തിരുവനന്തപുരം: മുഖ്യമന്ത്രി വി ഡി സതീശന്റെ വിവാദ ചാര്‍ട്ടേഡ് വിമാനയാത്രയ്ക്ക് അടച്ചത് 19 ലക്ഷം. പണമടച്ചത് ചിപ്‌സണ്‍ ഏവിയേഷന്‍. അതേസമയം സ്‌പോണ്‍സര്‍ ആരെന്ന കാര്യത്തില്‍ ഇതുവരെ മുഖ്യമന്ത്രി പ്രതികരിച്ചിട്ടില്ല. മൂന്ന് വര്‍ഷം സര്‍ക്കാരിന് ഹെലികോപ്റ്റര്‍ സേവനം നല്‍കിയ ചിപ്‌സണ്‍ ഏവിയേഷന്‍ കരാര്‍ പുതുക്കാന്‍ ശ്രമിക്കുന്നതിനിടയിലാണ് മുഖ്യമന്ത്രിയുടെ യാത്ര വിവാദമായത്.
കര്‍ണാടകയിലെ കോണ്‍ഗ്രസ് നേതാവും മന്ത്രിയുമായ കെ ജെ ജോര്‍ജിന്റെ കുടുംബത്തിന്റെ ഉടമസ്ഥതയിലുള്ള കേളചന്ദ്ര ഏവിയേഷന്റെ വിമാനം പറത്തുന്നതിന്റെ ചുമതലക്കാരാണ് ചിപ്‌സണ്‍ ഏവിയേഷന്‍. മുഖ്യമന്ത്രി മലപ്പുറത്തെ മഴക്കെടുതി വിലയിരുത്തുന്നതിനായി തിരുവനന്തപുരത്ത് നിന്ന് കരിപ്പൂരിലേക്ക് നടത്തിയ യാത്രയാണ് വന്‍ ചര്‍ച്ചയായത്. സര്‍ക്കാര്‍ ഖജനാവിന് ചെലവില്ലാത്ത യാത്ര ഇനിയും നടത്തുമെന്നാണ് വി.ഡി. സതീശന്റെ പ്രതികരണം. മുഖ്യമന്ത്രിയുടെ യാത്രയുടെ സ്‌പോണ്‍സറെ വ്യക്തമാക്കണമെന്ന ആവശ്യവുമായി പ്രതിപക്ഷം രംഗത്ത് വരികയും ചെയ്തിട്ടുണ്ട്.
ദുരൂഹത ഉള്ളതുകൊണ്ടാണ് സ്‌പോണ്‍സര്‍ ആരാണെന്ന് വെളിപ്പെടുത്താത്തതെന്നും ക്രമക്കേട് ഉണ്ടെങ്കില്‍ പരിശോധിക്കണമെന്നും സിപിഐഎം സംസ്ഥാന സെക്രട്ടറി എം.വി.ഗോവിന്ദന്‍ പറഞ്ഞു. പുറത്ത് പേര് പറയാന്‍ കൊള്ളാത്തവരായ ആളുകളാണ് സര്‍ക്കാരിന്റെ സ്‌പോണ്‍സര്‍മാരെന്നും സിപിഐ സംസ്ഥാനസെക്രട്ടറി ബിനോയ് വിശ്വവും പ്രതികരിച്ചു. വിദേശയാത്രയും കാറും അടക്കം എല്ലാം സ്‌പോണ്‍സര്‍ഷിപ്പിലൂടെ വാങ്ങുന്ന ഇത്രയും വേഗം പൊളിഞ്ഞ മറ്റൊരു സര്‍ക്കാര്‍ കേരളത്തില്‍ ഉണ്ടായിട്ടില്ലെന്നും പറഞ്ഞു.
Comments