മുംബൈ: പ്രധാനമന്ത്രി നരേന്ദ്ര മോദി പങ്കെടുക്കുന്ന മുംബൈയിലെ പരിപാടിക്ക് തൊട്ടുമുമ്പ് വലിയ സുരക്ഷാ വീഴ്ച. മുംബൈയിലെ പരിവേദന വേദിയായ ബാന്ദ്ര കുർള കോംപ്ലക്സിലെ നിത മുകേഷ് അംബാനി കൾച്ചറൽ സെന്ററിൽ സംശയാസ്പദമായ രീതിയിൽ ചുറ്റിനടന്ന രണ്ട് പേരെ മുംബൈ പൊലീസ് കസ്റ്റഡിയിലെടുത്തു. ഇവരിൽ ഒരാളുടെ കൈവശം തോക്കും വ്യാജ പ്രധാനമന്ത്രിയുടെ ഓഫീസ് (പിഎംഒ) തിരിച്ചറിയൽ കാർഡും കണ്ടെത്തി.
24 കാരനായ രോഹൻ പരേഖ് എന്നയാളും അദ്ദേഹത്തിന്റെ അംഗരക്ഷകനെന്നു കരുതുന്ന ആളുമാണ് പൊലീസിന്റെ പിടിയിലായത്. രോഹൻ പരേഖിന്റെ കൈവശം വ്യാജ പിഎംഒ ഐഡി കാർഡ് ഉണ്ടായിരുന്നതായി പൊലീസ് സ്ഥിരീകരിച്ചു. അംഗരക്ഷകന്റെ കൈവശമുണ്ടായിരുന്ന തോക്ക് പൊലീസ് പിടിച്ചെടുത്തിട്ടുണ്ട്.
സംശയാസ്പദമായ രീതിയിൽ ഇവർ ചുറ്റിനടക്കുന്നത് ശ്രദ്ധയിൽപ്പെട്ടതിനെ തുടർന്ന് സുരക്ഷാ ഉദ്യോഗസ്ഥർ ഉടൻ തന്നെ ഇരുവരെയും കസ്റ്റഡിയിലെടുക്കുകയായിരുന്നു. ഈ സംഭവത്തിന് പിന്നിലെ യഥാർത്ഥ ലക്ഷ്യമെന്താണെന്നും, വ്യാജ പിഎംഒ ഐഡി കാർഡ് എവിടെ നിന്നാണ് നിർമ്മിച്ചെടുത്തത് എന്നതിനെക്കുറിച്ചും മുംബൈ ക്രൈംബ്രാഞ്ച് അന്വേഷണം ഊർജ്ജിതമാക്കിയിട്ടുണ്ട്. പ്രധാനമന്ത്രിയുടെ സന്ദർശനത്തോടനുബന്ധിച്ച് എസ്പിജി സുരക്ഷാ ക്രമീകരണങ്ങൾ ശക്തമാക്കിയിരിക്കുന്നതിനിടയിലാണ് ഈ ഗുരുതരമായ സുരക്ഷാ വീഴ്ചയുണ്ടായത്.
Comments