയും അന്തരിച്ച പിതാവ് ഡോ. അശോക് ചോപ്രയും നൽകിയ പിന്തുണയെക്കുറിച്ച് പലപ്പോഴും പ്രിയങ്ക വാചാലയായിട്ടുണ്ട്.

അതേസമയം, ആരാധകർ ഏറെ ആവേശത്തോടെ കാത്തിരിക്കുന്ന എസ്.എസ്. രാജമൗലി ചിത്രത്തിലും പ്രിയങ്ക ചോപ്ര പ്രധാന റോളിൽ എത്തുന്നുണ്ട്. ചിത്രത്തിൽ 'മന്ദാകിനി' എന്ന കഥാപാത്രത്തെയാണ് പ്രിയങ്ക അവതരിപ്പിക്കുന്നത്. പൃഥ്വിരാജ് സുകുമാരനും മഹേഷ് ബാബുവും പ്രധാന വേഷങ്ങളിലെത്തുന്ന ഈ ചിത്രം പ്രിയങ്കയുടെ കരിയറിലെ മറ്റൊരു വലിയ നാഴികക്കല്ലാകുമെന്നാണ് വിലയിരുത്തൽ.