‘മണ്ണിൽ ചവിട്ടി വളർന്നതാണ്, വഴിയിൽ പരവതാനി വിരിച്ചത് ശ്രദ്ധിച്ചിട്ടില്ല’; മന്ത്രി കെ.എം. ഷാജി

കോഴിക്കോട്: പരവതാനി വിവാദത്തിൽ പ്രതികരണവുമായി തദ്ദേശ സ്വയംഭരണവകുപ്പ് മന്ത്രി കെ.എം. ഷാജി. പരവതാനി വിരിച്ചില്ലെന്ന കാരണത്താൽ കാറിൽ നിന്നിറങ്ങാൻ വിസമ്മതിച്ചെന്ന വാർത്ത തനിക്ക് ഓർമയില്ലെന്നും അദ്ദേഹം പറഞ്ഞു. പരിപാടി നടക്കുന്ന സ്ഥലത്തെത്തിയ ഉടൻ നേരെ വേദിയിലേക്ക് കയറുകയായിരുന്നു. വഴിയിൽ കാർപ്പറ്റ് വിരിച്ചതൊന്നും ശ്രദ്ധയിൽപ്പെട്ടില്ലെന്നും മന്ത്രി വ്യക്തമാക്കി.

താൻ മണ്ണിൽ ചവിട്ടി വളർന്നയാളാണെന്നും ഇത്തരം വാർത്തകൾ കെട്ടിച്ചമയ്ക്കുകയാണെന്നും കെ.എം. ഷാജി ആരോപിച്ചു. ആലപ്പുഴ ബീച്ചിൽ നടന്ന കുടുംബശ്രീ സംസ്ഥാന വിപണന മേളയിൽ പരവതാനി വിരിച്ചില്ലാത്തതിനാൽ മന്ത്രി കാറിൽ നിന്നിറങ്ങിയില്ലെന്നായിരുന്നു നേരത്തെ പുറത്തുവന്ന വാർത്ത.

കില, ക്ലീൻ കേരള, കുടുംബശ്രീ തുടങ്ങിയ എൽഎസ്ജിഡി മിഷനുകളിൽ ഐഎഎസ് ഉദ്യോഗസ്ഥരേക്കാൾ ഉയർന്ന ശമ്പളം വാങ്ങി പാർട്ടി താൽപര്യങ്ങൾക്കായി മാത്രം പ്രവർത്തിക്കുന്ന നിരവധി പേരുണ്ടെന്നും മന്ത്രി ആരോപിച്ചു. ഇത്തരം തസ്തികകളിൽ നിന്ന് ആളുകളെ മാറ്റി പകരം മറ്റുള്ളവരെ നിയമിക്കുന്നതല്ല, സർക്കാർ പൊതുസ്വത്ത് കട്ടുമുടിക്കുന്ന സിപിഐഎം ലോബികളെ പൂർണമായി ഇല്ലാതാക്കുകയാണ് തന്റെ ലക്ഷ്യമെന്നും അദ്ദേഹം പറഞ്ഞു.

നാളെ മന്ത്രിസ്ഥാനത്ത് ഇല്ലെങ്കിലും താൻ ഇടപെടുന്നിടത്തോളം കാലം ഇത്തരം ആളുകൾക്കെതിരെ കർശന നടപടി തുടരുമെന്നും കെ.എം. ഷാജി വ്യക്തമാക്കി.

പഞ്ചായത്തുകളിലെ പാർട്ടി പരിപാടികൾ വിജയിപ്പിക്കാനും മന്ത്രിമാരുടെ പ്രസംഗങ്ങൾക്ക് ആളെ എത്തിക്കാനും കുടുംബശ്രീ വോളണ്ടിയർമാരെ ഉപയോഗിക്കുന്ന സംവിധാനവും അവസാനിപ്പിക്കണം. കുടുംബശ്രീയെ അതിന്റെ യഥാർത്ഥ ലക്ഷ്യത്തിലേക്ക് തിരിച്ചുകൊണ്ടുവരിക എന്നതാണ് സർക്കാരിന്റെ നിർബന്ധിത ലക്ഷ്യമെന്നും മന്ത്രി പറഞ്ഞു.