ഭക്ഷണത്തിനു ശേഷമുള്ള ചെറിയ നടപ്പ് ആരോഗ്യം മെച്ചപ്പെടുത്താന്‍ പല രീതിയില്‍ സഹായിക്കുമെന്നത് പരക്കെ അറിയപ്പെടുന്ന കാര്യമാണ്. ഭക്ഷണശേഷം എഴുന്നേറ്റു നടക്കുമ്പോള്‍ രക്തത്തിലെ ഗ്ലൂക്കോസ് ഊര്‍ജ്ജത്തിനായി ഉപയോഗിക്കാന്‍ പേശികള്‍ക്ക് സാധിക്കുന്നു. ഇത് ഭക്ഷണത്തിന് ശേഷം രക്തത്തില്‍ പഞ്ചസാരയുടെ അളവ് പെട്ടെന്ന് ഉയരുന്നത് തടയാന്‍ സഹായിക്കും. തുടര്‍ച്ചയായി ഇരിക്കുന്ന ശീലം ഒഴിവാക്കി ഏതാനും മിനിറ്റുകള്‍ നടക്കുന്നത് ഭക്ഷണത്തിനു ശേഷമുള്ള ഗ്ലൂക്കോസ് നില മെച്ചപ്പെടുത്തുമെന്ന് പഠനങ്ങള്‍ വ്യക്തമാക്കുന്നു. 53 പഠനങ്ങളെ ആസ്പദമാക്കി 'ഒബീസിറ്റി റിവ്യൂസ്' പ്രസിദ്ധീകരിച്ച അവലോകന റിപ്പോര്‍ട്ട് അനുസരിച്ച്, ഭക്ഷണത്തിന് ശേഷം ചെറിയ ഇടവേളകളില്‍ നടക്കുന്നത് ഗ്ലൂക്കോസ്, ഇന്‍സുലിന്‍ വ്യതിയാനങ്ങള്‍ കുറയ്ക്കാന്‍ സഹായകമാണ്.
എന്നാല്‍ ഇതിനായി 5 മിനിറ്റ് നടന്നാല്‍ മതിയോ, അതോ 10 മുതല്‍ 20 മിനിറ്റ് വരെ നടക്കേണ്ടതുണ്ടോ? ഇതിന്റെ ഉത്തരം നിങ്ങള്‍ നടക്കാന്‍ തിരഞ്ഞെടുക്കുന്ന സമയം, നടപ്പിന്റെ വേഗത, നിങ്ങളുടെ ശരീരത്തിന്റെ ഗ്ലൂക്കോസ് പ്രതികരണം എന്നിവയെ ആശ്രയിച്ചിരിക്കുന്നു. ഭക്ഷണത്തിനു ശേഷം 5 മുതല്‍ 10 മിനിറ്റ് വരെ നടക്കുന്നത് പോലും രക്തത്തിലെ പഞ്ചസാരയുടെ അളവില്‍ ഗുണപരമായ മാറ്റങ്ങളുണ്ടാക്കുമെന്ന് 'അമേരിക്കന്‍ ഡയബറ്റിസ് അസോസിയേഷന്‍' (ADA) ചൂണ്ടിക്കാണിക്കുന്നു. കൂടുതല്‍ സമയം നടക്കുന്നത് മൊത്തത്തിലുള്ള ശാരീരിക അധ്വാനം വര്‍ദ്ധിപ്പിക്കുമെങ്കിലും, കുറഞ്ഞ സമയത്തെ നടപ്പും ഏറെ ഫലപ്രദമാണ്.
5 മിനിറ്റ് നടപ്പ് - 5 മിനിറ്റ് എന്നത് ചെറിയ സമയമാണെങ്കിലും നിസ്സാരമല്ല. ഈ ചെറിയ ചലനം പോലും പേശികളെ ഉത്തേജിപ്പിക്കുകയും ഊര്‍ജ്ജത്തിനായി ഗ്ലൂക്കോസ് ഉപയോഗിക്കാന്‍ സഹായിക്കുകയും ചെയ്യുന്നു. ഇന്‍സുലിന്‍ ലഭ്യമല്ലാത്ത അവസ്ഥയില്‍ പോലും പേശികളുടെ പ്രവര്‍ത്തനം വഴി ഗ്ലൂക്കോസ് വിനിയോഗം മെച്ചപ്പെടും. കൂടാതെ, പതിവ് ശാരീരിക അധ്വാനം ഇന്‍സുലിന്‍ സംവേദനക്ഷമതയും (Insulin sensitivity) വര്‍ദ്ധിപ്പിക്കും. പ്രഭാതഭക്ഷണത്തിനോ ഉച്ചഭക്ഷണത്തിനോ അത്താഴത്തിനോ ശേഷം കൂടുതല്‍ സമയം നടക്കാന്‍ സാധിക്കാത്തവര്‍ക്ക് 5 മിനിറ്റ് നടപ്പ് ഏറെ സഹായകരമാണ്. ദിവസത്തില്‍ പലതവണ ഇത് ആവര്‍ത്തിക്കാനും എളുപ്പമാണ്. എന്നാല്‍ കൃത്യമായി 5 മിനിറ്റ് കൊണ്ട് രക്തത്തിലെ പഞ്ചസാര കുറയുമെന്ന് തെളിയിക്കുന്ന പഠനങ്ങള്‍ പരിമിതമാണ്. കൃത്യമായ സമയത്തേക്കാള്‍, ഭക്ഷണശേഷം മുടങ്ങാതെ നടക്കുന്ന ശീലത്തിനാണ് ഇവിടെ കൂടുതല്‍ പ്രാധാന്യം.
10 മിനിറ്റ് നടപ്പ് - 10 മിനിറ്റ് നടക്കുന്നത് ശരീരത്തിന് കുറച്ചുകൂടി നല്ല അധ്വാനം നല്‍കുന്നു. തിരക്കുള്ള ദിവസങ്ങളിലും ഇത് എളുപ്പത്തില്‍ ജീവിതശൈലിയുടെ ഭാഗമാക്കാം. പേശികളെ കൂടുതല്‍ സമയം സജീവമായി നിര്‍ത്താന്‍ ഇത് സഹായിക്കും; പ്രത്യേകിച്ച് കാര്‍ബോഹൈഡ്രേറ്റ് അടങ്ങിയ ഭക്ഷണം കഴിച്ച ശേഷം. ഭക്ഷണത്തിനു ശേഷമുള്ള 5-10 മിനിറ്റ് നടപ്പ് രക്തത്തിലെ ഗ്ലൂക്കോസ് നിയന്ത്രിക്കാനുള്ള ലളിതമായ മാര്‍ഗ്ഗമായി ADA ശുപാര്‍ശ ചെയ്യുന്നു. കൂടുതല്‍ സമയം വ്യായാമം ചെയ്യുന്നത് രക്തത്തിലെ ഗ്ലൂക്കോസിന്റെ അളവ് കുറയ്ക്കാന്‍ കൂടുതല്‍ ഫലപ്രദമാണെന്ന് ഗവേഷണങ്ങള്‍ സൂചിപ്പിക്കുന്നു. 20 മിനിറ്റ് നടക്കാന്‍ ബുദ്ധിമുട്ടുള്ളവര്‍ക്ക് 10 മിനിറ്റ് നടപ്പിലൂടെ ഈ ശീലം പടിപടിയായി വളര്‍ത്തിയെടുക്കാം.
20 മിനിറ്റ് നടപ്പ് - 20 മിനിറ്റ് നടക്കുമ്പോള്‍ കൂടുതല്‍ സമയം സജീവമായിരിക്കാന്‍ സാധിക്കുന്നു. ഇത് ക്രമമായി ചെയ്യുമ്പോള്‍ ചെറിയ നടപ്പിനേക്കാള്‍ കൂടുതല്‍ ഫലം ലഭിക്കും. ഭക്ഷണത്തിന് ശേഷം നടക്കുന്നത് രക്തത്തില്‍ പഞ്ചസാരയുടെ അളവ് ഉയര്‍ന്ന നിലയില്‍ നില്‍ക്കുന്ന സമയം കുറയ്ക്കുകയും മൊത്തത്തിലുള്ള ആരോഗ്യവും ഇന്‍സുലിന്‍ സംവേദനക്ഷമതയും മെച്ചപ്പെടുത്തുകയും ചെയ്യും. എന്നാല്‍ തുടര്‍ച്ചയായി 20 മിനിറ്റ് നടക്കണമെന്ന് ഗവേഷണങ്ങള്‍ നിര്‍ബന്ധപൂര്‍വ്വം പറയുന്നില്ല. ഇടയ്ക്കിടെയുള്ള ഇരിപ്പ് ഒഴിവാക്കി ഇടയ്ക്കിടെ ചെറിയ നടപ്പ് നടത്തുന്നത് ഭക്ഷണത്തിനു ശേഷമുള്ള ഗ്ലൂക്കോസ്, ഇന്‍സുലിന്‍ നില മെച്ചപ്പെടുത്താന്‍ ഫലപ്രദമാണെന്ന് 2026-ലെ ഒരു പഠനം വ്യക്തമാക്കുന്നു. ഓരോ 15-20 മിനിറ്റിലും ഇരിപ്പ് ഒഴിവാക്കി നടക്കുമ്പോഴാണ് ഏറ്റവും മികച്ച ഫലം ലഭിക്കുന്നതെന്ന് ഗവേഷകര്‍ കണ്ടെത്തി.
Comments