അസമിലെ ഗോലാഘട്ട് ജില്ലയിൽ നിന്നുള്ള ഞെട്ടിക്കുന്ന കാഴ്ചയാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. കഴുത്തിൽ മുറുകിക്കിടക്കുന്ന വലിയ ട്രാക്ടർ ടയറുമായി കാട്ടിലൂടെ അലഞ്ഞുനടക്കുന്ന ആനയെയാണ് കണ്ടെത്തിയത്. ടയർ മുറുകിയതോടെ വലിയ ബുദ്ധിമുട്ടിലായ ആനയുടെ ദൃശ്യങ്ങൾ പുറത്തുവന്നതോടെ സംഭവം വലിയ ശ്രദ്ധ നേടി.
കഴുത്തിന് ചുറ്റും ടയർ കുടുങ്ങിയ നിലയിൽ ആനയെ കണ്ടെത്തിയതോടെയാണ് രക്ഷാപ്രവർത്തനം ആരംഭിച്ചത്. ടയർ എങ്ങനെയാണ് ആനയുടെ കഴുത്തിൽ കുടുങ്ങിയതെന്ന് വ്യക്തമായിട്ടില്ല. എന്നാൽ മുറുകിക്കിടന്ന ടയർ ആനയുടെ ജീവന് തന്നെ ഭീഷണിയാകാവുന്ന സാഹചര്യമായിരുന്നു. മനുഷ്യർ ഉപേക്ഷിക്കുന്ന വസ്തുക്കൾ വന്യമൃഗങ്ങൾക്ക് എത്രത്തോളം അപകടകരമാകാം എന്നതും സംഭവം വ്യക്തമാക്കുന്നു.
കസിരംഗയിലെ സെന്റർ ഫോർ വൈൽഡ്‌ലൈഫ് റീഹാബിലിറ്റേഷൻ ആൻഡ് കൺസർവേഷൻ സംഘവും ഗോലാഘട്ട് ഫോറസ്റ്റ് ഡിവിഷനും പ്രദേശവാസികളും ചേർന്നാണ് രക്ഷാപ്രവർത്തനം നടത്തിയത്. ഏറെ ശ്രദ്ധയോടെയുള്ള ഇടപെടലിനൊടുവിൽ ആനയുടെ കഴുത്തിൽ മുറുകിക്കിടന്ന ടയർ വിജയകരമായി നീക്കം ചെയ്തു. ഇതോടെ അപകടകരമായ അവസ്ഥയിൽ നിന്ന് ആനയ്ക്ക് മോചനം ലഭിച്ചു.
ടയർ നീക്കം ചെയ്തതോടെ ആനയ്ക്ക് പുതുജീവൻ ലഭിച്ചെങ്കിലും സംഭവത്തിന് പിന്നിലെ കാരണം ഇപ്പോഴും വ്യക്തമല്ല. വനമേഖലകളിൽ ഉപേക്ഷിക്കുന്ന ടയറുകളും മറ്റ് മനുഷ്യനിർമിത വസ്തുക്കളും വന്യമൃഗങ്ങൾക്ക് കെണിയാകാനുള്ള സാധ്യതയിലേക്കാണ് സംഭവം വിരൽചൂണ്ടുന്നത്. രക്ഷാപ്രവർത്തനത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ ആനയെ രക്ഷിച്ച സംഘത്തിന് അഭിനന്ദനങ്ങളുമായി നിരവധി പേരാണ് രംഗത്തെത്തുന്നത്.
Comments