കപൂര്‍ കുടുംബത്തില്‍ നിന്നെത്തി ബിഗ്സ്ക്രീനില്‍ തങ്ങളുടേതായ ഇടം നേടിയെടുത്ത സഹോദരിമാരാണ് കരീന കപൂര്‍ ഖാനും. 1990-കളിൽ ബോളിവുഡിൽ നിറഞ്ഞുനിന്ന മുൻനിര നായികയായിരുന്നു കരിഷ്മ. മികച്ച അഭിനയത്തിലൂടെയും നൃത്തത്തിലൂടെയുമാണ് കരിഷ്മ എന്ന ലോലു ആരാധകരെ നേടിയെടുത്തത്. എന്നാല്‍ കരീനയാകട്ടെ അഭിനയ മികവും സ്റ്റൈലും കൊണ്ടാണ് ബോളിവുഡിൽ തന്റേതായ ഇടം കണ്ടെത്തിയത്.
വിവാഹശേഷവും കരിയറും കുടുംബജീവിതവും മികച്ച രീതിയില്‍ ബാലന്‍സ് ചെയ്തു കൊണ്ടുപോകുന്ന താരം കൂടിയാണ് കരീന. സഹോദരിയും നടിയുമായ കരീന കപൂര്‍ ഖാനെപ്പറ്റി പറയുമ്പോള്‍ നൂറു നാവാണ് കരിഷ്മയ്ക്ക്. പരസ്പരം ഏറ്റവും വലിയ ആത്മവിശ്വാസവും താങ്ങുമാണ് തങ്ങള്‍ എന്ന് കരിഷ്മ പലപ്പോഴും പറഞ്ഞിട്ടുണ്ട്.
തന്റെ ഏറ്റവും പുതിയ സിനിമയായ ‘ദായ്റ’യുടെ പ്രൊമോഷന്‍ തിരക്കിലാണ് കരീനയിപ്പോള്‍. ഇക്കഴിഞ്ഞ ദിവസം പ്രൊമോഷന്റെ ഭാഗമായുള്ള അഭിമുഖത്തില്‍ കരീന ധരിച്ച സാരി ഏറെ ശ്രദ്ധിക്കപ്പെട്ടിരുന്നു. മഴവില്ലിന്റെ നിറഭേദങ്ങളുള്ള ഒരു ഷിഫോൺ സാരിയാണ് കരീന ചടങ്ങില്‍ അണിഞ്ഞത്. കരീനയുടെ ഈ സാരി ‘സുബൈദ’ എന്ന ചിത്രത്തിൽ സഹോദരി കരിഷ്മ കപൂർ ധരിച്ച സാരിയാണ് പ്രേക്ഷകരെ ഓര്‍മ്മിപ്പിച്ചത്. കരീന ധരിച്ചതുമായി ഏതാണ്ട് സമാനമായ ഒരു സാരിയാണ് കരിഷ്മ ആ സിനിമയില്‍ ധരിച്ചിരുന്നത്.
ഇപ്പോഴിതാ ‘സുബൈദ’യിലെ കരിഷ്മയുടെ വേഷവും തന്റെ സാരിയും ഒരുമിച്ചുള്ള കൊളാഷ് പങ്കിട്ടിരിക്കുകയാണ് കരീന കപൂര്‍ ഖാന്‍. സാരികള്‍ തമ്മിലുള്ള സാമ്യം എടുത്തു കാട്ടുന്നതാണ് കരീനയുടെ ഇന്‍സ്റ്റഗ്രാം സ്റ്റോറി.
‘‘നല്ല അഭിരുചിയുണ്ടെന്ന് ഞങ്ങൾക്ക് എപ്പോഴും അറിയാമായിരുന്നു... എന്നേക്കും സഹോദരിമാർ...’’ എന്ന കുറിപ്പിനൊപ്പമാണ് കരീന കപൂര്‍ ഖാന്‍ ഇന്‍സ്റ്റഗ്രാം സ്റ്റോറിയില്‍ തന്റെയും കരിഷ്മയുടെയും ചിത്രങ്ങള്‍ പങ്കിട്ടിരിക്കുന്നത്.
.
മേഘ്ന ഗുൽസാർ സംവിധാനം ചെയ്യുന്ന ‘ദായ്റ’യിൽ കരീന കപൂർ ഖാനും പൃഥ്വിരാജ് സുകുമാരനുമാണ് പ്രധാന വേഷങ്ങളില്‍ എത്തുന്നത്. കൗമാരപ്രായക്കാർക്കിടയിലുള്ള കുറ്റകൃത്യങ്ങളുടെ ഇരുണ്ടതും സങ്കീർണ്ണവുമായ ലോകത്തിലൂടെ സഞ്ചരിക്കുന്ന രണ്ട് പോലീസ് ഉദ്യോഗസ്ഥരുടെ കഥയാണ് ചിത്രം പറയുന്നത്. പരസ്പരം ഏറ്റുമുട്ടേണ്ടി വരുന്ന ഈ രണ്ട് പോലീസ് ഉദ്യോഗസ്ഥരായി എത്തുന്നത് കരീനയും പൃഥ്വിരാജ് സുകുമാരനുമാണ്. ചിത്രത്തിൽ പൊലീസ് ഉദ്യോഗസ്ഥയായ അജൂനിയായി കരീനയും രമണ്‍ കുമാറായി പൃഥ്വിരാജും മത്സരിച്ചാണ് അഭിനയിച്ചിരിക്കുന്നത്. പെൻ സ്റ്റുഡിയോസും ജംഗിൾ മ്യൂസിക്കും ചേർന്ന് നിർമിക്കുന്ന ചിത്രം സെപ്റ്റംബർ 18ന് പ്രദർശനത്തിനെത്തും.
Comments