‘ധീരമായ നീക്കം’; മക്ക പ്രതിരോധ കരാറിന് ട്രംപിന്റെ പിന്തുണ

വാഷിങ്ടൺ: സൗദി അറേബ്യ, തുർക്കിയ, പാകിസ്താൻ എന്നിവർ ഒപ്പുവെച്ച മക്ക സംയുക്ത പ്രതിരോധ കരാറിനെ സ്വാഗതം ചെയ്ത് യു.എസ് പ്രസിഡന്റ് ഡൊണാൾഡ് ട്രംപ്. ആഗസ്റ്റ് ഏഴിന് മക്കയിൽ ഒപ്പുവെച്ച കരാർ മിഡിൽ ഈസ്റ്റിലെ പ്രതിരോധ സഹകരണത്തിന് പുതിയ ദിശ നൽകുന്നതാണെന്ന് ട്രംപ് പറഞ്ഞു.

ട്രൂത്ത് സോഷ്യലിലെ പോസ്റ്റിലാണ് ട്രംപ് കരാറിനെ പ്രശംസിച്ചത്. ‘വലിയ, ധീരവും പ്രധാനപ്പെട്ടതുമായ ആദ്യ ചുവടുവെപ്പ്’ എന്നാണ് അദ്ദേഹം കരാറിനെ വിശേഷിപ്പിച്ചത്. മിഡിൽ ഈസ്റ്റിലെ രാജ്യങ്ങൾ കൂടുതൽ ശക്തമായ രീതിയിൽ സ്വയം പ്രതിരോധിക്കാൻ ഒരുമിക്കുന്നതിന്റെ തെളിവാണ് കരാറെന്നും ട്രംപ് അഭിപ്രായപ്പെട്ടു.

കരാറിലെ പ്രധാന വ്യവസ്ഥ പ്രകാരം മൂന്ന് രാജ്യങ്ങളിൽ ഏതെങ്കിലും ഒന്നിനെതിരായ സായുധ ആക്രമണം മൂന്നുപേർക്കുമെതിരായ ആക്രമണമായി കണക്കാക്കും. പരസ്പര പ്രതിരോധവും സൈനിക സഹകരണവും ശക്തിപ്പെടുത്തുകയാണ് ഇതിലൂടെ ലക്ഷ്യമിടുന്നത്.

സൗദി കിരീടാവകാശി മുഹമ്മദ് ബിൻ സൽമാൻ, തുർക്കിയ പ്രസിഡന്റ് റജബ് ത്വയ്യിബ് ഉർദുഗാൻ, പാകിസ്താൻ പ്രധാനമന്ത്രി ശഹബാസ് ഷരീഫ് എന്നിവർ ചേർന്നാണ് കരാറിൽ ഒപ്പുവെച്ചത്.

സംയുക്ത സൈനിക അഭ്യാസങ്ങൾ, പ്രതിരോധ വ്യവസായ സഹകരണം, തന്ത്രപ്രധാന ഏകോപനം തുടങ്ങിയ മേഖലകളിലെ സഹകരണം ശക്തമാക്കാനും കരാർ ലക്ഷ്യമിടുന്നു. എന്നാൽ കരാർ ഒരു പ്രത്യേക രാജ്യത്തെയും ലക്ഷ്യമിടുന്നതല്ലെന്ന് തുർക്കിയ വ്യക്തമാക്കിയിട്ടുണ്ട്.

മേഖലയിൽ സുരക്ഷാ വെല്ലുവിളികൾ വർധിക്കുന്ന സാഹചര്യത്തിൽ പ്രാദേശിക രാജ്യങ്ങൾ സ്വന്തം പ്രതിരോധ ശേഷി ശക്തിപ്പെടുത്തുന്നതിന്റെ ഭാഗമായാണ് കരാറിനെ വിലയിരുത്തുന്നത്.