ദാവൂദ് ഇബ്രാഹിം ക്ഷണിച്ചിരുന്നില്ല; ദാവൂദുമൊത്തുള്ള വിവാദ ചിത്രത്തെക്കുറിച്ച് മന്ദാകിനി

മുംബൈ:വർഷങ്ങൾക്ക് മുമ്പ് അധോലോക ഡോൺ ദാവൂദ് ഇബ്രാഹിമിനൊപ്പമുള്ള തന്റെ വിവാദ ചിത്രത്തെക്കുറിച്ച് മുതിർന്ന ബോലിവുഡ് നടി മന്ദാകിനി തുറന്നുപറയുന്നു. തന്നെ അദ്ദേഹം ക്ഷണിച്ചിരുന്നില്ലെന്നും ഒരു ഷോയ്ക്കായി ദുബായിലേക്ക് പോയ താൻ പിന്നീട് ക്രിക്കറ്റ് മാച്ച് കാണാൻ പോയപ്പോഴാണ് ആ ഫോട്ടോ എടുത്തതെന്നും അവർ വ്യക്തമാക്കി.

ആ ചിത്രത്തിന് ശേഷം വന്ന ഊഹാപോഹങ്ങളിലും റിപ്പോർട്ടുകളിലും തനിക്ക് നിയന്ത്രണമുണ്ടായിരുന്നില്ലെന്ന് മന്ദാകിനി പറഞ്ഞു. ഒരു കലാകാരി എന്ന നിലയിൽ താൻ നിരവധി ആളുകളെ കണ്ടുമുട്ടാറുണ്ടെന്നും അവരിൽ ആരെയും താൻ വേർതിരിച്ചു കണ്ടിട്ടില്ലെന്നും അവർ കൂട്ടിച്ചേർത്തു. ആ ഫോട്ടോ പിന്നീട് വലിയ വിവാദങ്ങൾക്കും വ്യാപകമായ ഊഹാപോഹങ്ങൾക്കും കാരണമാവുകയും, അത് തന്റെ സിനിമാജീവിതത്തെ സാരമായി ബാധിക്കുകയും ചെയ്തതായി മന്ദാകിനി പറഞ്ഞു.

രാജ് കപൂർ സംവിധാനം ചെയ്ത 'രാം തേരി ഗംഗാ മൈലി' എന്ന ചിത്രത്തിലെ പ്രധാന വേഷത്തിലൂടെയാണ് അവർ പ്രശസ്തയായത്. ചിത്രം വൻ വിജയമാവുകയും 1980-കളിലെ മുൻനിര നടിമാരിൽ ഒരാളായി മന്ദാകിനിയെ മാറ്റുകയും ചെയ്തു. തന്റെ കരിയറിൽ 75-ൽ അധികം സിനിമകളിൽ അവർ അഭിനയിച്ചു. അനിൽ കപൂർ, മിഥുൻ ചക്രവർത്തി, ഗോവിന്ദ തുടങ്ങിയ നിരവധി പ്രമുഖ നടന്മാർക്കൊപ്പവും അവർ അഭിനയിച്ചിട്ടുണ്ട്.