പെൺകുട്ടികളെ ശല്യം ചെയ്തു: യുവാക്കള്‍ക്ക് നേരെ ചൊറിയണ പ്രയോഗം നടത്തിയും മുഖത്ത് കരി പുരട്ടിയും നാട്ടുകാരുടെ വിചിത്ര ശിക്ഷ!

ഉത്തരാഖണ്ഡിലെ നൈനിറ്റാളിൽ പെൺകുട്ടികളെ ശല്യം ചെയ്തതായി ആരോപിക്കപ്പെട്ട യുവാക്കൾക്ക് നാട്ടുകാരുടെ വക വിചിത്രവും കഠിനവുമായ ശിക്ഷ. തൊട്ടാൽ കടുത്ത ചൊറിച്ചിലും അലർജിയും ഉണ്ടാക്കുന്ന 'ബിചു ബൂട്ടി' അഥവാ ചൊറിയണം ചെടികൾ ഉപയോഗിച്ചാണ് നാട്ടുകാർ യുവാക്കളെ അടിച്ചതും ശിക്ഷ നടപ്പിലാക്കിയതും. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ അതിവേഗം വൈറലായിമാറിയിരിക്കുകയാണ്.

ആളുകൾ നോക്കിനിൽക്കെ പരസ്യമായി യുവാക്കളെ ചൊറിയണം ചെടികൾ കൊണ്ട് അടിക്കുകയും, പിന്നീട് ഇവരുടെ മുഖത്ത് കരി പുരട്ടി അപമാനിക്കുകയും ചെയ്തു. പെൺകുട്ടികൾക്കെതിരെയുള്ള അതിക്രമങ്ങൾ വച്ചുപൊറുപ്പിക്കില്ല എന്ന സന്ദേശമാണ് നാട്ടുകാർ ഇതിലൂടെ നൽകിയത്. ക്രമസമാധാനം കയ്യിലെടുക്കുന്ന ഇത്തരം നടപടികൾ പ്രാദേശികമായി വലിയ ചർച്ചകൾക്കും വഴിതുടങ്ങിയിട്ടുണ്ട്.

സംഭവം ശ്രദ്ധയിൽ പെട്ടയുടൻ തന്നെ പൊലീസ് സ്ഥലത്തെത്തി ഇടപെടുകയും പ്രതികളെ കസ്റ്റഡിയിലെടുക്കുകയും ചെയ്തു. നാട്ടുകാരുടെ കൂട്ടായ്മയിൽ നടന്ന ഈ കയ്യേറ്റത്തിന്റെയും ശിക്ഷാവിധിയുടെയും പശ്ചാത്തലത്തിൽ പൊലീസ് നിയമനടപടികൾ ആരംഭിച്ചിട്ടുണ്ട്. നിയമം കയ്യിലെടുക്കുന്നതിന് പകരം പൊലീസിനെയാണ് സമീപിക്കേണ്ടിയിരുന്നതെന്ന് അധികൃതർ വ്യക്തമാക്കി.

എങ്കിലും, സ്ത്രീകൾക്കെതിരെയുള്ള അതിക്രമങ്ങളിൽ പൊതുജനം നേരിട്ട് പ്രതികരിക്കുന്ന ഇത്തരം സംഭവങ്ങൾ സോഷ്യൽ മീഡിയയിൽ സമ്മിശ്ര പ്രതികരണങ്ങളാണ് ഉണ്ടാക്കുന്നത്. ഒരു വിഭാഗം ആളുകൾ നാട്ടുകാരുടെ നടപടിയെ പിന്തുണച്ചപ്പോൾ, മറ്റൊരു വിഭാഗം നിയമവാഴ്ചയെ ലംഘിക്കുന്ന ഇത്തരം നടപടികളെ ശക്തമായി വിമർശിക്കുകയും ചെയ്തു. എന്തായാലും നൈനിറ്റാളിലെ ഈ 'ബിചു ബൂട്ടി' ശിക്ഷാ രീതി ഇപ്പോൾ ദേശീതലത്തിൽ തന്നെ വലിയ വാർത്തയായിരിക്കുകയാണ്.