ന്യൂഡല്‍ഹി: ലോക്സഭാ സെക്രട്ടറിയേറ്റ് ഡയറക്ടറെ താമസസ്ഥലത്ത് തൂങ്ങിമരിച്ച നിലയില്‍ കണ്ടെത്തി. ലോക്സഭാ സെക്രട്ടറിയേറ്റിലെ ഡയറക്ടറായ ഗൗരവ് ഗൗതത്തെ(40) നോയിഡയിലെ ഫ്‌ലാറ്റിലാണ് മരിച്ച നിലയില്‍ കഴിഞ്ഞ ദിവസം കണ്ടെത്തയത്. 70 ലക്ഷത്തോളം രൂപയുടെ കടുത്ത സാമ്പത്തിക ബാധ്യതയെക്കുറിച്ച് വിവരിക്കുന്ന 15 പേജുള്ള ആത്മഹത്യാക്കുറിപ്പ് പോലീസ് കണ്ടെടുത്തു.
സ്വന്തം വീട്ടില്‍ നിന്ന് മടങ്ങിയെത്തിയ ഭാര്യ, ഫോണ്‍ വിളിച്ചിട്ടും വാതില്‍ തുറക്കാത്തതിനെ തുടര്‍ന്ന് സെക്യൂരിറ്റി ജീവനക്കാരന്റെ സഹായത്തോടെ വാതില്‍ തുറന്നപ്പോഴാണ് ഗൗരവിനെ ഫാനില്‍ തൂങ്ങിയ നിലയില്‍ കണ്ടെത്തിയത്. ഉടന്‍ തന്നെ ആശുപത്രിയില്‍ എത്തിച്ചെങ്കിലും അതിനകം മരണം സംഭവിച്ചിരുന്നു. ദൈനംദിന ചെലവുകള്‍ വര്‍ദ്ധിച്ചതും സാമ്പത്തിക ഞെരുക്കവും കാരണം 70 ലക്ഷത്തോളം രൂപയുടെ കടബാധ്യത ഉണ്ടായെന്നും ഇത് കടുത്ത മാനസിക വിഷമത്തിന് കാരണമായെന്നും കുറിപ്പില്‍ പറയുന്നു.
മരണത്തില്‍ മറ്റാര്‍ക്കും പങ്കില്ലെന്നും സ്വന്തം തീരുമാനമാണെന്നും കുറിപ്പിലുണ്ട്. കുടുംബാംഗങ്ങള്‍ ആര്‍ക്കെതിരെയും പരാതി നല്‍കിയിട്ടില്ലെന്ന് ഫേസ്-2 സ്റ്റേഷന്‍ ഇന്‍-ചാര്‍ജ് രാഘവേന്ദ്ര സിംഗ് അറിയിച്ചു. മൃതദേഹം പോസ്റ്റ്മോര്‍ട്ടത്തിന് അയച്ചിട്ടുണ്ടെന്നും റിപ്പോര്‍ട്ടിന്റെ അടിസ്ഥാനത്തില്‍ തുടര്‍ന്നുള്ള നിയമനടപടികള്‍ സ്വീകരിക്കുമെന്നും പോലീസ് വ്യക്തമാക്കി.
(ആത്മഹത്യ ഒന്നിനും പരിഹാരമല്ല. കടുത്ത മാനസീകസമ്മര്‍ദ്ദം ഉണ്ടാകുന്ന സാഹചര്യത്തില്‍ വിദഗ്ദ്ധരെ സമീപിക്കുക)
Comments