12-ാം നിലയിലെ മേൽക്കൂരയിൽ കുടുങ്ങി ​തെരുവുനായ: എങ്ങനെ എത്തിയെന്ന് സോഷ്യല്‍ മീഡിയ, ഒടുവില്‍ രക്ഷ

റോഡിലൂടെ പോകുമ്പോൾ പെട്ടെന്ന് മുകളിലേക്ക് നോക്കിയാൽ ഒരു കെട്ടിടത്തിന്റെ മേൽക്കൂരയിൽ ഒരു നായ നിൽക്കുന്നത് കണ്ടാൽ എന്തായിരിക്കും അവസ്ഥ? അതും താഴെയല്ല, 12-ാം നിലയിലെ മേൽക്കൂരയിൽ! ഹരിയാനയിൽ നിന്നുള്ള അത്തരമൊരു കാഴ്ചയാണ് ഇപ്പോൾ സോഷ്യൽ മീഡിയയിൽ കൗതുകമാകുന്നത്. നായ അവിടെ എങ്ങനെ എത്തിയെന്ന ചോദ്യമാണ് വീഡിയോ കണ്ടവരെയെല്ലാം ഒരുപോലെ അമ്പരപ്പിക്കുന്നത്.

ഹരിയാനയിലെ സോഹ്ന റോഡിന് സമീപമുള്ള ഉപേക്ഷിക്കപ്പെട്ട കെട്ടിടത്തിന്റെ 12-ാം നിലയിലെ മേൽക്കൂരയിലാണ് തെരുവുനായ കുടുങ്ങിക്കിടന്നത്. മേൽക്കൂരയിൽ ഒറ്റപ്പെട്ട നിലയിൽ നിൽക്കുന്ന നായയെ ശ്രദ്ധയിൽപ്പെട്ട ഒരു വഴിയാത്രക്കാരനാണ് വിവരം ബന്ധപ്പെട്ടവരെ അറിയിച്ചത്. ഏറെ ഉയരത്തിലുള്ള സ്ഥലമായതിനാൽ നായയ്ക്ക് സ്വയം താഴേക്ക് ഇറങ്ങാൻ കഴിയാത്ത അവസ്ഥയിലായിരുന്നു.

വിവരം ലഭിച്ചതിന് പിന്നാലെ രക്ഷാപ്രവർത്തകർ സ്ഥലത്തെത്തി നായയെ സുരക്ഷിതമായി താഴെയെത്തിക്കുകയായിരുന്നു. മേൽക്കൂരയിൽ നിന്ന് താഴേക്ക് വീഴാനുള്ള സാധ്യതയുണ്ടായിരുന്നതിനാൽ രക്ഷാപ്രവർത്തനം ഏറെ ശ്രദ്ധയോടെയാണ് നടത്തിയത്. ഒടുവിൽ നായയെ സുരക്ഷിതമായി രക്ഷപ്പെടുത്താനായതോടെ ആശങ്കയ്ക്കും വിരാമമായി.

എന്നാൽ നായ എങ്ങനെയാണ് 12-ാം നിലയിലെ മേൽക്കൂരയിലെത്തിയതെന്ന ചോദ്യത്തിന് ഇപ്പോഴും വ്യക്തമായ ഉത്തരമില്ല. സംഭവത്തിന്റെ ദൃശ്യങ്ങൾ പുറത്തുവന്നതോടെ സോഷ്യൽ മീഡിയയിലും ഇതേ ചോദ്യം തന്നെയാണ് ഉയരുന്നത്. ഉപേക്ഷിക്കപ്പെട്ട കെട്ടിടത്തിലേക്ക് നായ എങ്ങനെയെങ്കിലും കയറിയതാകാമെന്നാണ് കരുതുന്നത്.