ന്യൂഡൽഹി: ഇന്ത്യൻ ഓപ്പണർ അഭിഷേക് ശർമ്മഅഫ്ഗാനെതിരെ തകർപ്പൻ ബാറ്റിംഗ് കാഴ്ചവെച്ചശേഷം നടത്തിയ 'ഓം നമഃ ശിവായ' ജപം സോഷ്യൽ മീഡിയയിൽ ആരാധകരുടെ ശ്രദ്ധ പിടിച്ചുപറ്റി. ടി20 മത്സരങ്ങളിൽ ഇന്ത്യയ്ക്കായി ഏറ്റവും വേഗത്തിൽ സെഞ്ച്വറി നേടിയതിന്റെ ആവേശത്തിലായിരുന്നു അഭിഷേക്.എന്നാൽ തീപാറുന്ന ബാറ്റിംഗിന് നേരെ വിപരീതമായി, ശാന്തമായായിരുന്നു നാമജപവും യോഗ സ്ഥിതിയും.
വ്യാഴാഴ്ച ഡൽഹി അരുൺ ജെയ്റ്റ്‌ലി സ്റ്റേഡിയത്തിൽ നടന്ന മൂന്നാം ടി20യിൽ 34 പന്തിൽ നിന്ന് 9 ഫോറുകളും 11 സിക്സറുകളും അടക്കം 108 റൺസാണ് അഭിഷേക് അടിച്ചുകൂട്ടിയത്. 16 പന്തിൽ അർദ്ധസെഞ്ച്വറിയും 30 പന്തിൽ സെഞ്ച്വറിയും അദ്ദേഹം പൂർത്തിയാക്കി. റെക്കോർഡ് നേട്ടത്തിലെത്തിയ ശേഷം, അഭിഷേക് മൈതാനത്ത് പത്മാസനത്തിൽ ഇരുന്ന് പ്രാർത്ഥനയിലും ധ്യാനത്തിലും കാണാറുള്ളതുപോലെ കൈകൾ കൂപ്പി 'ഓം നമഃ ശിവായ' ജപിച്ചു. അദ്ദേഹത്തിന്റെ അസാധാരണമായ ഇന്നിങ്സിലെ ഏറ്റവും മികച്ച നിമിഷങ്ങളിലൊന്നായി ഇത് മാറി. മത്സരത്തിന്റെ തുടക്കം മുതൽ അഫ്ഗാൻ ബൗളർമാരെ കടന്നാക്രമിച്ച ശേഷമായിരുന്നു ഈ ആഘോഷം.
2017-ൽ ശ്രീലങ്കയ്‌ക്കെതിരെ രോഹിത് ശർമ്മ നേടിയ 35 പന്ത് സെഞ്ച്വറിയുടെ റെക്കോർഡാണ് അഭിഷേക് 30 പന്തിൽ സെഞ്ച്വറി നേടി തകർത്തത്. ടി20യിൽ ഇന്ത്യയ്ക്കായി ഏറ്റവും വേഗമേറിയ സെഞ്ച്വറി നേടുന്ന താരമായി അദ്ദേഹം മാറി. റാഷിദ് ഖാന്റെ പന്തിൽ റഹ്മാനുള്ള ഗുർബാസ് പിടിച്ച് പുറത്താകുമ്പോൾ 34 പന്തിൽ 108 റൺസായിരുന്നു അഭിഷേകിന്റെ സമ്പാദ്യം.
ടോസ് നേടിയ അഫ്ഗാനിസ്ഥാൻ ഫീൽഡിങ് തിരഞ്ഞെടുക്കുകയായിരുന്നു. അഭിഷേകിന്റെ തകർപ്പൻ ബാറ്റിംഗിന്റെ പിൻബലത്തിൽ ഇന്ത്യ 9.5 ഓവറിൽ 1 വിക്കറ്റ് നഷ്ടത്തിൽ 142 റൺസിലെത്തി. ഒരു ഫോറും മൂന്ന് സിക്സറുകളും ഉൾപ്പെടെ 25 പന്തിൽ 34 റൺസെടുത്ത് സഞ്ജു സാംസൺ പുറത്താകാതെ നിന്നു.
Comments