കരിവള്ളൂരിൽ യുവതിയെ പെട്രോൾ ഒഴിച്ച് തീകൊളുത്തി ഭർത്താവ്; വിവാഹമോചന ഹർജി നൽകിയതിലെ വിരോധമെന്ന് പൊലീസ്

കണ്ണൂർ: പയ്യന്നൂർ കരിവള്ളൂരിൽ യുവതിയെ ഭർത്താവ് പെട്രോൾ ഒഴിച്ച് തീകൊളുത്തി. കുക്കാനം സ്വദേശി പ്രജിഷയ്ക്കാണ് പൊള്ളലേറ്റത്. സംഭവത്തിൽ പ്രജിഷയുടെ അമ്മ പത്മിനിക്കും പൊള്ളലേറ്റു. ഇരുവരെയും കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

പ്രജിഷയുടെ ഭർത്താവ് സനൽകുമാറാണ് ആക്രമണം നടത്തിയതെന്നാണ് പൊലീസ് പറയുന്നത്. ആക്രമണത്തിനിടെ സനൽകുമാറിനും പൊള്ളലേറ്റു. ഇയാളെ പരിയാരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്.

അകന്നു കഴിയുകയായിരുന്ന പ്രജിഷയുടെ വീട്ടിൽ ഇന്നലെ രാത്രിയെത്തിയ ശേഷമാണ് സനൽകുമാർ ആക്രമണം നടത്തിയത്. പ്രജിഷ വിവാഹമോചനത്തിനായി ഹർജി നൽകിയതിലുള്ള വിരോധമാണ് ആക്രമണത്തിന് കാരണമെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചു.