പൂച്ച കടന്നുപോയതിന് പിന്നാലെ യുവതി പടിക്കെട്ടിൽ നിന്ന് വീണു; ‘ആരോ തള്ളിയതോ?’ ഈജിപ്തിലെ ദൃശ്യങ്ങൾ വൈറൽ

ചില ദൃശ്യങ്ങൾ കണ്ടാൽ സംഭവിച്ചതെന്താണെന്ന് മനസിലാക്കാൻ കഴിയാതെ നമ്മൾ തന്നെ വീണ്ടും വീണ്ടും നോക്കിപ്പോകും. അത്തരത്തിൽ ആശയക്കുഴപ്പത്തിലാക്കിയിരിക്കുകയാണ് ഈജിപ്തിൽ നിന്നെന്ന് പറയപ്പെടുന്ന ഒരു സിസിടിവി ദൃശ്യം. സാധാരണയായി പടിക്കെട്ടിലൂടെ നടന്നുപോകുന്ന യുവതിയുടെ സമീപത്തുകൂടി ഒരു പൂച്ച കടന്നുപോകുന്നു. തൊട്ടുപിന്നാലെ സംഭവിക്കുന്നത് കണ്ടാണ് സോഷ്യൽ മീഡിയയിൽ ഇപ്പോൾ ചർച്ച.

കെട്ടിടത്തിനുള്ളിലെ പടിക്കെട്ടിലൂടെ താഴേക്ക് ഇറങ്ങുകയായിരുന്നു യുവതി. ഇതിനിടെ മുകളിലേക്ക് കയറിവരുന്ന പൂച്ചയെ യുവതി ശ്രദ്ധിക്കുന്നതായി ദൃശ്യങ്ങളിൽ കാണാം. ഇരുവരും പരസ്പരം കടന്നുപോയതിന് തൊട്ടുപിന്നാലെയാണ് യുവതി പെട്ടെന്ന് താഴേക്ക് വീഴുന്നത്. സമീപത്ത് മറ്റാരെയും കാണാനില്ലെന്നതാണ് ദൃശ്യങ്ങളെ കൂടുതൽ ദുരൂഹമാക്കുന്നത്.

യുവതി വീഴുന്ന രീതി കണ്ടതോടെയാണ് സോഷ്യൽ മീഡിയയിൽ പലവിധ അഭ്യൂഹങ്ങളും ഉയർന്നത്. ആരോ അദൃശ്യമായി യുവതിയെ തള്ളിയതാണെന്ന് ചിലർ വാദിച്ചപ്പോൾ, സംഭവത്തിന് പിന്നിൽ എന്തെങ്കിലും അസാധാരണ ശക്തിയുണ്ടാകാമെന്നായിരുന്നു മറ്റുചിലരുടെ പ്രതികരണം. അതേസമയം, വീഡിയോ കൃത്രിമബുദ്ധി ഉപയോഗിച്ച് സൃഷ്ടിച്ചതോ എഡിറ്റ് ചെയ്തതോ ആകാമെന്ന സംശയവും നിരവധി പേർ പങ്കുവെച്ചു.

‘ഇത് എഐ തന്നെയായിരിക്കണം’ എന്ന് ചിലർ ഉറപ്പിച്ച് പറഞ്ഞപ്പോൾ, അമാനുഷിക ശക്തിയെക്കുറിച്ചുള്ള രസകരമായ സിദ്ധാന്തങ്ങളുമായി മറ്റുചിലരും രംഗത്തെത്തി. എന്നാൽ വീഡിയോയിൽ മാത്രം നിന്ന് ഇത് എഐ ഉപയോഗിച്ച് നിർമിച്ചതാണെന്നോ അമാനുഷിക സംഭവമാണെന്നോ സ്ഥിരീകരിക്കാൻ തെളിവുകളില്ല. മറ്റൊരു ക്യാമറയിൽ നിന്നുള്ള ദൃശ്യങ്ങളോ സംഭവത്തിന്റെ കൂടുതൽ വിവരങ്ങളോ ലഭിക്കാത്ത സാഹചര്യത്തിൽ യുവതി യഥാർഥത്തിൽ എങ്ങനെയാണ് വീണതെന്നത് ഇപ്പോഴും വ്യക്തമല്ല. ഇതിനിടെയാണ് ദൃശ്യങ്ങൾ സോഷ്യൽ മീഡിയയിൽ വൈറലാകുന്നത്.