ഉജ്ജൈന്‍: വഴിവികസനവുമായി ബന്ധപ്പെട്ട് പള്ളി പൊളിക്കുന്നതിനെ തുടര്‍ന്നുണ്ടായ തര്‍ക്കത്തില്‍ ഉജ്ജെയ്‌നില്‍ പോലീസും വിശ്വാസികളും തമ്മില്‍ ഏറ്റുമുട്ടല്‍. സിംഹസ്ഥ മേള 2028-ന്റെ ഭാഗമായുള്ള റോഡ് വികസന പ്രവര്‍ത്തനങ്ങളുടെ ഭാഗമായി ശാഹി മസ്ജിദിന്റെ ഒരു ഭാഗം പൊളിച്ച് നീക്കുന്നതുമായി ബന്ധപ്പെട്ടാണ് തിങ്കളാഴ്ച പോലീസും ജനക്കൂട്ടവും ഏറ്റുമുട്ടിയിരിക്കുന്നത്. പ്രക്ഷുബ്ധരായ ജനക്കൂട്ടത്തെ നിയന്ത്രിക്കാന്‍ പോലീസ് കണ്ണീര്‍വാതകം പ്രയോഗിക്കുകയും സുരക്ഷാ ഉദ്യോഗസ്ഥര്‍ക്ക് നേരെ കല്ലേറുണ്ടാവുകയും ചെയ്തു.
സംഭവസ്ഥലത്ത് റാപ്പിഡ് ആക്ഷന്‍ ഫോഴ്‌സിനേയും വിന്യസിപ്പിച്ചിട്ടുണ്ട്. 2028-ല്‍ ഉജ്ജൈനില്‍ നടക്കുന്ന സിംഹസ്ഥ മേളയിലേക്ക് ലക്ഷക്കണക്കിന് തീര്‍ത്ഥാടകര്‍ എത്തുന്നതിന്റെ പശ്ചാത്തലത്തില്‍ വിപുലമായ അടിസ്ഥാന സൗകര്യ വികസനങ്ങളുടെ ഭാഗമായിട്ടാണ് റോഡ് വികസിപ്പിക്കുന്നത്. ഇതിന്റെ ഭാഗമായി 272 കെട്ടിടങ്ങളാണ് പൊളിച്ചുമാറ്റാന്‍ അടയാളപ്പെടുത്തിയിട്ടുള്ളത്. 1390-ല്‍ നിര്‍മ്മിച്ചതാണെന്ന് കരുതപ്പെടുന്നതും നൂറ്റാണ്ടുകള്‍ പഴക്കമുള്ളതുമായ വഖഫ് സ്വത്തായ ശാഹി മസ്ജിദിന്റെ പ്രാര്‍ത്ഥനാ ഹാള്‍, മിനാരം തുടങ്ങിയ ഭാഗങ്ങളാണ് റോഡ് വികസനത്തിനായി ഭാഗികമായി പൊളിക്കാന്‍ നിര്‍ദ്ദേശിച്ചിരിക്കുന്നത്.
ഉജ്ജൈന്‍ മുനിസിപ്പല്‍ കോര്‍പ്പറേഷന്റെ നോട്ടീസിനെ ചോദ്യം ചെയ്തുകൊണ്ടുള്ള പൊതുതാല്‍പ്പര്യ ഹര്‍ജികള്‍ സിംഹസ്ഥ മേളയ്ക്കുള്ള യാത്രാ സൗകര്യങ്ങളും മുന്‍നിര്‍ത്തി ഇന്‍ഡോറിലെ മധ്യപ്രദേശ് ഹൈക്കോടതി നേരത്തെ തള്ളിയിരുന്നു. ഇതുമായി ബന്ധപ്പെട്ട മറ്റൊരു ഹര്‍ജിയും പരിഗണനയിലുണ്ട്. മസ്ജിദ് സമുച്ചയം പൊളിച്ചുമാറ്റുന്നതിനെതിരെ കോണ്‍ഗ്രസ് എം.പി ഇമ്രാന്‍ പ്രതാപ്ഗര്‍ഹി രംഗത്തെത്തി. ജനങ്ങളുടെ വികാരങ്ങളെ മാനിക്കാന്‍ അദ്ദേഹം സംസ്ഥാന സര്‍ക്കാരിനോട് ആവശ്യപ്പെട്ടു.
മഹാകുംഭ മേളയുടെ ഭാഗമായി 29 കിലോമീറ്റര്‍ പുതിയ ഘട്ടുകള്‍, ഡൈവേര്‍ഷന്‍ പ്രോജക്ടുകള്‍, അണക്കെട്ടുകള്‍ തുടങ്ങിയ വിപുലമായ ഒരുക്കങ്ങളാണ് ഉജ്ജൈനില്‍ നടന്നു വരുന്നതെന്ന് ഉജ്ജൈന്‍ മുനിസി പ്പല്‍ കോര്‍പ്പറേഷന്‍ ചെയര്‍പേഴ്‌സണ്‍ കലാവതിയാദവ് വ്യക്തമാക്കി. പതിനെട്ട് കോടിയിലധികം ഭക്തര്‍ എത്തുന്ന ഈ ചടങ്ങില്‍ റോഡ് വികസനം അത്യന്താപേക്ഷിതമാണെന്നും കൂട്ടിച്ചേര്‍ത്തു.
Comments