‘സ്കാൻ ചെയ്യൂ, പണം നൽകൂ, തീർന്നു’; ഇന്ത്യയിലെങ്ങും യുപിഐ കണ്ട് അമ്പരന്ന് ഫ്രഞ്ച് യുവതി

ഇന്ത്യയിലേക്ക് ആദ്യമായി എത്തുന്ന വിദേശികൾക്ക് ഇവിടെ കാണുന്ന പല കാഴ്ചകളും കൗതുകമാകാറുണ്ട്. എന്നാൽ ഇത്തവണ ഒരു ഫ്രഞ്ച് യുവതിയെ അമ്പരപ്പിച്ചത് ഇന്ത്യയിലെ ഭക്ഷണമോ തിരക്കേറിയ നഗരങ്ങളോ അല്ല, മറിച്ച് കടകളിലും വഴിയോര കച്ചവടങ്ങളിലും ഓട്ടോറിക്ഷകളിലും ഒരുപോലെ കാണുന്ന ചെറിയ ക്യൂ ആര്‍ കോഡുകളായിരുന്നു. പണം കൈയിൽ കരുതാതെ തന്നെ ചെറിയ തുകകൾ പോലും നിമിഷങ്ങൾക്കുള്ളിൽ നൽകാനാകുന്ന രീതിയാണ് യുവതിയുടെ ശ്രദ്ധ പിടിച്ചുപറ്റിയത്.

ഇന്ത്യയിലെത്തുന്നതിന് മുമ്പ് തന്നെ യുപിഐയെക്കുറിച്ച് പരിചയമുണ്ടായിരുന്നുവെന്ന് യുവതി പറയുന്നു. എന്നാൽ ഇത്രത്തോളം വ്യാപകമായി ദൈനംദിന ജീവിതത്തിന്റെ ഭാഗമായിരിക്കുമെന്ന് പ്രതീക്ഷിച്ചിരുന്നില്ല. വഴിയോര ഭക്ഷണം വാങ്ങുമ്പോഴും ഒരു ചായ കുടിക്കുമ്പോഴും ഓട്ടോറിക്ഷയിൽ യാത്ര ചെയ്യുമ്പോഴും 20 രൂപയുടെ ചെറിയൊരു സാധനം വാങ്ങുമ്പോഴും ക്യൂആര്‍ കോഡ് സ്കാൻ ചെയ്ത് പണമടയ്ക്കാനുള്ള സൗകര്യം ലഭിക്കുന്നതാണ് യുവതിയെ പ്രത്യേകമായി അമ്പരപ്പിച്ചത്.

വലിയ കടകളിൽ മാത്രമല്ല, ചെറിയ പ്രാദേശിക വ്യാപാരികളിലും സാധാരണക്കാരുടെ ഇടയിലും ഡിജിറ്റൽ പേയ്മെന്റ് ഇത്ര എളുപ്പത്തിൽ ഉപയോഗിക്കുന്നത് ഇന്ത്യയുടെ വ്യത്യസ്തമായൊരു കാഴ്ചയായാണ് യുവതി പങ്കുവെച്ചത്. ‘സ്കാൻ ചെയ്യൂ, പണം നൽകൂ, തീർന്നു’ എന്ന രീതിയിൽ ഇടപാട് പൂർത്തിയാകുന്നത് അവൾക്ക് ഏറെ കൗതുകമായി. ചെറിയ തുകകൾക്കുപോലും ക്യൂആര്‍ പേയ്മെന്റ് ഉപയോഗിക്കുന്നത് ഇന്ത്യയിലെ ഡിജിറ്റൽ പണമിടപാട് സംവിധാനത്തിന്റെ വ്യാപ്തിയാണ് കാണിക്കുന്നതെന്നും പ്രതികരണങ്ങളുണ്ട്.

യുവതിയുടെ അനുഭവം സോഷ്യൽ മീഡിയയിൽ പങ്കുവെച്ചതോടെ ഇന്ത്യയിലെ യുപിഐ സംവിധാനത്തെക്കുറിച്ച് വീണ്ടും ചർച്ചയായി. വിദേശികൾക്ക് ഇന്ത്യയിലെ ഡിജിറ്റൽ പേയ്മെന്റ് സംവിധാനം എത്രത്തോളം വ്യത്യസ്തമായ അനുഭവമാണ് നൽകുന്നതെന്ന് വ്യക്തമാക്കുന്ന മറ്റൊരു വൈറൽ കാഴ്ചയായി ഇത് മാറുകയായിരുന്നു. പണവും കാർഡും ഇല്ലാതെ മൊബൈൽ ഫോൺ ഉപയോഗിച്ച് നിമിഷങ്ങൾക്കുള്ളിൽ പണമടയ്ക്കാൻ കഴിയുന്ന സൗകര്യം തന്നെയാണ് ഫ്രഞ്ച് യുവതിയുടെ അമ്പരപ്പിന് പിന്നിലെ പ്രധാന കാരണം.