യു-ടേൺ എടുക്കുന്നതിനിടെ നിയന്ത്രണം വിട്ടു; ആക്ടിവയുമായി കടയുടെ ഷട്ടറിൽ ഇടിച്ച് യുവതി, സിസിടിവി ദൃശ്യങ്ങള്‍ വൈറൽ

വാഹനം ഓടിക്കാൻ പഠിക്കുന്നതിനിടെ ചെറിയൊരു പിഴവ് പോലും വലിയ അപകടത്തിലേക്ക് നയിക്കാം. രാജ്കോട്ടിൽ ആക്ടിവ ഓടിക്കാൻ പഠിച്ചുകൊണ്ടിരുന്ന യുവതിക്ക് സംഭവിച്ചത് അത്തരമൊരു അപകടമാണ്. തിരക്കേറിയ റോഡിൽ യു-ടേൺ എടുക്കുന്നതിനിടെ നിയന്ത്രണം നഷ്ടപ്പെട്ട ആക്ടിവ നേരെ കടയുടെ അടച്ചിട്ട ഷട്ടറിലേക്ക് ഇടിച്ചുകയറുകയായിരുന്നു. അപകടത്തിന്റെ ഞെട്ടിക്കുന്ന സിസിടിവി ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.

ഗോവിന്ദ്ബാഗ് പച്ചക്കറി മാർക്കറ്റിന് സമീപമാണ് സംഭവം നടന്നത്. റോഡിലൂടെ ആക്ടിവയിൽ സഞ്ചരിച്ചിരുന്ന യുവതി യു-ടേൺ എടുക്കാൻ ശ്രമിക്കുന്നതിനിടെയാണ് വാഹനത്തിന്റെ നിയന്ത്രണം നഷ്ടപ്പെട്ടത്. തുടർന്ന് ആക്ടിവ പെട്ടെന്ന് വേഗം കൂടുകയും റോഡരികിലെ കടയിലേക്ക് പാഞ്ഞുകയറുകയുമായിരുന്നു. നിർത്താൻ കഴിയാതെ വന്ന വാഹനം ശക്തമായി ഷട്ടറിൽ ഇടിച്ചതോടെ യുവതി ആക്ടിവയിൽ നിന്ന് തെറിച്ചുവീണു.

ഷട്ടറിന് സമീപം യുവതി തലയിടിച്ച് വീഴുന്നതും സിസിടിവി ദൃശ്യങ്ങളിൽ വ്യക്തമായി കാണാം. കാഴ്ചയിൽ അപകടം ഗുരുതരമായി തോന്നിച്ചെങ്കിലും യുവതിക്ക് വലിയ പരിക്കുകളൊന്നും സംഭവിച്ചില്ലെന്നാണ് റിപ്പോർട്ട്. സംഭവത്തിന്റെ ദൃശ്യങ്ങൾ പുറത്തുവന്നതോടെ സോഷ്യൽ മീഡിയയിൽ നിരവധി പേരാണ് പ്രതികരണങ്ങളുമായി എത്തിയത്.

വാഹനം ഓടിക്കാൻ പഠിക്കുന്നവർ തിരക്കേറിയ റോഡുകളിൽ പരിശീലനം നടത്തുമ്പോൾ കൂടുതൽ ജാഗ്രത പാലിക്കണമെന്ന ഓർമ്മപ്പെടുത്തൽ കൂടിയാണ് ഈ അപകടം. പ്രത്യേകിച്ച് യു-ടേൺ, ബ്രേക്കിംഗ്, ആക്സിലറേഷൻ തുടങ്ങിയവ നിയന്ത്രിക്കാൻ പരിചയമില്ലാത്തവർ തുറന്നതും തിരക്ക് കുറഞ്ഞതുമായ സ്ഥലങ്ങളിൽ പരിശീലിക്കുന്നതാണ് സുരക്ഷിതം. ഒരു നിമിഷം നിയന്ത്രണം വിട്ടാൽ അപകടം എത്ര വേഗത്തിൽ സംഭവിക്കാമെന്ന് കാണിച്ചിരിക്കുകയാണ് രാജ്കോട്ടിലെ ഈ വൈറൽ സിസിടിവി ദൃശ്യം.