ചിറ്റൂര്‍: വടകരപ്പതിയില്‍ പിഞ്ചു സഹോദരങ്ങളെ കുളിമുറിയിലെ വെള്ളത്തൊട്ടിയില്‍ വീണു മരിച്ചനിലയില്‍ കണ്ടെത്തിയ സംഭവം കൊലപാതകം. സ്വതന്ത്രമായി ജീവിക്കാന്‍ വേണ്ടിയാണ് കുഞ്ഞുങ്ങളെ കൊന്നതെന്നും മക്കളെ താന്‍തന്നെ സ്വന്തം കൈകൊണ്ടാണ് ഇല്ലാതാക്കിയതെന്നും കുട്ടികളുടെ മാതാവ് നിവേദ്യ പോലീസിനോട് പറഞ്ഞു.
തനിക്ക് സ്വതന്ത്രമായി ജീവിക്കണമെന്നായിരുന്നു നിവേദ്യ പോലീസിനോട് കൊലപാതകത്തിന് കാരണമായി പറഞ്ഞത്. ഭര്‍ത്താവ് മദ്യപാനിയാണ്, തനിക്ക് പഠിക്കാന്‍ ആഗ്രഹം, മോഡലിംഗിന് പോകാന്‍ ആഗ്രഹമുണ്ടായിരുന്നു. കുട്ടികള്‍ ഇക്കാര്യത്തിന് തടസ്സമാകുമെന്ന് കരുതി. മൂത്തകുട്ടി അഞ്ചുവയസ്സുകാരി ജന്നിഫറിനെ കുളിപ്പിക്കുന്നതിനിടയില്‍ വെള്ളത്തൊട്ടിയില്‍ മുക്കിപ്പിടിച്ച് കൊലപ്പെടുത്തുകയായിരുന്നു. ഈ സമയത്ത് മകന്‍ റോബിന്‍ മുറ്റത്ത് കളിച്ചുകൊണ്ടിരിക്കുകയായിരുന്നു. തുടര്‍ന്ന് റോബിനെയും വിളിച്ചുവരുത്തി മുക്കിക്കൊന്നു. താന്‍ ഒറ്റയ്ക്കാണ് കൊലപാതകം ചെയ്തതെന്നാണ് നിവേദ്യ പോലീസിനോട് പറഞ്ഞത്.
വടകരപ്പതി മണല്‍കാട് ജോണ്‍കുമാര്‍-നിവേദ്യ ദമ്പതികളുടെ മക്കളായ ജെന്നിഫര്‍ ജൂലിയറ്റ് (അഞ്ച്), റോബിന്‍ ക്രിസ്റ്റഫര്‍ (മൂന്ന്) എന്നിവരാണ് മരിച്ചത്. വെള്ളത്തൊട്ടിയില്‍ കുട്ടികള്‍ വീണുമരിച്ചു എന്നായിരുന്നു ആദ്യം പുറത്തുവന്ന വിവരം. പോസ്റ്റുമാര്‍ട്ടത്തിലും അസാധാരണമായി ഒന്നും കണ്ടിരുന്നില്ല. കളിക്കുന്നതിനിടയില്‍ അബദ്ധത്തില്‍ വീണുമരിച്ചെന്നായിരുന്നു കണ്ടെത്തയത്. എന്നാല്‍ മാതാവിനെതിരേ ചില ബന്ധുക്കള്‍ പരാതിയുമായി പോലീസിനെ സമീപിക്കുകയായിരുന്നു.
കുട്ടികള്‍ കുളിമുറിയിലെ ചെറിയ വെള്ളത്തൊട്ടിയില്‍ അബദ്ധത്തില്‍ വീണ് മരിക്കാന്‍ സാധ്യതയില്ലെന്ന് പിതൃസഹോദരി ബെന്‍സിയും ബന്ധുക്കളും സംശയം പ്രകടിപ്പിച്ചിരുന്നു. കുറച്ചുനാളായി കുഞ്ഞുങ്ങളെ നിവേദ്യ നോക്കുന്നില്ല എന്നും എപ്പോള്‍ നോക്കിയാലും ഫോണിലാണ് എന്നുമാണ് ബന്ധുക്കള്‍ പറഞ്ഞത്. ബെന്‍സി നല്‍കിയ വിവരങ്ങളുടെ അടിസ്ഥാനത്തിലാണ് പോലീസ് അന്വേഷണം ശക്തമാക്കിയത്. വിശദമായ ചോദ്യംചെയ്യലില്‍ കുറ്റം സമ്മതിച്ച നിവേദ്യയെ കൊഴിഞ്ഞാമ്പാറ പോലീസ് അറസ്റ്റ് ചെയ്തു. അതേസമയം കൊലപാതകത്തിന് കാരണം നിവേദ്യ പറഞ്ഞത് മാത്രമല്ലെന്നാണ് പോലീസ് കരുതുന്നത്.
കൊഴിഞ്ഞാമ്പാറ മേനോന്‍പാറ കൂരാങ്കാട്ട് വാടകയ്ക്കു താമസിക്കുകയാണു ജോണ്‍കുമാറും കുടുംബവും. രണ്ടുമാസം മുമ്പാണ് വിറകുവെട്ട് തൊഴിലാളിയായ ജോണ്‍കുമാറും കുടുംബവും മേനോന്‍പാറയിലെ വാടകവീട്ടിലേക്ക് താമസം മാറിയത്. ജോണ്‍കുമാര്‍ ജോലിക്കു പോയസമയത്തായിരുന്നു സംഭവം. നിവേദ്യയ്ക്കു മാനസികപ്രശ്‌നമില്ലെന്നും പോലീസ് സ്ഥിരീകരിച്ചു. മജിസ്‌ട്രേറ്റിനു മുന്നില്‍ ഹാജരാക്കി റിമാന്‍ഡ് ചെയ്ത് മലമ്പുഴ സബ് ജയിലേക്കു മാറ്റി. ചിറ്റൂര്‍ ഡിവൈ.എസ്.പി: എം. ശശിധരന്റ നേതൃത്വത്തിലാണ് പ്രതിയെ ചോദ്യം ചെയ്തത്.
Comments