നിവിന്റെ അനിയനായി നസ്ലെനെ ആലോചിച്ചിരുന്നു, പക്ഷേ.....; തുറന്നു പറഞ്ഞ് ഗിരീഷ് എഡി

ഗിരീഷ് എഡി ചിത്രം ബെത്‌ലഹേം കുടുംബ യൂണിറ്റ് തിയേറ്ററുകളില്‍ വിജയകരമായി പ്രദര്‍ശനം തുടരുകയാണ്. ചിത്രത്തിലെ നിവിന്‍ പോളി-മമിത ബൈജു കോമ്പോയും മറ്റ് സഹതാരങ്ങളുമെല്ലാം ഗംഭീരപ്രകടനമാണ് കാഴ്ചവെച്ചിരിക്കുന്നത്.

ബെത്ലഹേം കുടുംബ യൂണിറ്റിലെ കയ്യടി നേടുന്ന കഥാപാത്രങ്ങളിലൊന്നാണ് സംഗീത് പ്രതാപ് അവതരിപ്പിച്ച ജോയല്‍ ഡേവിസ്. അതേസമയം ഈ കഥാപാത്രം നസ്ലെന് നന്നായി ചേരുന്നതായിരുന്നുവെന്നും ചിലര്‍ അഭിപ്രായപ്പെടുന്നുണ്ട്. ഇതേക്കുറിച്ച് സംസാരിക്കുകയാണ് സംവിധായകന്‍ ഗിരീഷ് എഡി.

വളരെ മുമ്പ് തന്നെ ഗിരീഷ് ആലോചിച്ചിരുന്ന ചിത്രമാണ് ബെത്ലഹേം കുടുംബ യൂണിറ്റ്. തുടക്കകാലത്ത് ജസ്റ്റിന്റെ അനിയന്‍ വേഷത്തിലേക്ക് നസ്ലെനെ ആലോചിച്ചിരുന്നുവെന്നാണ് ഗിരീഷ് പറയുന്നത്. ക്ലബ് എഫ്എമ്മിന് നല്‍കിയ അഭിമുഖത്തിലാണ് ഗിരീഷ് മനസ് തുറന്നത്.

'ഈ സിനിമ ആലോചിക്കുന്ന സമയത്ത് അങ്ങനെയുള്ള ഓപ്ഷന്‍ വന്നിരുന്നു. പിന്നെ സൈഡ് റോളിലേക്ക് വിളിക്കാന്‍ പറ്റില്ലല്ലോ. സംഗീതും ഇപ്പോള്‍ നായകനായി വന്നിരുന്നു. പക്ഷെ സംഗീത് നമ്മളോടുള്ള സ്നേഹം കൊണ്ട് വന്നതാണ്.'' ഗിരീഷ് പറയുന്നു.

പ്രേമലു 2 എന്തുകൊണ്ട് മാറ്റിവച്ചു? എന്ന ചോദ്യത്തിനും ഗിരീഷ് മറുപടി നല്‍കുന്നുണ്ട്. ''അതിന് ഇപ്പോള്‍ മറുപടി പറഞ്ഞു കഴിഞ്ഞാല്‍ നമ്മുടെ പടം വിജയിച്ചതോടെ ആരെയൊക്കയോ ഇതിലേക്ക് വലിച്ചിഴയ്ക്കുന്നത് പോലെ തോന്നും. കുറച്ചും കൂടി കഴിഞ്ഞിട്ട് അതെക്കുറിച്ച് വിശദമായി ചര്‍ച്ച ചെയ്യാം. ഒരുപാട് പറയാനുള്ള വിഷയം ആണത്'' എന്നാണ് ഗിരീഷ് പറയുന്നത്.