പത്തനംതിട്ട: ശബരിമലയില്‍ നിന്നും സ്വര്‍ണ്ണകിരീടം നഷ്ടപ്പെട്ടെന്ന വാര്‍ത്തകള്‍ നിഷേധിച്ച് തിരുവാഭരണം കമ്മീഷണര്‍. ശബരിമലയിലെ സ്വര്‍ണ്ണകിരീടം നഷ്ടപ്പെട്ടിട്ടില്ലെന്നും സ്‌ട്രോംഗ്‌റൂമില്‍ ഉണ്ടെന്നും തിരുവാഭരണ കമ്മീഷണര്‍ ദേവസ്വംബോര്‍ഡിന് റിപ്പോര്‍ട്ട് നല്‍കി. അതേസമയം അന്തിമ കണക്കെടുപ്പ് പൂര്‍ത്തിയായിട്ടില്ല.
സ്വര്‍ണ്ണകിരീടത്തിന് സമാനമായ ചെമ്പില്‍ തീര്‍ത്ത മറ്റൊരു കിരീടം കൂടി സ്‌ട്രോംഗ് റൂമിലുണ്ടെന്നാണ് വിശദീകരണം. നേരത്തേ ശബരിമലയിലെ സ്വര്‍ണ കിരീടവും കവര്‍ന്നെന്ന വാര്‍ത്തകള്‍ പുറത്തുവന്നിരുന്നു. സന്നിധാനത്തെ സ്ട്രോങ് റൂമില്‍ സൂക്ഷിച്ചിരുന്ന അമ്പത്തിയഞ്ച് പവനിലേറെ തൂക്കമുള്ള കീരീടം കാണാനില്ലെന്ന് തിരുവാഭരണങ്ങളുടെ കണക്കെടുപ്പില്‍ സ്ഥിരീകരിച്ചെന്നായിരുന്നു റിപ്പോര്‍ട്ടുകള്‍ പുറത്തുവന്നത്. പകരം സ്വര്‍ണകിരീടത്തിന്റെ അതേ വലിപ്പത്തിലും രൂപത്തിലുമുള്ള മുക്കുപണ്ടം കൊണ്ടുള്ള കിരീടമാണ് സ്ട്രോങ് റൂമിലുള്ളതെന്നായിരുന്നു പുറത്തുവന്ന വിവരം.
തമിഴ്‌നാട്ടില്‍നിന്നുള്ള ഭക്തര്‍ സമര്‍പ്പിച്ച 445.78 ഗ്രാം തൂക്കത്തിലുള്ള 55.72 പവന്‍ വരുന്ന സ്വര്‍ണ്ണ കിരീടം 2012 ലായിരുന്നു ശബരിമലയില്‍ സമര്‍പ്പിച്ചത്. വിപണിയില്‍ 62 ലക്ഷം രൂപ വില വരുന്നതാണ് കാണാതായ സ്വര്‍ണ കിരീടം. ഭക്തര്‍ സമര്‍പ്പിച്ചതിന്റെ രേഖ രജിസ്റ്ററില്‍ രേഖപ്പെടുത്തിയിട്ടുണ്ട്. 2012ല്‍ 26 ലക്ഷം രൂപയായിരുന്നു ഇതിന്റെ വിപണി മൂല്യം. കിരീടം സമര്‍പ്പിച്ച സമയത്ത് വിഗ്രഹത്തില്‍ ചാര്‍ത്തി പൂജയ്ക്ക് ശേഷം സ്ട്രോങ് റൂമിലേക്ക് മാറ്റുകയായിരുന്നു ചെയ്തത്.
ഇപ്പോഴുള്ളത് മുക്കുപണ്ടമാണെന്നും സംഭവത്തില്‍ അന്വേഷണം നടത്താന്‍ ദേവസ്വം ബോര്‍ഡ് പ്രസിഡന്റ് കെ ജയകുമാര്‍ ഉദ്യോഗസ്ഥര്‍ക്ക് നിര്‍ദേശം നല്‍കിയതായുമായിരുന്നു വാര്‍ത്തകള്‍ പുറത്തുവന്നത്. എന്നാല്‍ ഇതിന് തൊട്ടുപിന്നാലെയാണ് കിരീടം നഷ്ടമായില്ലെന്ന രീതിയിലുള്ള വിശദീകരണവും വന്നിരിക്കുന്നത്. അതേസമയം സ്ട്രോങ് റൂം സ്ഥിതി ചെയ്യുന്ന സ്ഥലത്ത് സിസിടിവി ഇല്ല. ആറന്മുളയിലെ സ്ട്രോങ് റൂമിലുണ്ടായിരുന്ന നാല് പവന്റെ സ്വര്‍ണ മാലയും കാണാതായതായും റിപ്പോര്‍ട്ടുകളുണ്ടായിരുന്നു.
ഹൈക്കോടതി നിയോഗിച്ച അമിക്കസ് ക്യൂറി ജസ്റ്റിസ് കെ.ടി ശങ്കരന്റെ നേതൃത്വത്തിലാണ് കണക്കെടുപ്പ് നടക്കുന്നത്. ശബരിമലയില്‍ ലഭിക്കുന്ന വില കൂടിയ വസ്തുക്കള്‍ താല്‍ക്കാലികമായി സന്നിധാനത്തെ സ്ട്രോങ് റൂമിലും പിന്നീട് ആറന്മുളയിലെ സ്ട്രോങ്റൂമിലേക്ക് മാറ്റുകയുമാണ് ചെയ്യാറ്. സ്ട്രോങ്റൂമിന്റെ ചുമതലക്കാരനായ അഡ്മിനിസ്ട്രേറ്റീവ് ഓഫീസറുടെ പക്കലാണ് താക്കോല്‍ സൂക്ഷിക്കാറ്. പകല്‍ സമയത്ത് മാത്രമേ സ്ട്രോങ് റൂം തുറക്കാനാകൂ എന്നും നിയമമുണ്ട്. സ്ട്രോങ് റൂമിന് സിസിടിവി നിരീക്ഷണമില്ല.
Comments