‘ഫ്രീയാണെന്ന് കരുതി എടുത്തത് കാലാവധി കഴിഞ്ഞ ചോക്ലേറ്റുകൾ’; കാൺപൂരിൽ കൂട്ടമായി ശേഖരിച്ച് ആളുകൾ, വീഡിയോ വൈറൽ

ചിലപ്പോൾ സൗജന്യമായി കിട്ടുന്നതെന്തും സ്വന്തമാക്കാനുള്ള ആവേശം അപകടത്തിലേക്കും നയിച്ചേക്കാം. കാൺപൂരിലെ പാങ്കി ഇൻഡസ്ട്രിയൽ ഏരിയയിൽ നിന്നുള്ള ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുന്നത്. റോഡരികിലെ മാലിന്യക്കൂമ്പാരത്തിൽ ഉപേക്ഷിച്ച നിലയിൽ കിടന്നിരുന്ന ചോക്ലേറ്റുകളും ടോഫികളും ശേഖരിക്കാൻ വലിയൊരു ജനക്കൂട്ടം ഓടിയെത്തുന്നതാണ് വീഡിയോയിൽ കാണുന്നത്.

റിപ്പോർട്ടുകൾ പ്രകാരം, വിൽപ്പനയ്ക്ക് അനുയോജ്യമല്ലെന്ന് കണ്ടെത്തിയ ചോക്ലേറ്റുകളും ടോഫികളും ഒരു ഫാക്ടറിയിൽ നിന്ന് ട്രക്കിലെത്തിച്ച് സ്ഥലത്ത് ഉപേക്ഷിച്ചതായാണ് വിവരം. വിവരം പരന്നതോടെ ആളുകൾ കൂട്ടത്തോടെ സ്ഥലത്തെത്തി ചോക്ലേറ്റുകൾ ബാഗുകളിലും ചാക്കുകളിലും കാർട്ടൺ പെട്ടികളിലുമാക്കി ശേഖരിക്കാൻ തുടങ്ങി. ചിലർ സൈക്കിളുകളിലും ഇരുചക്രവാഹനങ്ങളിലും കാറുകളിലുമാണ് സാധനങ്ങൾ കൊണ്ടുപോയതെന്നും റിപ്പോർട്ടുകളുണ്ട്.

എന്നാൽ ഇവയിൽ പലതും 2024ൽ തന്നെ കാലാവധി കഴിഞ്ഞവയാണെന്ന് പ്രാദേശികർ പറഞ്ഞതായി റിപ്പോർട്ടുകളുണ്ട്. വീഡിയോ പകർത്തിയയാൾ ആളുകളോട് ചോക്ലേറ്റുകൾ കഴിക്കരുതെന്ന് മുന്നറിയിപ്പ് നൽകിയെങ്കിലും പലരും അത് അവഗണിച്ച് സാധനങ്ങൾ ശേഖരിച്ചതായും പറയുന്നു. കാലാവധി കഴിഞ്ഞ ഭക്ഷ്യവസ്തുക്കൾ കഴിക്കുന്നത് ആരോഗ്യത്തിന് ഗുരുതരമായ അപകടം സൃഷ്ടിക്കാമെന്ന ആശങ്കയാണ് സംഭവത്തിന് പിന്നാലെ ഉയരുന്നത്.

വീഡിയോ വൈറലായതോടെ ഭക്ഷ്യസുരക്ഷയും കാലാവധി കഴിഞ്ഞ ഉൽപ്പന്നങ്ങൾ എങ്ങനെ നശിപ്പിക്കണം എന്നതുമെല്ലാം ചർച്ചയാകുകയാണ്. സംഭവത്തെക്കുറിച്ച് അധികൃതർക്ക് വിവരം ലഭിച്ചതായും പാങ്കി പൊലീസ് സ്റ്റേഷനിലെ ഉദ്യോഗസ്ഥരോട് അന്വേഷണം നടത്താൻ നിർദേശം നൽകിയതായും റിപ്പോർട്ടുകളുണ്ട്. അതേസമയം, ചോക്ലേറ്റുകളുടെ കൃത്യമായ കാലാവധി സംബന്ധിച്ച വിവരങ്ങൾ അധികൃതർ ഔദ്യോഗികമായി സ്ഥിരീകരിച്ചിട്ടില്ല.