തിരുവനന്തപുരം: വൈദ്യുതി പ്രതിസന്ധി സ്വിച്ച് ഇട്ടതുപോലെ പെട്ടെന്ന് പരിഹരിക്കാനാകില്ലെന്ന് വൈദ്യുതി മന്ത്രി സണ്ണി ജോസഫ്. അടിയന്തര സാഹചര്യം കണക്കിലെടുത്താണ് പവർകട്ട് ഉൾപ്പെടെയുള്ള നിയന്ത്രണങ്ങൾ ഏർപ്പെടുത്തുന്നതെന്നും മന്ത്രി വ്യക്തമാക്കി.
കേരളം മാത്രം നിയന്ത്രണം ഏർപ്പെടുത്തുന്ന സാഹചര്യമല്ല നിലവിലുള്ളത്. സംസ്ഥാനത്ത് ആവശ്യമായ വൈദ്യുതിയുടെ 25 ശതമാനം മാത്രമാണ് ഉത്പാദിപ്പിക്കുന്നത്. ബാക്കി വൈദ്യുതിക്കായി മറ്റു സംസ്ഥാനങ്ങളെ ആശ്രയിക്കേണ്ടിവരുന്നു. ആവശ്യത്തിന് വൈദ്യുതി ലഭ്യമാകാത്ത സാഹചര്യത്തിലാണ് നിയന്ത്രണം ഏർപ്പെടുത്തേണ്ടിവന്നതെന്നും മന്ത്രി പറഞ്ഞു.
ജനങ്ങളുടെ ബുദ്ധിമുട്ട് സർക്കാർ മനസ്സിലാക്കുന്നുണ്ട്. അതിൽ ഖേദമുണ്ടെന്നും സാഹചര്യം മനസ്സിലാക്കി എല്ലാവരും സഹകരിക്കണമെന്നും മന്ത്രി അഭ്യർത്ഥിച്ചു. രാത്രി 12 മണിക്ക് ശേഷവും പീക്ക് സമയമായി കണക്കാക്കേണ്ട സാഹചര്യമാണുള്ളത്. നിയന്ത്രണ സമയം കൃത്യമായി മുൻകൂട്ടി അറിയിക്കാൻ കഴിയില്ലെങ്കിലും ഏകദേശ സമയം അറിയിച്ച് നിയന്ത്രണം ഏർപ്പെടുത്താൻ ശ്രമിക്കുമെന്നും അദ്ദേഹം വ്യക്തമാക്കി.
ആര്യാടൻ മുഹമ്മദിന്റെ കാലത്തെ വൈദ്യുതി കരാർ സംബന്ധിച്ച കേസ് കോടതിയുടെ പരിഗണനയിലാണ്. കോടതിയുടെ പരിഗണനയിലുള്ള വിഷയത്തിൽ സർക്കാരിന് എന്ത് ചെയ്യാനാകുമെന്നും മന്ത്രി ചോദിച്ചു. കേസിൽ അനുകൂല വിധിയുണ്ടാകുന്നതിനായി മികച്ച അഭിഭാഷകനെ ചുമതലപ്പെടുത്തിയിട്ടുണ്ടെന്നും അദ്ദേഹം പറഞ്ഞു.
വൈദ്യുതി പ്രതിസന്ധി അപ്രതീക്ഷിതമായുണ്ടായതാണ്. മഴയുടെ കുറവ് വളരെ പെട്ടെന്നാണ് ഉണ്ടായത്. ഇടുക്കിക്ക് ശേഷം സംസ്ഥാനത്ത് വലിയ ജലവൈദ്യുത പദ്ധതികൾ ആരംഭിച്ചിട്ടില്ല. ഇതുമൂലം വൈദ്യുതി ഉപഭോഗത്തിൽ സ്വയംപര്യാപ്തത കൈവരിക്കാൻ കേരളത്തിന് കഴിയുന്നില്ലെന്നും മന്ത്രി ചൂണ്ടിക്കാട്ടി.
അതിരപ്പിള്ളി പദ്ധതിയുടെ കാര്യത്തിൽ തനിക്ക് ഒറ്റയ്ക്ക് തീരുമാനമെടുക്കാനാകില്ലെന്നും സർക്കാരാണ് തീരുമാനമെടുക്കേണ്ടതെന്നും സണ്ണി ജോസഫ് പറഞ്ഞു. വൈദ്യുതി നിയന്ത്രണ പ്രതിസന്ധി എത്രയും വേഗം അവസാനിപ്പിക്കാനാണ് ശ്രമം. കാലാവസ്ഥ അനുകൂലമായാൽ ഒക്ടോബറിൽ പ്രതിസന്ധിയുണ്ടാകില്ലെന്നും മന്ത്രി കൂട്ടിച്ചേർത്തു.
Comments