വഴിയോരത്ത് ഭേൽ വിൽപ്പന നടത്തുകയായിരുന്നയാളെ ഒരാൾ മർദിക്കുകയും ഭക്ഷണസാധനങ്ങൾ റോഡിലേക്ക് വലിച്ചെറിയുകയും ചെയ്യുന്ന ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. ബിഹാറിലാണ് സംഭവം നടന്നതെന്നാണ് പ്രചരിക്കുന്ന വീഡിയോയിൽ പറയുന്നത്. വഴിയോര കച്ചവടക്കാരന്റെ അടുത്തെത്തിയ ഒരാൾ ഇയാളെ മർദിച്ച ശേഷം ഭേലിനായി തയ്യാറാക്കി വച്ചിരുന്ന മുറിയും മറ്റ് ചേരുവകളും റോഡിലേക്ക് വലിച്ചെറിയുന്നതാണ് ദൃശ്യങ്ങളിലുള്ളത്.
സംഭവത്തിനിടെ കച്ചവടക്കാരൻ നിസഹായനായി നിൽക്കുന്നതും സമീപത്തുണ്ടായിരുന്ന ചിലർ കാഴ്ചക്കാരായി നിൽക്കുന്നതും വീഡിയോയിൽ കാണാം. ഭക്ഷണസാധനങ്ങൾ മുഴുവൻ റോഡിൽ ചിതറിക്കിടക്കുന്ന നിലയിലാകുന്നതും ദൃശ്യങ്ങളിൽ വ്യക്തമാണ്. സംഭവത്തിന്റെ കാരണം എന്താണെന്ന് വ്യക്തമല്ല. അതേസമയം, വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ നിരവധി പേർ ശക്തമായ നടപടി ആവശ്യപ്പെട്ട് രംഗത്തെത്തി.
വീഡിയോ പങ്കുവെച്ചുകൊണ്ട് ബിഹാർ പൊലീസിനെ ടാഗ് ചെയ്ത് സംഭവത്തിൽ ഇടപെടണമെന്ന് ആവശ്യപ്പെട്ടവരുമുണ്ട്. കച്ചവടക്കാരന് സംഭവിച്ച നഷ്ടം ആരോപണവിധേയനായ വ്യക്തിയിൽ നിന്ന് തന്നെ ഈടാക്കണമെന്നും കർശന നടപടി സ്വീകരിക്കണമെന്നും ചിലർ ആവശ്യപ്പെട്ടു. എന്നാൽ വീഡിയോ യഥാർഥ സംഭവമാണോ അതോ ചിത്രീകരിച്ചതാണോ എന്ന കാര്യത്തിൽ ചില സോഷ്യൽ മീഡിയ ഉപയോക്താക്കൾ സംശയവും ഉന്നയിച്ചിട്ടുണ്ട്.
വീഡിയോയുടെ യാഥാർഥ്യം സ്ഥിരീകരിച്ചിട്ടില്ല. സംഭവത്തിന്റെ കൃത്യമായ തീയതിയും സ്ഥലവും ഇതുവരെ വ്യക്തമായിട്ടില്ല. അതേസമയം, വൈറൽ ദൃശ്യങ്ങളിൽ ബിഹാർ പൊലീസും പട്‌ന പൊലീസും ശ്രദ്ധ ചെലുത്തിയിട്ടുണ്ട്. വിഷയം പരിശോധിച്ച് ആവശ്യമായ നടപടി സ്വീകരിക്കണമെന്ന് ബിഹാർ പൊലീസ് പട്‌ന പൊലീസിനോട് നിർദേശിച്ചു. തുടർന്ന് കേസ് ബന്ധപ്പെട്ട ഉദ്യോഗസ്ഥന് കൈമാറിയതായി പട്‌ന പൊലീസ് അറിയിച്ചു. സംഭവത്തിൽ ഔദ്യോഗിക പരാതി നൽകിയിട്ടുണ്ടോ എന്നതും വ്യക്തമല്ല.
Comments