ജപ്പാനിലെ ഷിഗ പ്രവിശ്യയിലെ മൊറിയാമ നഗരത്തിൽ രാവിലെ നാട്ടുകാർ കണ്ട കാഴ്ച അൽപം അമ്പരപ്പിക്കുന്നതായിരുന്നു. നഗരവീഥിയിലൂടെ കൂറ്റൻ പക്ഷി ഓടുന്നത് കണ്ട ഒരാൾ ഉടൻ പോലീസിനെ വിവരമറിയിച്ചു. ആദ്യം ഒട്ടകപ്പക്ഷിയാണ് റോഡിലൂടെ അലഞ്ഞുനടക്കുന്നതെന്നായിരുന്നു വിവരം. എന്നാൽ സ്ഥലത്തെത്തിയപ്പോഴാണ് മൃഗശാലയിൽ നിന്ന് രക്ഷപ്പെട്ട എമുവാണ് നഗരത്തിലൂടെ ഓടുന്നതെന്ന് വ്യക്തമായത്.
ഏകദേശം രണ്ട് മീറ്ററോളം ഉയരമുള്ള എമുവിനെ പിടികൂടാൻ പോലീസ് പിന്തുടർന്നെങ്കിലും പക്ഷി വേഗത്തിൽ ഓടി രക്ഷപ്പെട്ടു. തുടർന്ന് നഗരത്തിലെ വിവിധ ഭാഗങ്ങളിൽ തിരച്ചിൽ ആരംഭിച്ചു. ഇതിനിടെ സമീപത്തെ താമസക്കാരുടെ അടുത്തേക്ക് എമു എത്തുന്നതിന്റെ ദൃശ്യങ്ങളും നിരീക്ഷണ ക്യാമറകളിൽ പതിഞ്ഞു. ചിലർ കുട ഉപയോഗിച്ച് പക്ഷിയെ അകറ്റാൻ ശ്രമിക്കുന്നതും ദൃശ്യങ്ങളിൽ കാണാമായിരുന്നു.
രക്ഷപ്പെട്ട് ഏകദേശം രണ്ട് മണിക്കൂറിന് ശേഷമാണ് എമുവിനെ സമീപത്തെ ഒരു താമസസമുച്ചയത്തിന്റെ വളപ്പിൽ കണ്ടെത്തിയത്. പിന്നാലെ മൃഗശാലയിലെ ജീവനക്കാർ സ്ഥലത്തെത്തി പക്ഷിയെ പിടികൂടി സുരക്ഷിതമായി തിരികെ കൊണ്ടുപോയി. കഴിഞ്ഞ വർഷം വിരിഞ്ഞ ഈ എമുവിന് ഏകദേശം 1.8 മീറ്റർ ഉയരമുണ്ടെന്നാണ് അധികൃതർ അറിയിച്ചത്. സംഭവത്തിൽ ആർക്കും പരിക്കേറ്റിട്ടില്ല.
മൃഗശാലയുടെ പ്രവേശന കവാടത്തിന് സമീപം എമുവിനെ സ്വതന്ത്രമായി നടക്കാൻ അനുവദിച്ചിരുന്നതായും രാവിലെ പക്ഷി വളപ്പിനുള്ളിലുണ്ടായിരുന്നതായി സ്ഥിരീകരിച്ചിരുന്നുവെന്നും അധികൃതർ പറഞ്ഞു. എന്നാൽ കവാടം എങ്ങനെയാണ് തുറന്നതെന്ന് വ്യക്തമല്ല. കവാടം സുരക്ഷിതമാക്കാൻ ഉപയോഗിച്ചിരുന്ന കെട്ട് അഴിഞ്ഞതാകാം എമു പുറത്തുകടക്കാൻ കാരണമെന്നാണ് പ്രാഥമിക നിഗമനം. സംഭവം ആവർത്തിക്കാതിരിക്കാൻ സുരക്ഷാ ക്രമീകരണങ്ങൾ കൂടുതൽ ശക്തമാക്കാനാണ് മൃഗശാലയുടെ തീരുമാനം.
Comments